1~Crón 18

₁Tä tiyäme tähistso, David ikalhi p'ante Filisteo lhayis, wet len'ohyaj i'pe lhamel, wet isoyej lhamel häp hupuy tä Gat lhäy'e wichi lew'etes iyhäj tä tott'aho.

₂Häte ikalhi p'ante Moab lhayis wet len'ohyaj i'pe lhamel, wet lhamel tiskanpe p'ante laka impuestos.

₃Wet iche p'ante hin'o tä lhey Hadad-ezer, häp Aram lhayis laka rey tä niyatej honhat lhip tä lhey Soba. Wet lham yik p'ante tä iwatläk lhayen lewuka honhat tä ifwache tewokitaj tä Éufrates. Wet häp tä lewhäy tä David lhäy'e laka nifwotas inuye wet ikalhi. ₄Wet David lhäy'e laka nifwotas itsokthä mil kaletas tä õka'tshayajchal, lhäy'e setecientos sip'älis tä iche'pe yel'atas, lhäy'e veinte mil (20.000) sip'älis tä t'äschehchä. Häte inäk'äsen lakäläy yel'atas tä iton kaletas tä õka'tshayajchal. Tajlhame tä imanthi yel'atas iyhäj tä iwatejlä cien kaletas.

₅Wet nämhen Aram lhayis tä tälhe Damasco yämlek lhamel hich'ote Hadad-ezer. Mat David lhäy'e laka sip'älis ilänhen veintidós mil (22.000) lhamel. ₆Wet itihi lhamel laka honhat häp lham laka sip'älis. Wet len'ohyaj i'pe lhamel wet häte lhamel tiskanpe laka impuestos. Mälhyejtso tä Lhawuk hich'otepej David, honhat chik häpe tä ihoye, wet ikalhi t'at letayhfwas.

₇Wet David ichuma Hadad-ezer leniyatfwas laka'tshayajp'otes tä oro wet ichäje Jerusalén. ₈Häte ichuma wuj bronce tä tälhe Tibhat lhäy'e Kun, hupuy täkwfwas tä lewuk Hadad-ezer. Wet tä paj p'ante häp tä Salomón isej tä ne'tek õyenlhi waj lehi tä wujtaj, lhäy'e ch'utey, lhäy'e iyhäj m'ayhay tä bronce tä õ'tichufwi Lhawuk Lew'et.

₉Wet rey tä lhey Tou tä niyatej honhat tä Hamat, lham ihanch'oye p'ante tä David ikalhi ilhokej Hadad-ezer kanifwotaj. ₁₀Tä mälhyejtso, Tou ichene rey David häp lhäs Adoram yämlek n'okwiyej wet käjejlhi. Tsi Tou häte itayhlä p'ante häp Hadad-ezer. Wet ichenchufwi Joram häp m'ayhay tä oro, lhäy'e tä plata, lhäy'e tä bronce. ₁₁Wet rey David ichumlä m'ayhayna wet yachaje Lhawuk. Hip'ajtej oro lhäy'e plata tä tälhe ilhokej honhates tä lham ikalhi: tälhe Edom, Moab, Amón, lhäy'e Filisteo lhayis, lhäy'e Amalek.

₁₂Wet Abisay, Sarvia lhäs, ilänhen dieciocho mil (18.000) Edom lhayis tä ihi honhat tä w'awulhchä tä lhey Nisoyw'et. ₁₃Wet itihi Edom häp sip'älis, wet David len'ohyaj i'pe ilhokej Edom lhayis. Wet Lhawuk hich'ote David, honhat chik häpe tä ihoye, wet ikalhi t'at letayhfwas.

₁₄David leniyatyaj i'pe ilhokej Israel, wet iwoyepej m'ak tä is alhoho yämlek laka wichi isej. ₁₅Häp laka sip'älis kaniyat häpe p'ante Joab, Sarvia lhäs. Wet Josafat, Ahilud lhäs, häpe elh tä silätwo tä ifwenhopej rey häp m'ayhay tä iche. ₁₆Wet Sadoc, Ahitub lhäs, lhäy'e Ahimelec, Abiatar lhäs, häpehen sacerdotes, wet Seraías häpe elh tä õlesaynekwo. ₁₇Wet Benaías, Joyada lhäs, häpe elh tä niyatej Keret lhayis lhäy'e Pelet lhayis tä lhamel t'uye rey. Wet David leles häpehen p'ante leniyatfwas.