1Qaq que'eca na'a'q, qalaq huo'o qome, ca npaxaatasheguem 'etaxat, da yaqto' nỹoxoqui da iỹouec na lasouaxashet qataq na lshepaxanaxa nam chegoxoguetpi so David qataq nam netaña na Jerusalén. 2Nache que'eca na'a'q, ñeqateeguesop qome 'enauac ne'ena 'alhua, na le'enaxatpi na ne'enaqtac atamnaxala'pi, yaqto' saishet da nache queta da qanatameetacot. Qataq nataqa'en ñeqateeguesop qome ne'ena 'alhua na ntaxaỹaxanaxanecpi, qataq 'enauac nam saqcha'a na'añaxacpi maye qauem. Qaq 'era da san ỹa'aqtac Aỹem Nataxala'. 3Qaq huaña, nache da huo'o ca huotaique da da'aqtaxan, nache caua lalamaqa'ate lta'al, 'enapegalo camaye 'eeta': «'Am 'aleu qome, cha'aye 'auatenataxaatapigui da le'enaxat Ñim Nataxala'». ¡Nache caua lta'al ỹa'arapec qome camaye da ỹapacapeguec da 'eetega na'aqtaxanaxanec! 4Qaq que'eca na'a'q, na na'aqtaxanaxanecpi, huo'o qome da la'agaxa da ỹa'axattac nam lauanaqchecpi. Nache qaica qome ca datenataxan da napotaña ca lapo' na na'aqtaxanaxanecpi, 5nacherata da ñi 'oonolec 'enapec qome: «Aỹem saishet da aỹem na'aqtaxanaxanec, nacherata da so'ottac na ỹanaxanaqa'. Nache chegoqchiguiña co'ollaq ñaq aỹem nogotolec da soutague' na no'onatac na no'onaxa.» 6Qaq da huo'o ca inat da, 'eeta': «¿Ta'ainco' da huo'o na 'arque'emaxa naua 'arhuaxaye?», nache camaye ỹasat qome, 'eeta': «Namaye qaỹo'ot caillaye huaña ye lma' na ñauochaxauapi.»
Ñim Nataxala' nacheñi Ñim Ñatamnaxala'
7Ñim Nataxala' maye Qaica ca Ỹaqalanapec da la'aqtac 'eeta': ¡'Anachaañi 'am ỹeelonec, nache 'auataỹa'aguet ñi ỹamaxashec maye ilotague' ana qagueta, qataq ñim ỹale maye itaua! ¡'Aualauat qome ñim ilotague' ana qaguetapi, yaqto' anam lhuateguishe qaguetapi laga't qome, qaq Aỹem sataỹa'aguet qome da salauat na qagueta llalaqpi! 8Qaq nam netaña ne'ena 'alhua, ileu qome caua dos nam tres lpa'axaco na shiỹaxauapi, qaq no'onañi qome da nca'altauec ca 'oonolec lpa'axac namayepi. 9Qalaxaye que'eca no'onañipi, tangui qome ñaqa'en ca norec, sequi'itaxat qome, 'eeta'am ñaqa'en da qaiqui'itaxat ca lcat plata, qataq seỹo qome, 'eeta'am ñaqa'en da qaiỹo ca lcat oro. Huaña nache camayepi aỹem natamnot, nache Aỹem sasateguet qome. Qaq seỹaxana qome da ỹalamaxatpi, qaq camayepi da Aỹem iỹaxana qalaq 'eeta': «Ñim Nataxala' nacheñi Ñim Qanatamnaxala'.»
