Cantares 2

₁Aỹem sheeta'am aca lauoxo maye hualec

ye nalochiguiñi 'alhua ye Sarón,

aỹem lauoxo maye huauga na no'onaxa ca'amapega't.

₂Aso ỹoqopitaqte da ỹalectaigui na laỹepi 'alpi,

nache 'eeta'am ana lauoxo da ỹalectaigui ana huo'o ana lepi.

₃So ỹauotaxat da ỹalectaigui na laỹe ỹalleppi,

nache 'eeta'am ana qo'oipaq da huo'o ana ala

da ỹalectaigui ana laỹe huauec qo'oipaqpi.

Ỹataqta 'onaxaic ñaqa'en da ñeso'oto'ot na lpaqal,

qataq ỹataqta ñaman ana ala.

₄So ỹauotaxat aỹem ỹauegueua'a so huaña da nquia'axac,

da aỹem ỹalleto'ot qalaq yo'oqta da lqopiche aỹem.

₅¡Ñaq aỹem qaua'añaqchichi, aỹem qaỹa'añim qome ana deqaqta ala ana uvapi,

qataq aỹem qauquia'axañec ana manzana,

cha'aye huotaique selem da lamaic da ỹoqopitaxanaqtaic!

₆¡Da iyoxo' da ña'axaatalec na lhuaq ne'emaq,

qaq na lhuaq aloic nache aỹem nsoxouo!

₇Qami' 'alpi, maye qarma'ai na Jerusalén,

qami' ñachoxoreetoiguilo souaxat ana ñi'imshepi

qataq ana chegaxangopi maye huetauga na no'onaxa,

da saishet da sa qaualemaxache da do'ocheta aye ỹauotaqte.

¡Qauaqaita'a da do'ocheta

yaqto' maicheye da nlouec!

₈¡Na ỹauotaxat mashe anacta!

Namaye anactalec ana qasoxonaxapi,

nparenaxaata'ague ana comarelecpi.

₉Na ỹauotaxat 'eeta'am ana ñi'imshe,

qataq na chegaxango llalec.

¡'Ena mashe hueta'a na pa'aueegue da laỹe' na qarma'.

Nalletauoigui na nalloxoqui,

choche nalletapegueuo!

₁₀So ỹauotaxat aỹem 'eetega, 'eeta':

«¡'Am ỹoqopitaqtole,

qoñisheguem, qolaq!

₁₁¡Ña 'aumeten!

Mashe inoxoorec soua no'omaxaye,

nataqa'en soua auo'oche.

₁₂Mashe nnoxoneuo na nauoxo,

mashe ivita ye laloqo' da no'onaxanaxac,

na coiguenec mashe qaỹa'axaỹa da nnoinaxac

na pa'aiguelo na 'alhua.

₁₃Mashe ỹe ana ala ana higo,

qataq ana nañiguishe uva mashe huaỹoxon

da laitaỹaxac ana lauoxo.

¡'Am ỹoqopitaqtole,

qoñisheguem, qolaq!»

₁₄«'Am ỹalamaqte qoto'ole,

¡saishet da 'anqañoxottaigui na qaỹoqotcheguemec 'anqañoxotaqa'!

Aỹem ñeshetaique da sela'a da 'arashiguiỹaxac,

sauotaique sa'axaỹa da 'arvilỹaxac.

¡Ỹataqta samachiguiñi da 'am ñauane'!

¡Ỹataqta huo'o da lamaic da sa'aqtega da 'arvilỹaxac!»

₁₅Ña qauacoñiiua'a ana huaxaỹaxapiole,

cha'aye huotaique nlaxaañi

ana qorañiguishi uvapi maye mashe dasovitac.

₁₆So ỹauotaxat ỹataqta ỹalamaxat,

qataq somaye aỹem lalamaqte.

Da ilotague' ana lalo

nache nqopita da ỹalectaigui ana lauoxo ana huouepi.

₁₇Da ñaq napaltañi qataq natomchiguiñi,

nache 'avi'eguelaq, 'am ỹauotaxat,

'auỹalapigui' qoneta'am ana ñi'imshe

qataq na chegaxango llalec

da quetalec ana qasoxonaxapi ye Beter.