Sofonías 2

₁Ñaq qauataiỹa't, qataq qalapoñiỹa't qami'

shiỹaxauapi maye qaica ca qara'agaqai,

₂llaxatemaq ñaq saxanaxa da qami' qaichego'q da qoñeeta'am ca 'auaqpi,

maye nacheye ye 'oonolec na'a'q huaigui da huaỹoxon;

qataq da ñaq saxanaxa da qami' taleguete cam 'ettaigui layeloxo Ñim Nataxala',

qataq ñaq saxanaxa da qami' nvitalo cam na'a'q maye huaigui ca layeloxo Ñim Nataxala'

₃Qanmichiỹaique Ñim Nataxala', 'enauac qami' maye qaica ca qara'amaqchequi ana 'alhua,

qami' maye qaualaqaiguet nam namaxasoxonaxacpi.

Qanmichiỹaique da nalochiguiñi lataxac, qataq saishet da qana'amaqchiñi,

cha'aye saiuena'a da qoñeetec de'era, nache qanca'alleeuec,

cam na'a'q maye huaigui ca layeloxo Ñim Nataxala'.

qataq nataqa'en ye Ascalón ỹataqta nlachiguiñi qome,

qaq na lma' ye Asdod qaỹamaqauec qome huaigui ca na'a'q laiñi,

qaq nam hueta'a ye Ecrón qalaq qaỹasaxauec qome.

₅¡Ỹataqta choxoraxasoro' qami', ỹalleppi maye qarmaye na Creta, maye neto'ot na loigue aso auaxai!

Ñim Lo'onatac 'Enauacna mashe ỹan de'era la'aqtac da qami' dataỹa'agueta, 'eeta':

«¡'Am Canaán, maye 'am na'alhua nam Filistea le'ecpi,

'am selaxachigui qome nache qaica ca no'onañi nam 'am netalecpi! ₆Na loigue aye auaxai qalaq ñaxaalec qome na 'auaqpi,

nache lquia'axanataxanaqa' qome nam qagueta lo'opi,

qataq ỹanaña ana laỹe' ana lalo qaguetapi.»

₇Qaq cam lca'alaxaicpi qome na nhuo' le'ecpi maye lma' ye Judá,

nalec qome yi'iye 'alhua qom anac Ñim Nataxala' maye Natamnaxala' namayepi,

da itauan qataq naralaxat da na'achecỹaxac namayepi.

Qaq nache hueta'a qome yemaye da ilotague' ana lalo qaguetapi,

qaq ye pe qalaq hueta'a qome ye lma' so Ascalón da nmatec.

₈«Aỹem sa'aqchigui da lsheunaxanaxac na Moab le'ecpi,

qataq da le'enaxanaxac na llalaqpi so Amón

da deqat naqa'en da la'amaqchec,

na ỹalamaxat nhuo' le'ecpi, qataq da na'amaqteetalec

nam na'alhuapi namayepi.

₉Qaq Aỹem maye ñeca'altauec,

'enapec Ñim Nataxala' maye Qaica ca Ỹaqalanapec,

Ñim Natamnaxala' na Israel le'ecpi;

na Moab le'ecpi 'eeta'am qome ye Sodoma,

qaq nam llalaqpi so Amón qalaq

'eeta'am qome ye Gomorra,

nache yemaye ñaxaalec qome ana huoue le'enaxat poqo,

qataq hualec qome na toue, qataq yemaye nache 'eetai' qome da toolec.

Qaq cam no'onañi qome nam ỹalamaxat nhuo' le'ecpi,

deuotaxanec qome yemaye, qataq nache nalec qome yi'iye 'alhua.»

₁₀Qaq 'era da nsheetenaguec qome na Moab le'ecpi qataq na Amón le'ecpi,

souaxat da isheueetac na lalamaxat nhuo' le'ecpi Ñim Nataxala',

qataq da na'amaqten da 'eetega saishet

da 'eeta'am nam lalamaxatpi,

Ñim Nataxala', maye Qaica ca Ỹaqalanapec.

₁₁Ñim Nataxala' ỹataqta huo'o da lchec qom dataỹa'aguet namayepi.

Cha'aye ilaxachigui qome 'enauac na atamnaxala'pi yi'iye 'alhua,

qaq huaña qome nache 'enauac nam pa'aiguelo da qaỹo'oxoren Ñimaye,

ivira'a nam shiỹaxauapi maye netaleguete nauatai' ỹaqa'atalo 'alhuole.

₁₂¡Nataqa'en qami' maye qarmaye na Etiopía,

qami' ique'emaqche't qome ca lainec Ñim Nataxala'!

₁₃Ñimaye ỹachaxanegue qome na lhuaq da sheu'

da yaqto' ilaxachigui ye Asiria,

qaq huaña nache toolec qome yem huaqta'a't nỹecpi ye Nínive,

nache ỹe'eguelaxata da ỹataqta toolec

qataq deqaqta yi'iye 'alhua.

₁₄Na 'epaqpi maye no'onataxat na lma'pi

qalaq qanqat qome,

nache nnaatalec qome anam nlo qaguetapi

qataq 'enauac na shiguiỹacpi maye huauec.

Qaq ana huoqo' qataq na 'alaxaraq

qalaq do'ochetalec qome ana no'onañi nhuoqtepi,

qataq na teguesanpi nỹeetagui qome

netaviiguilo naua nalloxoqui',

qataq na nqauaxala' nam ñegueuopi.

₁₅Qaq 'iye yem huaqta'a't nỹecpi

maye ỹataqta nlaqchigui da na'amqaanaxac,

qataq qaica ca ñe'etaique, qataq 'enapec naxa

da qaica ca 'eeta'am nam netalec ana 'alhua.

¡Yemaye ỹataqta nlachiguiñi, nache ỹe'eguelaxa

da lanataqa' na shiguiỹacpi maye qauemaicpi!

Qaq 'enauac qome na nlectot yemaye nache ỹe'eetac,

qataq iuaxaata'a't naua lhuaxaye.