Filemón 1

₁Aỹem Pablo, aỹem qaicoñettai' souaxat da sasoilec So Cristo Jesús. Aỹem qataq ñi Timoteo 'am samaxa ana ỹere, 'am qanauochaxaua qarqaỹa Filemón maye 'am qaro'onataxanaxaua. ₂Nataqa'en samaxa 'enauac nam ỹa'amaqten So Jesús maye laponqa' na 'arma', nache 'ena'am aca qarqaỹa Apia, qataq ca qarqaỹa Arquipo maye nataqa'en qartaua de'era qaro'onataxanaxac. ₃Ỹataqta lta'araic da qaryaxa da qauacoñiiguet da nqouagaxanaqtaic qataq da nlagaxayec maye chegoqo'ot Ñim Qarta'a maye Lo'onatac 'Enauacna qataq So Qarataxala' Jesucristo.

₄Filemón, aỹem nache 'eetai' naxa da saatacot da ña'achecỹaxac Ñim Lo'onatac 'Enauacna da tachigui ye iuel da qoneta da ñeqouagaxaueetac. ₅Cha'aye aỹem huo'o da ỹa'axaỹaxac da 'arauotaxanaqtaic qataq da 'arpi'iỹaxac So Qarataxala' Jesús qataq da 'arauotaxanaqtaic 'enauac nam lalamaxatpi Ñim Lo'onatac 'Enauacna. ₆'Am huo'o da 'anaquitaxac So Qarataxala' 'ena'ama qomi'. Qaq ỹoqo'oye seỹaxaatacot Ñim Lo'onatac 'Enauacna da, nache qoqueto'ot da 'anaquitaxac Ñimaye, choche ivitta'a da ỹataqta 'auauatton 'enauac nam ỹaỹamaqchiguiñipi maye ishet da so'otaq. Qaq de'era chegoqchigui da qarauotaxanaqtaic So Qarataxala' Jesucristo. ₇'Am ỹaqaỹa Filemón, aỹem ỹataqta samachiguiñi cha'aye huo'o da ỹa'axaỹaxac da qoneta da lta'araic 'arauotaxanaqtaic na qarqaỹañicpi, qataq 'am chegoqchigui da huo'o da la'añaxac da lquiyaqteỹaxac 'enauac na qarqaỹañicpi.

₈Qaq ỹoqo'oye aỹem na'aictaxa da aỹem lamaxashec So Cristo qataq huo'o naq shenec da huo'o ca 'am samaxalec da 'auo'ot. ₉Qalaxaye aỹem sepacapegue' da 'am ñachoxoreetot, souaxat da 'arsoxoyec. Aỹem Pablo, nagui mashe aỹem ỹa'axaiqui qataq aỹem qaicoñettai', souaxat da sasoilec So Cristo Jesús, ₁₀qaq nagui 'am seỹaxanot da 'auaconeguet qataq 'auchoxoren qome na Onésimo. Namaye mashe ivira'a da 'eeta'am ñaqa'en ca yo'oqchigui ỹalec ana'ana sootaigui ncoñetaxanaxaqui.

₁₁Ne'ena Onésimo soua lỹa't na'axa'te, namaye choche 'arlatac, qaica ca taiguet, qalaxaye nagui namaye ỹataqta qarpe'et. ₁₂Qaq nagui namaye qaltaq 'am samaxa. Qaq 'auaconeguet qome, qalaxaye 'aue'enaxattem da nachaỹem da aỹem 'auaconeguet. ₁₃Qaq aỹem ishettaxa da ñellañi namaye, da yaqto' aỹem itauan da 'anmeneguet, nagui da ñaq aỹem qaicoñettai' souaxat da no'on na'axaỹaxac maye sa'axattac. ₁₄Qalaxaye aỹem saishet da huo'o ca sa'aualec da so'ot, cha'aye saiuena'a da huo'otaq sa 'auaỹamaxaren, yaqto' de'era seỹaxaategueua'a saishet da 'eeta'am da 'am qaỹamaqtalec. Nachaqrata da maiche 'am chegoqtot. ₁₅Cha'aye saiuena'a da na Onésimo chochaq cara'ac da ca'ai na 'arma', yaqto' nagui da 'am ỹe'egueloqot, nache saishet da qaltaq 'am ca'ai. ₁₆Qaq nagui namaye saishet da 'arlatac. Chaqrata da 'ena'am ca 'arqaỹa maye ỹataqta 'arauotaxat, cha'aye qaica ca 'ena'am. Aỹem ỹataqta ỹauotaxat namaye, qalaxaye 'am qome ỹataqta ỹactec da 'arauoche namaye. Da 'arauotaxanaqtaic 'aue'enaxattem da 'arauoche nam lalamaxatpi So Qarataxala', cha'aye namaye saishet da 'ena'am ca camachaqca shiỹaxaua.

₁₇Qaq ỹoqo'oye qom yo'oqta 'eesa da 'am ỹa'amqaanataxanaxaua de'era qara'amqaanataxanaxac So Jesucristo, nache 'am seỹaxanot da 'auaconeguet namaye, 'aue'enaxattem da aỹem 'auaconeguet. ₁₈Qaq da huo'otaq huo'o ca 'am ỹo'otec co'ollaxa sa ỹaỹamaxañi, huo'otaq huo'o aca lavigaxaiste, qaq no'on da aỹem 'auasaxalec da sesheeten. ₁₉Qaq aỹem maiche ñima'ai' da shiyiñi de'era ỹa'aqtac da aỹem 'am sesheeten qome, na'aictaxa da 'amctaxa maye 'ausheeten aỹem, lamaxa da tachigui ye 'arhuel da aỹem hueto'ot añi 'aravigaxaiste. ₂₀Aja', 'am ỹaqaỹa, 'auauo'o qome ca 'arqouagaxanaqtaic da sheeta, cha'aye 'am mashe 'aua'amaqteetac So Qarataxala'. 'Aua'añaqchet qome da iquiyaqteỹaxac, cha'aye maiche qomi' nỹa't da sa'amaqtenaqtac So Cristo.

₂₁Qaq aỹem 'am samaxa ana'ana ỹere, cha'aye saỹateeta da ỹataqta huo'o da 'aralaxayec, qataq ishet da aỹem 'aỹa'anem cam seỹaxanaique qataq ishet da 'agaqteetec. ₂₂Nataqa'en seqopitaxanapec da 'am shenapega da 'auqataxanai' qome ca ỹo'ochaqa', cha'aye aỹem seuattaique da Ñim Lo'onatac 'Enauacna hua'axaỹa da qanqouagaxaunaxaqui, nache aỹem nqateeguesop ana'ana ncoñetaxanaxaqui, nache ishet da ashec da qami' ñamaqtegalo.

₂₃Ñi Epafras maye ñecoñetaxaua souaxat da sasouaxalec So Cristo, 'am ỹamaxa da lquinaxanaxac. ₂₄Nataqa'en ñi Marcos ñim itaua de'era qaro'onataxanaxac 'am iquiitac qataq ñi Aristarco, Demas qataq ñi Lucas.

₂₅Qaq So Qarataxala' Jesucristo qami' ỹanema qome ca no'on qoyecỹaxaqui. Aja', nache 'eetec de'era.