1~Crón 24

₁Häte wichi tä tälhe letes p'ante Aarón tä õhw'entejchehen lhamel lechumet. Häp Aarón leles häpehen p'ante tä lheyis Nadab, Abihú, Eleazar, wet Itamar. ₂Mat Nadab lhäy'e Abihú ichun tä y'inhen p'ante, lhamel ichunch'oye lajcha, wet lhamel leles ihihit'a. Wet häp tä Eleazar lhäy'e Itamar tä lhamel iwoye p'ante sacerdote lechumet.

₃Wet rey David hiw'entejchehen sacerdotes lechumet lhäy'e m'ak tä lhamel iwoye. Wet Sadoc tä Eleazar lhäs tä lepes lhele tä hich'otejlhi David, lhäy'e Ahimelec tä Itamar lhäs tä lepes lhele. ₄Mat lhamel hiw'en tä wujpe hin'ol tä Eleazar leles tä lepes lheley, inu'pe Itamar leles. Wet mälhyejtso tä õhw'enhathen lhamel, wet iche dieciséis niyatey tä Eleazar leles lhäy'e ocho niyatey tä Itamar leles. ₅Wet õ'wo sorteaya'pe p'ante lhamel tä õhw'enhathen, tsi Eleazar leles lhäy'e Itamar leles iche iyhäj tä lhamel lechumet ihi Dios Lew'et tä lhamel hich'ote Dios lechumet.

₆Wet elh tä õlesaynekwo tä lhey Semaías tä Natanael lhäs wet häpe Leví lhayis elh, häp tä ilesayen lheyis sacerdotes tä ihi tä rey itayche. Wet iyhäj tä iyahin häpehen rey leniyatfwas, lhäy'e sacerdote Sadoc, lhäy'e Ahimelec tä Abiatar lhäs, lhäy'e sacerdotes tä niyatejen lepuhfwas, lhäy'e Leví lhayis tä niyatejen lepuhfwas. Wet õ'wo sorteaya'pe tä õ'tshupyenehen häp sacerdotes, wet täkwfwas tä itaye Eleazar leles tä lepes lheley yämlek õhw'enhathen, wet weihalha tä itaye Itamar leles yämlek õhw'enhathen.

_7-18Häp tähisna lhamel tä õ'tshupyenehen, tälhe elh tä ichun yäk elh tä veinticuatro: Joyarib, Jedaías, Harim, Seorim, Malquías, Mijamín, Cos, Abías, Jesúa, Secanías, Eliasib, Jaquim, Hupa, Jesebab, Bilga, Imer, Hezir, Pisés, Petahías, Hezequiel, Jaquín, Gamul, Delaías, wet Maazías.

₁₉Wet mälhyejtso p'ante tä õhw'entejchehen lechumet yämlek lhamel hich'ote Lhawuk Lew'et, mälhyej tä Lhawuk tä Israel laka Dios ifwenho p'ante lechätilis elh tä lhey Aarón tä ne'tek lhamel iwoye.

₂₀Häp tähisna iyhäj wichi tä tälhe letes p'ante Leví:

Subael lhäy'e Jehedías tä lhamel lechäti p'ante Amram.

₂₁Isías häpe elh tä thaläkw tä iyej lepuhfwas, tä lhamel lechäti p'ante Rehabías.

₂₂Selomot lhäy'e Jahat tä lhamel lechäti p'ante Ishar.

₂₃Hebrón leles elh tä ichun häpe Jerías, wet lech'inhis Amarías, Jahaziel, wet Jecamán.

₂₄Samir lajcha Micaías wet lechäti Uziel.

₂₅Micaías lech'inij Isías tä lhäs Zacarías.

₂₆Merari leles Mahli lhäy'e Musi, wet Jaazías. ₂₇Jaazías leles lheyis Soham, Zacur, Ibri.

_28-29Mahli leles Eleazar lhäy'e Cis. Eleazar leles tä hin'ol ihihit'a, mat Cis häp tä lhäs ihi, lhey Jerameel.

₃₀Musi leles Mahli, Eder, wet Jerimot.

Häp tähistso wichi tä tälhe Leví. ₃₁Häte lhamel iwo sorteaya'pe tä lhaiw'entejchehen, mälhyej lepuhfwas tä Aarón leles tä lepes lheley. Wet niyatey lhäy'e iyhäj tä nithänhäya hätet iwoye, õ'wo sorteaya'pe lhamel tä ihi tä rey David itayche. Wet iyhäj tä iyahin häpehen Sadoc, lhäy'e Ahimelec, lhäy'e sacerdotes tä niyatejen lepuhfwas, lhäy'e Leví lhayis tä niyatejen lepuhfwas.