Tito 3

₁'Auennataxanaxanec na 'amqaanataxanaxaicpi da iuen da ỹachaxana da lalaxayec na nta'alpi maye 'amaqtaqaicpi qataq na ltauapi. Qataq nache 'eetai' da lhuotta da ỹo'ot ca ỹaỹamaqchiguiñi. ₂Qataq saishet da qauema naua la'aqtaqa da detaqtega ca lỹa, nachaqrata da nmitaique da nlagaxayec, qataq huo'o naq 'enec naqa'en ca lỹa, qataq ỹachaxan da huesota lataxac da ỹalectaigui na shiỹaxauapi.

₃Cha'aye nataqa'en qomi' co'ollaxa soua hua'au' na'axa'te, qomi' qaica ca saỹaanaqpec qataq qomi' qauemaiqa, sesomaqtac qataq qomi' l-lataqa na ỹotta'a't qarqopitaxanaqtaicpi. Souaqtaigui na qauemsat qataq da nquiỹaxanaqtaic qataq seviraqta'a da ñepa'aguenaqta'a't. ₄Qalaxaye Ñim Lo'onatac 'Enauacna maye Qarca'alaxaqui, ỹachaxanalo qomi' da lchoxonnataxanaxa qataq da lauotaxanaqtaic 'enauac na shiỹaxauapi, nache qomi' nca'alaxatre'c ₅na'aictaxa qomi' da qaica ca ỹaỹamaqchiguiñi da so'otaq, qalaxaye maiche chegoqchigui da qui'itta lsoxoyec Ñimaye, da qomi' nca'alaxatre'c, qataq qomi' iỹoi' qataq qomi' naralaxa't. Ime, nache qomi' ỹanema da dalaxaic achaalataxac ỹachegoxotchigui naqa'en So Saqcha'a Na'añaxac Qui'itta. ₆Qaq Ñimaye ỹachegoxotchigui So Qarca'alaxaqui Jesucristo da qomi' ỹanema So Saqcha'a Na'añaxac Qui'itta. ₇Damaye ỹataqta saishet sa saxaguet, qalaxaye Ñimaye ỹachegoxotchigui da lqouagaxanaqtaic da qomi' ỹaconegueta, qataq qomi' ỹanema da yaqto' saconaxaguet da 'itchiguiñi achaalataxac chochaq tatec maye seuataqta'aguet.

₈Qaq de'era sheetega ỹataqta 'eesa. Ỹoqo'oye ñeshetaique da ỹataqta 'auapaxaguenataxanec, yaqto' 'enauac na ỹa'amaqten Ñim Lo'onatac 'Enauacna ỹataqta npogoxoinapegue' da ỹo'ot ca ỹaỹamaqchiguiñi. De'era sheetega ỹataqta 'onaxaic, qataq huo'o naq naigui. ₉Qalaxaye 'antela'agueto' na cotaxacpi maye qaica ca naigui, nataqa'en da na'aqtaguec so hua'au nta'alpi, qataq da qanayectega ca nỹa, qataq da qancotatapigui na namaxasoxonaxacpi maye chegoqo'ot so Moisés co'ollaxa. Cha'aye damaye qaica ca taiguet, qataq qaica ca naigui.

₁₀Da huo'o ca sa nhuoona't naqa'en na 'amqaanataxanaxaicpi, nache camaye ỹataqta 'autaxaỹot. Qaq da 'am sa ỹalaxaguet da mashe dos 'avi'eguelaxalec da qonapega, nache camaye 'anqateeguesop na 'amqaanataxanaxaicpi. ₁₁Cha'aye mashe qaỹaỹaten que'eca shiỹaxaua da sa nateneueegue da ỹataqta 'eesa napaxaguenataxanaxac. Cha'aye da lasouaxashet, nachera da yo'oq naqa'en da ỹataqta isomapec.

₁₂Qom mashe 'am samaxa ñi Artemas, huo'otaq ñi Tíquico, qaq 'am sa 'anaỹaloxon qome da 'ananaỹa ye nỹecpi ye Nicópolis da aỹem 'anauane', cha'aye sauotaique da soota'a yemaye qom nvireuo na no'omaxa. ₁₃Ỹataqta 'ampogoxoinapegue' qome da 'autauan so Apolo qataq so Zenas maye nanettalec da taunaxanaxaic. 'Autauaneque soomaye 'enauac na lhueneguesat da llecỹaxa'c, yaqto' qaica ca iue'n. ₁₄Nataqa'en na qarqaỹañicpi 'amqaanataxanaxaicpi, 'onaxaic da ỹaỹaten da ỹo'ot ca no'on, qataq da itauan cam huo'o da lhuenaxanaxa, yaqto' da nachaalataxac namayepi ỹataqta huo'o da naigui.

₁₅'Enauac na soota'aguet qarqaỹañicpi, 'am ỹamaxa da lquinaxanaxac. Qataq da iquinaxanaxac taỹa'a 'enauac na 'amqaanataxanaxaicpi maye qanauochaxauapi. Ỹataqta huo'o da iyaxa, da de'era lsoxoyec Ñim Lo'onatac 'Enauacna qami' ỹanema ca no'on qoyecỹaxaqui. Aja', nache 'eetec de'era.