'Enapec so ỹale:
1'Am, maye 'am nta'a llale
ỹataqta 'onaxaiqa naua 'arapia'ate
da 'aỹa'aatrañi naua 'arapela'ate.
Naua laỹel naua 'eeguel ỹataqta ỹo'oxoraqte' 'eeta'ama na no'onatac
lo'onatac na ỹoqta ỹaỹaten da ỹo'ot na 'otaxatpi.
2Ñi 'arcom 'eeta'am aca colliichigui ỹomaxaqui,
qataq saq ỹet da huetangui na ỹoqta 'onaxaic lataxa.
Ana 'ara'am 'eeta'am na qalapootasheguem ala na trigo
qataq coleesop qanqoỹen ana lauoxo ana huoue.
3Naua 'artetel 'eeta'ama caua dos ñi'imshe llalole huayaye.
4Na 'arqosot 'eeta'am ana nalloxolate
maye chegaqaigui na lpi'inec ana lhue ana qasoxonaxa.
Naua 'ara'ai'te ỹataqta cherañi 'eeta'ama yeua lapelolel maye netraña ye Hesbón,
huaqta'ai' ñi lasom ye Bat Rabín.
Ñi 'armic 'eeta'am añi nalloxolate ye Líbano,
maye ilotague' qataq datatta ye Damasco.
5Na 'arqaic qalaq 'eeta'am ñaqa'en añi qasoxonaxa Carmelo.
Na 'araue qashelec qataq tocalec da lo'oxoỹaxac,
ana 'anamogue nache 'eeta'am da lcoñetegueshec ca nta'a.
6'Am 'onaxaale, qaica ca 'ena'am da 'aryacỹaxac
ỹataqta qaica ca 'ena'am da 'arauotaxanaqtaic.
7Qataq ye lcata da 'arataxac 'eeta'am da lataxac ana chaic,
qataq naua 'artetel 'eeta'ama ana ltaxale ana ala ana chaic.
8Qaq aỹem sauotaique da shiguisheguemec aca chaic,
nache sacona 'enauac ana ala.
Qaq naua 'artetel qalaq 'eeta'ama ñaqa'en
ana ltaxale ana ala ana uva,
qaq na 'ara'at nache 'eeta'am na laita ana manzana.
9Da lamaic na 'ap 'eeta'am na lataxa,
da quigui na qorap qataq naua qarhue.
'Enapeco' aso 'alo:
10Ỹataqta aỹem lalamaqte som ỹauotaxat.
Da lqopitaxanaqtaic da sheeta
ỹataqta aỹem naueguela't.
11¡'Aue, qolaq 'am ỹauotaxat, ñeqo'onaxauga na no'onaxa
da qaro'ochaqa' sonaqtaigui ana lauoxo ana alheña!
12Qaq da nte'etom nache saxauga ye lma' ana nañiguishe uvapi,
da yaqto' semetenaq da mashe huo'o ana llaxataxa,
qataq da mashe dasovi ana lauoxo,
qataq da mashe huo'o ana lauoxo ana granadapi.
¡Nache huaña qome da 'am sami' da ỹauotaxanaqtaic!
13Ana lauoxo ana mandrágoras
mashe huaỹoxon da laitaỹaxac.
Qaq ñi qarma' huetaña ana ỹotta'a't ala
ana qo'oipaq maye ishet da qanallec,
huo'o ana hua'auñi ala qataq ana dalaxai,
seỹotauga da yaqto' 'aralamaqte, 'am ỹauotaxat.
