1Ime, nache Ñim Nataxala' huaigui naqa'en so ỹauanaqchec, da aỹem ỹachaxana so Josué maye lataxala' na ntaxaỹaxanaxanecpi da qaitaxaỹapegue' Ñimaye. Somaye nachattañi datato'ot so piguem le'ec, maye lamaxashec Ñim Nataxala'. Qaq na aloic so Josué, nache huetaua'a so pa'aguenataxanaxaic da yaqto' ỹauo'o ca lasouaxashet somaye. 2Nache so lamaxashec Ñim Nataxala' 'enapega so pa'aguenataxanaxaic, 'eeta': «¡Ñim Nataxala' 'am nlaxa! ¡Ñim Nataxala' maye ỹauotec na Jerusalén, 'am nlaxa qome! Cha'aye de'era ỹale 'eeta'am aca poqo 'ettaigui maye cheta'ague da qaỹachegoxotangui ca norec.» 3Qaq so Josué ỹaatrañe soua ỹataqta nshepaxa'n alogo, qataq ña nachattañi datato'ot so piguem le'ec maye lamaxashec Ñim Nataxala'. 4Huaña, nache so namaxashec piguem le'ec, 'enapegalo soua ltau' da nqa't soua nshepaxa'n anogo maye ỹaatrañi so Josué. Ime, nache 'enapega 'eeta': «Ñaq 'aulogui nagui de'era 'am so'otec, damaye naigui da 'am ñeqateeguesop na 'arasouaxashetpi. ¡Qaq nagui aỹem so'ot da 'am qoỹanaxanaxanguilo qome caua anogo maye 'onaxaiqa!» 5Qaq ime, nache 'enapegalo soua ltau' da ỹanagui na lqaic so Josué, so qui'itta nqaic laxataxat. Nache soomaye, ỹanagui somaye so nqaic laxataxat, ime, qataq ỹanaxanaxanguilo somaye, soua anogo maye 'onaxaiqa. Qaq so lamaxashec Ñim Nataxala' nache ñaq nachattañi. 6Ime, nache so lamaxashec Ñim Nataxala' 'enapega so Josué, 'eeta': 7«'Era da la'aqtac Ñim Nataxala' maye Qaica ca Ỹaqalanapec: ‹Da qoquetegue da ñeqa'aicỹaxac, qataq da 'aupaqueelec da 'am samaxalec, nache 'am sanem qome da 'aulotague' añi ỹalamaqte atamnaxaqui, qataq ye nqasoxoc, qataq Aỹem sauo'o qome ca 'aro'onataxanaxac da 'aualectaigui nam ỹamaxashecpi piguem le'ecpi. 8Qaq ñaq 'ana'axaỹaxaachiguiñi 'am Josué, 'am maye 'am lataxala' nam ntaxaỹaxanaxanecpi, qataq nataqa'en na'axaỹaxaachiguiñi qome, na 'artauapi maye ntaxaỹaxanaxanecpi, cha'aye 'enauac da qoñiita da qami' la'anaqa'ate qome da na'aqtaxanaxac maye, 'eeta': Aỹem ñanacot qome ñi ỹamaxashec, maye le'enaxat da Llaxataxa. 9'Am Josué, ña 'aumeten nam coma' maye 'am sataxanot, namaye siete naua laỹel. Qaq nache Aỹem qome da sauo'o ca serelec namaye. Qaq ime qome nache huaigui ñaqa'en ca 'oonolec na'a'q da sapalaxat na lasouaxashetpi nam netalec ne'ena 'alhua. 10Qaq qom ivita que'eca na'a'q, nache ñi 'oonolec da qoñeeta ncoyeguene' qome ca lỹa, nache ntootapigui'salo souaxat da l-lagaxaye'c huetro'ot na lpaqal aca lañiguishe uva qataq hiigo. Qaq 'era da la'aqtac Ñim Nataxala' maye Qaica ca Ỹaqalanapec.›»
