1~Crón 23

₁Häp lewhäy tä thaläkw David wet wuj tä hich'ut p'ante, wet yen Israel laka reya lhäs Salomón. ₂Wet David ihutwek ilhokej niyatey tä ihi Israel, lhäy'e sacerdotes, lhäy'e Leví lhayis. ₃Wet õ'wo t'ufwahtesa Leví lhayis, elh weihalhapej tälhe tä hiw'en treinta nekchämis. Wet tä ilhokej, iche treinta y ocho mil (38.000) hin'ol. ₄Wet David itshupyenehen veinticuatro mil (24.000) tä iyej lhamel yämlek hich'ote Lhawuk lechumet tä ihi lham Lew'et, wet seis mil tä yen õkalelhthayajwosa lhäy'e tä lhamel yenlhi õlesaynhay. ₅Wet cuatro mil tä yen lepewosa yämlek lhamel t'uye lepelis, wet cuatro mil tä itshupyenehen yämlek lhamel iwujyenej Lhawuk häp músicas tä rey ne'tek õyenlhi. ₆Wet David hiw'enhathen lhamel, itihi tres. Iche lhamel tä tälhe Leví lhäs p'ante lhey Gersón, wet iyhäj tä tälhe Leví lhäs elh p'ante lhey Coat, wet iyhäj tä tälhe Leví lhäs elh p'ante lhey Merari.

₇Wet lhamel tä letes Gersón häpehen:

Gersón leles Ladán lhäy'e Simey.

₈Wet Ladán leles Jehiel tä häpe elh tä ichun, lhäy'e Zetam, lhäy'e Joel, tres lhamel.

₉Wet Simey leles Selomit, Haziel, lhäy'e Harán, tres lhamel.

Häp tähistso iyhäj kaniyatey tä tälhe Gersón lhäs Ladán.

₁₀Wet Simey leles ihi cuatro, lheyis Jahat, Ziza, Jeús, lhäy'e Bería. ₁₁Wet Jahat häp elh tä ichun, thaläkw, wet elh tä itaype häpe Ziza. Mat Jeús lhäy'e Bería tek wujpe leles tä lhamel hiw'en, wet häp tä õyäm weihalhahchä lechumyaj tä õyachaje lepuhfwas.

₁₂Wet lhamel tä letes Coat häpehen:

Coat leles tä ihi cuatro, lheyis Amram, Ishar, Hebrón, lhäy'e Uziel.

₁₃Wet Amram leles Aarón lhäy'e Moisés. Lhawuk itshupyene p'ante Aarón yämlek itetshan m'ayhay tä lhäy'e lhip tä t'amajchetes. Häte ne'tek iwun incienso tä ihi tä Lhawuk itayche, wet hich'ote Lhawuk lechumet wet t'alhepej chik itiyej wichi häp lakäpfwayaj tä is. _14-15Wet Dios lakawo Moisés leles lheyis Gersón, Eliezer, wet õyen häpeya Leví lhayis.

₁₆Häp Gersón lhäs tä lechunkatsek lhey Sebuel, ₁₇wet Eliezer lhäs tä weihalha lhey Rehabías. Wet wujpe Rehabías leles.

₁₈Ishar lhäs tä ichun lhey Selomit.

₁₉Hebrón lhäs tä ichun häpe Jerías, wet lech'inhis Amarías, Jahaziel, wet Jecamán.

₂₀Uziel leles häpehen Micaías lhäy'e Isías.

₂₁Wet lhamel tä letes Merari häpehen:

Merari leles Mahli lhäy'e Musi.

Wet Mahli leles Eleazar lhäy'e Cis.

₂₂Eleazar y'il p'ante wet newache leles tä hin'ol, telhame leles tsinhay. Wet lech'inhis tä Cis leles yen ch'efwasa lhamel.

₂₃Wet Musi leles ihi tres, lheyis Mahli, Eder, lhäy'e Jeremot.

₂₄Häp tähistso wichi tä iyhäj kaniyatey tä tälhe letes p'ante Leví, häp iyhäj tä lhalepuhfwas tä õ'wo t'ufwahtesa tä õ'toynhen lheyis, elh weihalhapej tälhe tä hiw'en veinte nekchämis. Häpe lhamel tä hich'ote Lhawuk lechumet tä ihi lham Lew'et.

₂₅Wet David yok:

–Häp Lhawuk tä Israel laka Dios hiw'enho letamsek laka wichi, wet lham yenla lew'eta Jerusalén yämlek tiyäj'attsiy. ₂₆Wet häp tä Leví lhayis nemla tilhäjlhi Lhawuk lewukwe tä carpa, lhäy'e m'ayhay tä õ'chumyenlhi tä ihi lew'et tä õn'okwiyej Lhawuk.

₂₇Mälhyejtso p'ante David lhämet tä ilepese tä ne'tek õ'wo t'ufwahtesa Leví lhayis tälhe tä hiw'en veinte nekchämis. Wet õ'woye t'at, ₂₈wet õne'tek lhamel hich'ote sacerdotes, häp lhamel tä tälhe letes p'ante Aarón tä lhamel hich'ote Lhawuk lechumet tä ihi Lew'et. Wet õt'uhyene Leví lhayis häp Lhawuk Lew'et lhipey tä i'alhotaje lhäy'e hupuy lech'oye, lhäy'e tä ilejthä m'ayhay tä õt'amajchetes, lhäy'e tä itetshan m'ayhay iyhäj tä õyen n'okhayajayej Dios tä ihi Lew'et. ₂₉Häte lhamel itetshan pan tä õt'amajchet tä i'pe mesa, lhäy'e harina tä wuj tä is tä õyen Lhawuk lew'ayhata, lhäy'e pan tä õp'okwey tä naj levadurayayej, lhäy'e lew'ayhat tä õ'tulelh, lhäy'e harina tä õ'waklhat, lhäy'e lewaylhahthis tä itetshanlä.

₃₀Häte lhamel ihi Lhawuk Lew'et yämlek lhamel hiw'enho gracias häp lham wet iwujyen, ilhokej ifwalas tä nech'e nat lhäy'e tä honaj, ₃₁lhäy'e ifwalas tä õyen n'okhayajayej Lhawuk häp tshäwet tä õ'wunho, häp ifwalas tä õt'elakw'et lhäy'e tä wel'a nech'ayek, lhäy'e tä õkäjyaj tä lhamya. Matche, õhw'entejchehen lhamel lechumtestso wet lhamel hich'otepej Lhawuk lechumet. ₃₂Õt'uhyene p'ante lhamel häp Lhawuk lewukwe tä carpa, lhäy'e häp lhip tä Lhamya tä Õt'amajchet. Wet tä paj p'ante lhamel hich'ote lepuhfwas tä tälhe letes p'ante Aarón tä lhamel hich'ote Lhawuk lechumet tä ihi Lew'et tä ihi Jerusalén.