Aso ncoỹaraxanaxaqui lashe oro qataq soua dos oliivo
1Huaña, nache so namaxashec piguem le'ec, maye aỹem na'aqtaxaatague' ñe'eguelaq, nache aỹem nquetoxon, 'eeta'am da 'eetec da qanquetoxon ca do'ocheta, nache aỹem inat, 'eeta': 2'Am Zacarías «¿Negue't ca 'aula'a?» Nache aỹem sasateguet sheeta': «Qomye selota'a ara lashe ana ncoỹaraxanaxaqui maye chegaqaigui na oro, aramaye na'attalec añi laỹe' na aceite. Qaq na pa'asheguem aramaye nache huo'oi ñeua siete ncoỹaraxanaxaqui' maye netaua'alo naua siete lleco na aceite. 3Qataq huaqta'ato aramaye, daua dos oliivo, ara 'oonole hueta'ague da aloic, qaq ara lỹa qalaq hueta'ague da ne'emaq.» 4Nache senat so namaxashec piguem le'ec maye aỹem na'aqtaxaatague': «'Am Ỹataxala', ¿negue't ca naigui de'era?» 5Nache so namaxashec piguem le'ec aỹem ỹasateguet, 'eeta': «¿Sa 'auaỹaten peta'a ca naigui de'era?» Nache sasateguet somaye sheeta': «Saishet da saỹaten 'am ỹataxala'.» 6Nache somaye qaltaq 'enapec: «'Era da la'aqtac Ñim Nataxala' maye taỹa'a ñi Zorobabel, ‹Ñimaye saiuen qome ca qalota alleppi, qataq ca yo'oqchigui na'añaxac, maye nachesota so Saqcha'a Ỹa'añaxac.›
'era da la'aqtac Ñim Nataxala' maye Qaica ca Ỹaqalanapec. 7Qaq ¿chenegue'to' 'am 'amaqtaqai qasoxonaxa? ¡Ye 'am ỹauaachigui qome ñi Zorobabel, da 'am qanquigaxaañi nache 'avi'eguelaxa da qoneta'am ca nalochiguiñi 'alhua! Qaq ñim Zorobabel qom nqatec cam coma' maye ỹataqta 'ana'attalec, nache nam shiỹaxauapi ỹa'alaqtagui qome, 'eeta': ¡Maye sa no'onolec! ¡Maye sa no'onolec!» 8Qaq ime, nache Ñim Nataxala', qaltaq ỹauo'o so aỹem ỹanem lỹa na'aqtaxanaxac maye, 'eeta': 9«Ñi Zorobabel lapaxañi qome ca lo'oxonaxala' aca atamnaxaqui, qataq nacheñi ñimaye da iviraxata'a qome da imeta naqa'en.» Qaq 'era qome da 'eetec, da yaqto' qami' qauaỹacheñeeta da nacheñi Ñim Nataxala' maye Qaica ca Ỹaqalanapec ñim aỹem namaq. 10«Cha'aye nam qaica ca ỹanapoigui som saq 'amaqtaq maye chegoqchiguiña de'era no'onataxanaxac, namayepi ntonapigui' qom ila'a so Zorobabel da imatta de'era no'onataxanaxac.» Qaq ime, nache so namaxashec piguem le'ec qaltaq, 'eeta': «Ñe'eñeua siete ncoỹaraxanaxaqui', nache la'aitel Ñim Nataxala', maye imeteetrac 'enauac ana 'alhua.» 11Nache aỹem senat so namaxashec piguem le'ec, sheeta': «¿Negue't ca naigui de'eraua dos oliivo, maye netraua'a naua laỹel ara lashe ana ncoỹaraxanaxaqui?» 12Qataq she'eguelaxalec da senat somaye, sheeta': «¿Negue't ca naigui de'eraua dos lcoue ara oliivo maye huaqta'ato soua lleco na aceite, maye chegaqaigui na oro maye taỹauga ana ncoỹaraxanaxaquipi?» 13Nache so namaxashec piguem le'ec aỹem ỹasateguet, 'eeta': «¿Sa 'auaỹaten peta'a ca naigui de'era?» Nache sheeta': «Saishet da saỹaten 'am Ỹataxala'.» 14Nache somaye aỹem ỹasateguet, 'eeta': «De'eraua dos, nacheraua daua nca'agui'she, da yaqto' huapegueto da lo'onataxanaxac Ñim Nataxala' maye lalamaqte 'enauac ana 'alhua.»
