'Enapec so laỹe 'alpi:
1'Am maye ỹataqta 'anapacalec da lyacỹaxac na laỹe 'alpi,
¿chaq taigo' cam 'arauotaxat?
¿Chaq hua'ague ca taigue camaye?
¡Qolaq, 'am ñenaigaqapegue' ñimitaqaique camaye!
'Enapec aso 'alo:
2So ỹauotaxat mashe huetaigui na lañiguishe lma',
ana lañiguishe maye ỹataqta ama da laitaỹaxac ana lauoxo.
Qataq nqopita da nqapaxaataigui nam nañiguishe lma'
nache napoctac ana lauoxo anamaye.
3Aỹem lalamaqte so ỹauotaxat,
qataq somaye ỹalamaxat.
Somaye nqopita da ỹalectaigui ana lauoxo ana nañiguishe.
Da nca'attauo no'onec
'Enapec so ỹale:
4'Am ỹoqopitaqte, 'am 'onaxaale
qataq lta'araic da 'aryacỹaxac
'eeta'am ye huaqta'a't nỹecpi ye Jerusalén qataq ye Tirsa,
qataq qoneta'am da llo'oxoyec ana huaqaañipi.
5¡Nache a'aye da aỹem 'aualleto'ot,
cha'aye naua 'ara'ai'te mashe aỹem naue'c!
Na 'araue 'eeta'am na laue ana quetaq lairaxai,
maye parenaxaata'ague ana qasoxonaxapi ye Galaad.
6Ana 'arhuepi ỹataqta ỹapagaq 'eeta'am ana nlo qagueta
maye cheta'ague da qanachelaxaatac
qataq mashe qanpetec,
qataq anamayepi nalochiguiñi.
7Naua 'aramelque tocaleguete 'eeta'ama ana ala ana granada,
'eco' nqañoxottaiguilo na lapoxot na 'arqaic.
8Ivi' sesenta ana ỹoqta lhuapi so nta'a,
qataq ochenta ana ỹaqauga lamoxouapi,
qataq qalota na qa'ampi.
9Qalaxaye aso ỹalamaqte qoto'ole maye nalochiguiñi ỹataqta 'oonole,
asomaye 'oonole ñale maye ỹataqta nauotaqte
lauotaqte aso 'alo maye deco'oic.
Qaq ana lhuapi so nta'a da ila'a asomaye
nache ỹo'oxoreetac,
ivira'a ana ỹaqauga lamoxouapi ỹataqta huo'o da llo'oxonnataxanaxa.
'Enapec so laỹe 'alpi:
10¿Negue't ana'ana cha'aguet nnoxotcheguem
maye 'eeta'am añi chi'ishe da nte'eta,
qataq 'erangui 'eeta'am ñi ca'agoxoic,
qataq da llo'oxoyec 'eeta'am ana huaqaañipi?
'Enapec aso 'alo:
11Saigui qome ye lma' ana nañiguishe nogalpi,
semeten da mashe nsala ana lauepi
ana qo'oipaqpi na no'onaxa ca'amapega't,
qataq mashe huo'o ana llaxataxa ana nañiguishe uvapi
qataq ana lauoxo ana granadapi.
12Qaỹoqtegue nache ñanom da 'eeta'am da ñeqotta'ai' so nta'a llalec.
'Enapec so laỹe 'alpi:
13Ña 'añe'eguelaq qome Sulamita, ña 'auasot.
Ña 'añe'eguelaq, sauoqtaique da 'am sauanaqchigui.
'Enapec aso 'alo:
¿Negue't ca huo'omshe huotaique qauloỹa'a ana Sulamita?
'Enapec so laỹe 'alpi:
¡Qomye da lasotaxac da ỹalectaigui na laỹe dasottega'tpi!
