David ne'tek õ'wo t'ufwahtesa wichi
1Häp Satanás itayhlä p'ante Israel lhayis, inityenej David chik iwo t'ufwahtesa lhamel. 2Wet David tahuyej Joab lhäy'e sip'älis kaniyatey, wet ifwenho lhamel tä yok:
–Mäh woyay t'ufwahtesa Israel lhayis, tälhte Beerseba tä ihi lhip tä tapinhiye yäk lechäte Dan tä ihi lhip tä tafwojhiye. Wet fwenayla n'oho chätefwas tä iche yämlek olham ohanej.
3Mat Joab ichulho tä yok:
–Iwuk rey, is chik Lhawuk yäm wujpe laka wichi yämlek lhäy'e lhip tä inu'pe lhamel tä iche athana. Wet ilhokej lhamel häpehen akawos. ¿Atsi m'ak tä tumenej tä lelhak'alej tä lewoye täjtso? ¿Hä let'uhläk lewo tesa Israel?
4Mat rey David inityenej Joab yäk iwoye. Wet yik, ilunche ilhokej Israel, wet pile Jerusalén. 5Tä ileyej tä iwo t'ufwahtesa wichi, yachaje David. Wet ihi p'ante ilhokej Israel un millón cien mil (1.100.000) hin'ol tä khajayhen yämlek iwo laka'tshayaja, lhäy'e cuatrocientos setenta mil (470.000) tä ihi Judá. 6Mat Joab tek ithatlä Leví lhayis tä iwo t'ufwahtesa, lhäy'e Benjamín lhayis, tsi Joab y'ulhanche m'ak tä rey David ne'tek iwoye tä yenlhi censo.
Censo tumenej tä Lhawuk lewäk ihi
7Wet Dios tek ihuminche m'ak tä David iwoye, wet iwo lewit'äya Israel. 8Wet David lhaifwenejo Dios tä yok:
–Olham wuj tä otes ihi tä owoye täjtso. Mat olhaip'altsen ame athana chik letäyhat n'oyej otes tä akawon'o. Tsi wuj tä ni'isache m'ak tä owoye, ohätet iwoye elh tä ni'isa.
9Wet Lhawuk tahuyej David laka profeta Gad wet ifwenho tä yok:
10–Mäh hoye David, fwenhola, olak, “Tres m'ayhay tä Lhawuk ifwen amho. Is chik letshupiye m'ak weihalha yämlek iwoyej ame.”
11Wet profeta Gad ihoye David wet ifwenho tä yok:
–Lhawuk lhämet yok, 12“¿Hä letshupyen ame tres nekchämis tä nehlä iche, wok tres iwel'as tä atayhfwas ailänejen lakwelheley, wok tres ifwalas tä Lhawuk itiyej äytes ilhokej honhat tä Israel wet Lhawuk laka ángel ilänhen wichi?” Athana lhek tetshan, ¿atsi m'ak tä ochulhejo häp elh tä ichenn'o ame?
13Wet David ichulho Gad tä yok:
–Wuj tä olhakli ihi. Athana is chik ochätho Lhawuk lakwey, tsi wuj tä lep'altsenyaj ihi, wet isichet'a chik ochätho häp hin'ol lakweyey.
14Wet mälhyejtso p'ante tä Lhawuk ichätyenpe õt'inhayaj Israel, wet y'inhen setenta mil (70.000) wichi. 15Wet ichene ángel Jerusalén yämlek iwasthi. Mat tä ataj iwasthihi, wet Lhawuk hiw'en wet ilhak'alche õwit'äyhyajtso tä fwitaj ichätyenpe wichi tä ihi. Wet tahuyej ángel tä ilänhen wichi wet yok:
–¡Naya, kasit!
Häp p'ante lewhäytso tä Lhawuk laka ángel ichätwhäye honhat lhip tä Arauna tä Jebús lhayis elh isaphi trigo. 16Wet tä David iyahinphä, hiw'ene Lhawuk laka ángel tä ihi pule tä inuhchä honhate, wak'alh lakatnhat tä ihi lakwey tä itayhte Jerusalén. Wet David lhäy'e hin'ol tä thänhäy lhamel hiw'uyhiche lakhäy tä yelajen tä lhamel letetnek tä wuj tä lelhakli ihi. Wet lhamel t'upichehchä yäk lete'pelis ihi honhat, 17wet David tahuyej Dios tä yok:
–Olham tä one'tek õ'wo t'ufwahtesa wichi. Häpe olham tä owoye osukyaj lhäy'e tä owoye m'ak tä ni'isa. Mat letes ihihit'a wichi, tsi newache m'ak tä ni'isa tä lhamel iwoye. Iwuk Dios, olhaip'altsen ame, is chik olham tä ichät n'o'pe atasnhayaj, lhäy'e ow'et lheley. Isichet'a chik õt'inhayaj ichätpe aka wichi.
David yenlhi p'ante Lhawuk laka altar
18Wet Lhawuk laka ángel tahuyej profeta Gad wet yok:
–Mäh fwenho David tä ne'tek yenlhi Lhawuk laka altar, itihi honhat lhip tä Arauna isaphi trigo.
19Wet David yik tä iwoye Lhawuk lhämet tä profeta Gad ifwenho. 20Wet Arauna nech'e isaphi trigo, wet tä lhaitilhkathi hiw'enepa ángel. Wet cuatro leles tä iyej lham, lhamel yikhen, lhaiskathen. 21Wet David ihoye Arauna, wet tä hiw'enlä David, yikch'oye lhip tä ihi, ileyej tä ilanhi trigo lhoy wet t'upihchä tä ihi tä David itayche yäk lete'pe ihi honhat. 22Wet David tahuyej wet yok:
–W'en n'oho honhat lhip tä lesaphi trigo yämlek otihi tä oyenlhi Lhawuk laka altar. Fwen n'oho laha, ochäjla, otiskanla'pe yämlek iwo pesa õt'inhayaj tä ilän wichi.
23Wet Arauna ichulho David tä yok:
–Chuma, iwuk, ow'en amho, ene m'ak tä am lehuminche. Olham ow'en amho weyis lhayis yämlek õ'wunhomche wet lhen Lhawuk lew'ayhata, lhäy'e hal'äy tä osapkanhatchal yämlek lhen lehuka, lhäy'e trigo yämlek häte lew'enho Lhawuk. Ilhokej tä ow'en amho, iwuk.
24Mat rey David yok:
–Kha, oatis, otiskanla'pe ilhokej laha m'ak tä lew'en n'oho. Tek oso amej m'ak tä alewuk yämlek ow'enho Lhawuk, wet tek ow'enhihola lew'ayhat tshätäy tä õ'wunhomche tä n'am tiskanpe tä laha.
25Wet mälhyejtso p'ante tä David tispa Arauna, wet häp lhiptso laha seiscientas monedas tä oro. 26Wet David itihi lhiptso tä yenlhi Lhawuk laka altar tä yenlhi Lhawuk lew'ayhat tshätäy tä õ'wunhomche lhäy'e iyhäj tä õ'länhen yämlek lha'isyene Lhawuk. Wet David t'änch'oye Lhawuk wet Lhawuk ichulho, ichene itäj tä tälh puleye tä ichätpe lew'ayhat tshätäy tä õ'länhen tä i'pe altar. 27Wet Lhawuk tahuyej ángel wet n'äyejo, ne'tek y'uyit lakatnhat.
David itshupiye honhat lhiptso yämlek paj wet õ'tihi Lhawuk Lew'et
28Tä David hiw'en tä Lhawuk iläte tä ihi Arauna lesapkanw'et, wet itihi lhiptso tä yenlhi lew'ayhat tshätäy tä õ'länhen. 29Häp ifwalastso Lhawuk lewukwe tä carpa tä Moisés p'ante ne'tek õyenlhi tä ihi honhat tä ts'anis, häp lewukwetso ihi t'at häp lhip tä tojphä tä ihi Gabaón, lhäy'e häp altar tä õ'ti'pe tshätäy tä õ'wunhomche, häp tä iyej. 30Mat David iwohiyet'a tä ihoye lhiptso tä hich'ahuye Dios, tsi wuj tä nowaye tä hiw'en Lhawuk laka ángel lakatnhat.
