1'Am Jerusalén, mashe anata ca na'a'q maye lalamaxat Ñim Nataxala', qaq huangui qome na 'anqa'aicpi da qanalogui nam no'onañi 'aralamaxatpi. 2Qaq que'eca na'a'q Ñim Nataxala', laỹona't qome 'enauac na ỹotta'a't shiỹaxauapi da yaqto' iloquiaxan na Jerusalén. Nache loxonec qome na huaqta'a't nỹecpi, qataq nqatec na huetaigui na nma'pi, qataq ncat nam 'alpi, nache tachiguingui na laiñi qome ca ỹauec namayepi, qalaxaye cam no'onañipi, qalaq nache netalec qome ne'ena 'alhua. 3Qalaxaye qom ime, nache anac Ñim Nataxala' da delogui' que'eca ỹotta'a't shiỹaxauapi, 'eeta'am naxa da deloctac da huo'o da alaataxac. 4Qaq que'eca na'a'q, nache Ñim Nataxala' petalec qome añi qasoxonaxa maye huaña ana oliivo, maye pa'aỹa'ague da nala' lliguisheguem ye Jerusalén. Qaq huo'o qome ca lta'araic ca'amegue taỹa'ague da nala' lliguisheguem qataq da nala' lliguiñi, maye colaxagui naqa'en añi qasoxonaxa maye huaña ana oliivo. Qaq ca 'oonolec laỹe añi qasoxonaxa pa'aỹa'ague qome da sheu', qaq ca lỹa pa'aỹa'ague da tagueñi, 5qaq qami' qom qauataiuec, nache qoquiiteueegue cam ca'amegue maye quichiguingui na laiñi añi qasoxonaxa, nache ivira'a ye Asal, maye pa'aỹaueegue da laỹe. Qaq qami' qauataiuec qome 'eeta'am da 'eetec co'ollaq datauec som qarta'ailpi souaxat so lacholaxanaxa na 'alhua maye huetoigui so na'a'q co'ollaq nta'a so Uzías da ilotague' ye Judá. Qaq anac qome Ñim Nataxala' maye Ñatamnaxala', nnaictague' 'enauac nam ỹa'amaqteetac Ñimaye. 6Qaq que'eca na'a'q, qaica qome ca yo'oqchiguiñi, qataq qaica ca latomaxa. 7Que'eca na'a'q, qaica qome ca lỹa, qataq nacheñita Ñim Nataxala' da ỹaỹaten. Cha'aye da qanayeetaigui que'eca na'a'q, nache saqỹataxaguet ca pe, cha'aye na'aictaxa da nvi' ca pe, qalaq ñaq 'eetalec da yo'oqchiguiñi. 8Qaq huaña, nache ye Jerusalén chegoqtegueua'a qome ca 'etaxat maye ỹataqta attom, maye quetac da nvi' ye no'omaxa, qataq ye napaxaỹaxa, qaq tachiguingui na laiñi ca ipaxaneuga aye auaxai leuaxai, qaq ca laỹe qalaq ipaxaneuga aso auaxai maye le'enaxat Mediterráneo. 9Qaq que'eca na'a'q, Ñim Nataxala', ilo'ogue qome 'enauac ana 'alhua. Ñim Nataxala' Nacheñita qome 'oonolec, qataq 'oonolec da le'enaxat. 10Qaq 'enauac qome ne'ena 'alhua ỹe'eguelaxa da 'eeta'am ca nalochiguiñi 'alhua, chegoqchiguiña ye Geba nache ivitta'a ye Rimón, maye pa'aỹa'ague da taguiñi ye Jerusalén. Nache ye Jerusalén ỹataqta 'amaqtaqaic qome, qataq nache qanayeetaña qome yemaye, chegoqchiguiña ñi ñegueuo ye Benjamin, nache ivitta'a ñi ñegueuo maye naña añi lamaqai, yem naña co'ollaxa som togoshec lasom, qataq chegoqchiguiña añim nalloxolate maye le'enaxat Jananel, nache ivitta'a añim no'onataxaqui na aceite maye lalamaxat so nta'a. 11Aja', ye Jerusalén qaltaq ỹe'eguelaxa qome da qanayenalec, nache saishet da qaltaq qailaxachigui. Nache nam hueta'a qome yemaye ỹataqta qaica ca ndaqtaique. 12Qalaxaye nam ỹotta'a't shiỹaxauapi maye iloquiaxaatac co'ollaxa ye Jerusalén, Ñim Nataxala' ỹauo'o qome ca lta'araic nhuaxanaguec: namayepi nchega na lo'oc, qaltaq naua la'ai'te, qataq ñi lachaxat qom ñaq nca'altauec. 13Qaq que'eca na'a'q Ñim Nataxala', ỹataqta nlaxatchigui qome da lcolanaxa namayepi. Nache ñim 'oonolec ỹacona qome na lhuaq ca lỹa, qataq maiche taỹa't da deloctega't. 14Nache na shiỹaxauapi maye lma' ye Judá naỹa nataqa'en ye Jerusalén, nache nhuo' nam ỹotta'a't shiỹaxauapi maye lauoreuapi yemaye. Deuotaxanec na lcat plata qataq na lcat oro, qataq nam nogoxot. 15Qaq que'eca nhuaxanaguec maye talec qome nam shiỹaxauapi, nataqa'en talec qome na caipi, molapi, nauanaxanaxapi, 'ashenapi, qataq 'enauac na shiguiỹacpi maye hueta'a ca lanataqa' nam npa'aguenaxauapi namayepi. 16Qaq qom ime de'era, nache 'enauac nam lca'alaxaicpi nam shiỹaxauapi maye deloctague' co'ollaxa nam netaña ye Jerusalén, 'enauaque qome naua vi'iye da natega yemaye da yaqto' natamnot Ñim Nta'a, Ñim Nataxala' maye Qaica ca Ỹaqalanapec, qataq da ỹo'oxoren ye naponaxaqui maye laloxoqui da qanayenaiguilo naua ña'axaqui' 'epaq laue, maye le'enaxat Enramadas. 17Qaq nam ỹotta'a't shiỹaxauapi maye netalec ana 'alhua, da huo'o ca saishet da taỹa ye Jerusalén da natamnot Ñi Nta'a, Ñim Nataxala' maye Qaica ca Ỹaqalanapec, nache camayepi saishet da talec ca auot. 18Qaq nam Egipto le'ecpi, da saishet da jec da ỹalegueuo, nache Ñim Nataxala' ỹauo'o ca nhuaxanaguec, qaq nache 'eetec nataqa'en camachaqca nam laỹepi ỹotta'a't shiỹaxauapi, da saishet da jec da ỹalegueua'a cam naponaxac maye le'enaxat Enramadas. 19Qaq 'era, qome da nhuaxanaguec na Egipto le'ecpi, qataq 'enauac na laỹepi ỹotta'a't shiỹaxauapi maye saishet da taỹa da ỹo'oxoren ca naponaxac, maye le'enaxat Enramadas. 20Qaq que'eca na'a'q, qalaq ivira'a ana latoina na caipi da nanettalec qome da 'eeta': «Qaiỹotauga da Lalamaxat Ñim Nataxala'». Qaq ana taxaquipi maye no'onataxanaqte da huaña añi atamnaxaqui, qalaq saqaishetapec qome, 'eeta'am ana ỹomaxaquipi maye hueto'ot añi nca'atoxonaxalate. 21Nache 'enauac qome ana taxaquipi maye hueta'a ye Jerusalén, qataq ye Judá, da qaiỹotauga da lalamaqte Ñim Nataxala' maye Qaica ca Ỹaqalanapec. Qaq cam ỹo'ot aca lachetaqtaxanaqte, qalaq do'onataxana da ỹaneuaq nam lapat nam shiguiỹacpi maye ỹaneuo da lachetaqtaxanaxat. Qaq que'eca na'a'q, qaica qome na nmenaxaicpi maye hueta'a naxa añi atamnaxaqui, maye lalamaqte Ñim Nataxala' maye Qaica ca Ỹaqalanapec.
