Da 'eetec qom ilaxachigui 'enauac na huetalec ana 'alhua Ñim Nataxala'
1Qaq 'era dam la'aqtac Ñim Nataxala', maye ỹanem so Sofonías, som na'a'q co'ollaq so Josías maye llalec so Amón nta'a ye Judá. Qaq so Sofonías so lta'a le'enaxat Cusí, qaq so Cusí nache chegoxoguet so Gedalías, qaq so Gedalías nache chegoxoguet so Amarías, qaq so Amarías nache chegoxoguet so Ezequías.
2Qaq 'era da la'aqtac Ñim Nataxala':
«Aỹem selaxachigui qome,
'enauac nam huetalec ana 'alhua.
3Selaxachigui qome na shiỹaxauapi,
qataq na shiguiỹacpi,
selaxachigui na maỹopi, qataq na nỹaqpi,
qataq so'otec da nqalaatapigui' nam qauemaicpi,
qataq imeuo ñaqa'en na shiỹaxauapi ana 'alhua.»
Qaq 'era da la'aqtac Ñim Nataxala'.
4«Sachaxanec na ihuaq da sataỹa'aguet na Judá le'ecpi,
qataq 'enauac na hueta'a ye Jerusalén.
Qataq sapalaxat 'enauac nam saq'en atamnaxala'pi maye lqui'ipi so Baal,
qataq ivira'a nam le'enaxatpi na ltaxaỹaxanaxanecpi.
5Qataq selaxachigui nam tasheguema naxa
na l-laq na lma' da natamnot ana huaqaañipi,
qataq nam ỹa'attrañi naxa naua l-llecte
da ỹo'oxoreetac da ỹe'enaxat,
qataq dam le'enaxat som atamnaxala' Milcón.
6Nataqa'en selaxachigui qome nam Aỹem ca'ai,
qataq nam saishet da Aỹem nmitaique da Aỹem inat.»
7¡Ñaq qañe'emaxache da qauataito'ot Ñim Nataxala',
cha'aye da lviraxac Ñimaye mashe nayeetai'!
¡Ñim Nataxala' mashe iqataxaatai'
cam lachetaqtaxanaxat, qataq mashe iqui'itaxat na lcoyeguenatacpi!
8«Qaq nache huetoigui cam na'a'q qom san ca ỹachetaqtaxanaxat,
da sauo'o ca nhuaxanaguec nam nataxala'pi,
qataq na llalaqpi cam nta'a,
qataq 'enauac nam ỹaatañi na nogoxot maye saqaỹauanapega.
9Qaq nataqa'en que'eca na'a'q
sauo'o qome ca nhuaxanaguec nam parenaxaalec so nqauaxala',
qataq nam nlaxatchigui da nayeloxo
qataq da natenataxanaxac,
na lma'pi na na'aco'pi.»
10Ñim Nataxala', 'eeta':
«Que'eca na'a'q qaỹa'axaỹa qome ca na'alaxac,
da qaiỹaxanaique ca ntaunaxanaxac,
huaña ñim ñegueuo maye le'enaxat Nỹaq,
qataq cam na'alaxac maye chemaxaña ñi lỹa lasom,
qataq huo'o qome ca lta'araic l-lamaxa
cam hua'axañi chemaxaña añi lcomaraxalate.
11¡Qaua'alaqai qome,
qami' maye qarmaye na nỹecpi maye le'enaxat Na'araxanaxaqui,
cha'aye ileu qome 'enauac na nmenaxaicpi
qataq 'enauac nam ỹoxottañi,
da nmenaxac ana anom plata, namayepi taỹa'a da qailaxachigui!
12Qaq que'eca na'a'q
qalaq sacona qome aca ncoỹaraxanaxaqui
nache ñemit ye Jerusalén.
Huaña nache sauo'o ca nhuaxanaguec
nam shiỹaxauapi maye ỹe'emaqtac
'eeta'am na lataxa da qaica ca ldaxac,
qataq 'enapec naxa:
Ñim Nataxala' saishet da ỹo'ot ca no'on
qalaxaye nataqa'en,
saishet da ỹo'ot ca qauem.
13Qaq ỹoqo'oye, qaiuotaxanec qome na lalamaxatpi,
qataq qailaxachigui na lma'pi.
No'oxoosheguem qome na lma'pi,
qalaxaye saishet da naigui,
qataq ỹo'ot ana lañiguishe uva,
qalaxaye saishet da nỹomigui na lataxa,
maye chegaqaigui anamaye.»
14¡Mashe sa qaỹapeque
na lta'araic na'a'q maye lviraxaqui Ñim Nataxala'!
¡Mashe sa qaỹa'aguet, ỹataqta huo'o da lỹalaxa!
Ỹataqta chaqaic da l-llimiaxa ca lviraxac Ñim Nataxala':
¡ỹoqo'oye ivira'a qome na ỹataqta 'añaxaicpi da ỹa'alaq!
15Qaq que'eca na'a'q
huetoigui qome ca lta'araic nayeloxo,
nachetataic qataq naquicoxo,
na'a'q maye ỹo'ot da nlaguiñi, qataq toolec 'enauacna,
qataq ỹataqta napalñi.
16Que'eca na'a'q qaỹa'aqtega qome da l-lamaxa ana nasheerepi
qataq da na'alaxac, da qailoquiaxan ye huaqta'a't nỹecpi,
maye huo'o na lpaqtaxat qataq ana qaỹoqotcheguemec nalloxolatepi.
17Ñim Nataxala' 'eeta', da la'aqtac:
Ñelaxatchigui qome da nque'eenaxac na shiỹaxauapi,
nache namayepi da queuotapigui'
qalaq 'eeta'am na qanamaicpi,
cha'aye souaxat da huo'o da lasouaxashet Aỹem hueto'ot.
Nam ltago'q, qalaq qailagaxattac qome
'eeta'am qanqa'en na namoxoỹaxa,
qaq na lapat qalaq lapoosheguem qome,
'eeta'am na la'atec na shiguiỹac.
18Que'eca na'a'q maye huaigui ca layeloxo Ñim Nataxala',
nache na shiỹaxauapi saishet qome da deca'alligui
ana alom plata, huo'otaq ana oro,
cha'aye na le'eraxa da lalemataic Ñim Nataxala'
ỹavigaxatta qome 'enauac ne'ena 'alhua.
¡Nache nque'elaxatta qome da 'enauac na netalec ana 'alhua qailaxachigui!
