Hin'ol tä t'uye Lhawuk Lew'et lepelis
1Häp tähisna lhamel tä t'uye Lhawuk Lew'et lepelis:
Häp wichi tä tälhe Leví leles p'ante lhey Coré lhayis, iche Meselemías tä lajcha Coré elh wet lechäti Ebiasaf. 2-3Wet Meselemías lhäs tä ichun lhey Zacarías, wet lech'inhis Jediael, Zebadías, Jatniel, Elam, Johanán, lhäy'e Elioenay.
4-5Obed-edom lhäs tä ichun lhey Semaías, wet lech'inhis Jozabad, Joa, Sacar, Natanael, Amiel, Isacar, lhäy'e Peultay. Ocho leles p'ante häp Obed-edom, tsi Dios wuj tä itiyej lakäpfwayaj.
6Häp Semaías tä Obed-edom lhäs hiw'en p'ante leles tä hin'ol. Häpe iyhäj kaniyatey tsi häpehen hin'ol tä wuj tä lahal ihi, wuj tä khajayhen. 7Lhamel lheyis Otni, Rafael, Obed, Elzabad, Elihú, lhäy'e Samaquías. Häpehen hin'ol tä lahal ihi. 8Häp ilhokej lhamelna tälhe Obed-edom, wet lhamel lhäy'e leles lhäy'e lepuhfwas häpe hin'ol tä lahal ihi, khajayhen wet ihanej tä hich'ote Dios lechumet. Wet ilhokej lhamel tä tälhe Obed-edom ihi sesenta y dos lhamel.
9Häp Meselemías leles lhäy'e lepuhfwas ihi dieciocho, ilhokej tä häpehen hin'ol tä wuj tä lahal ihi.
10Häp Hosa leles tä tälhe letes p'ante Merari, lhamel laka niyat häpe Simri. Tanej tä kahäpeya häp lhäs tä thaläkw, lajcha yen niyata. 11Wet elh tä itaype häpe Hilcías, wet elh tä ihänphä häpe Tebalías, wet elh tä ilepese häpe Zacarías. Häp Hosa leles lhäy'e lepuhfwas, tä ilhokej lhamel ihi p'ante trece.
12Häp ilhokej lhameltso tä lhaiw'entejchehen lechumyaj tä häpe lepewos. Häp niyatey lhäy'e lepuhfwas lhamel t'uye t'at Lhawuk Lew'et. 13Wet lhamel tä thänhäy, lhäy'e iyhäj tä nithänhäya, iwo sorteaya'pe tä itshupyen lhamehen lechumet yämlek lhamel t'uye lepe weihalhapej.
14Wet õ'tshupyene p'ante Selemías yämlek t'uye lepe tä tumej lhip tä ifwala tälhche. Wet lhäs Zacarías tä häpe õchufwenyajwo wet häpe hin'o tä lehusek ihi, lham tumej lhip tä tafwojhiye. 15Wet Obed-edom ihi lepe lhip tä tumej tapinhiye, wet leles lhamel häm t'uye hupuy tä õlhäk ihi tä ichufwi Lhawuk Lew'et. 16Wet Supim lhäy'e Hosa lhamel häm ihi lepe lhip tä ifwala itayche tä tumejlä lepe tä lhey Saleket, ihi n'äyij tä itay kaphä.
Wet lepewos lhaiw'entejchehen lechumyaj tä mälhyejna: 17Häp ilhokej ifwalas tä iche seis Leví lhayis tä lepewos tä lhamel ihi lhip tä ifwala tälhche, wet cuatro tä ihi lhip tä tumej tafwojhiye, wet häp cuatro tä ihi lhip tä tumej tapinhiye, wet cuatro lhamel tä t'uye hupuy tä õlhäk ihi, täkwfwaspej tä t'uye hupuy. 18Häp hup lhip tä tumej tä ifwala itayche, iche cuatro tä ihi n'äyij wet täkwfwas tä ihi häp hup lhip.
19Häpe lhameltso lepewos tä Leví lhayis tä tälhehen lechätilis p'ante lheyis Coré lhäy'e Merari. Wet mälhyej p'antetso tä õhw'entejchehen lechumyaj.
Häp Leví lhayis tä õt'uhyene m'ayhay tä õt'amajchetes tä ihi Lhawuk Lew'et
20Wet Leví lhayis iyhäj t'uye m'ayhay tä laha ihi tä ichufwi Dios Lew'et, lhäy'e hupuy tä õw'ayhtes tä õt'amajchetes ihi. 21-22Iyhäj lhamel häpe Jehiel leles, lhäy'e lech'inij Zetam leles, lhäy'e lech'inij elh Joel leles. Lhamel tälhe letes p'ante lhey Gersón, wet Jehiel lajcha lhey Ladán. Häpe t'at hin'oltso tä t'uye m'ayhay tä laha ihi lhäy'e kolhki tä ichufwi Lhawuk Lew'et.
23Hätej õt'uhyene m'ayhaytso häp wichi tä tälhehen lechätilis p'ante lheyis Amram, Ishar, Hebrón, lhäy'e Uziel. 24Wet elh tä laka niyat tä t'uye m'ayhay tä laha ihi häpe p'ante Sebuel, häpe elh tä lechätilis p'ante Moisés lhäy'e lhäs Gersón. 25Wet lepuhfwas häpehen Eliezer lhäs Rehabías, lhäy'e Rehabías lhäs Isaías, lhäy'e Isaías lhäs Joram, lhäy'e Joram lhäs Zicri, lhäy'e Zicri lhäs Selomit.
26Wet Selomit lhäy'e iyhäj tä lepuhfwas häpe lhamel tä t'uye ilhokej m'ayhay tä õt'amajchetes tä rey David t'amajej p'ante, lhäy'e iyhäj kaniyatey, lhäy'e sip'älis kaniyatey. 27Häpe p'ante m'ayhay tä lhamel ikalheji laka'tshayaj wet lhamel yen t'amajchetesayej Lhawuk yämlek hich'otyeneje häp lham Lew'et. 28Wet Selomit lhäy'e lepuhfwas häpe lhamel tä t'uye m'ayhaytso, hätej t'uye häp m'ayhay tä profeta Samuel yen p'ante t'amajchetesayej Lhawuk, lhäy'e rey Saúl tä Cis lhäs, lhäy'e Abner tä Ner lhäs, lhäy'e Joab tä Sarvia lhäs.
Iyhäj Leví lhayis lechumtes
29Häp hin'o tä lhey Kenanías lhäy'e leles tä lhamel lechäti p'ante lhey Ishar, häpe lhamel tä õyen õkalelhthayajwosa tä ihi Israel, lhäy'e tä lhamel yenlhi õlesaynhay. 30Wet häp hin'o tä lhey Hasabías lhäy'e lepuhfwas tä lhamel lechäti p'ante lhey Hebrón, häpe lhamel tä õne'tek itetshan ilhokej m'ayhay tä ihi Lhawuk lechumet, lhäy'e m'ayhay tä ihi rey lechumet, tä ihi Israel lhip tä tumej tewok Jordán lhip tä ifwala itayche. Lhamel ihi mil setecientos (1.700) hin'ol tä lahal ihi, wuj tä khajayhen.
31Ihi p'ante cuarenta nekchämis tä rey David ihi leniyatyaj, häpe tä õ'tetshan õlesaynhay, õt'ukwe lheyis häp hin'ol tä tälhe p'ante hin'o tä lhey Hebrón. Wet õhw'en tä iche lhamel tä lew'et Jazer tä ihi honhat tä Galaad tä lhamel häpehen hin'ol tä wuj tä lahal ihi, khajayhen t'at. Wet Hebrón lhayis lhamel laka niyat häpe Jerías, 32wet lham lhäy'e iyhäj kaniyatey, lahal ihi t'at lhamel, khajayhen. Iche p'ante dos mil setecientos (2.700) lhamel, wet rey David yachaje p'ante len'ohyaj lhamel yämlek itetshan wichi tä tälhe letetsel Rubén lhäy'e Gad, lhäy'e lechowej lhamel tä tälhe letes Manasés. Wet rey ne'tek lhamel itetshan ilhokej m'ayhay tä ihi Dios lechumet lhäy'e häp m'ayhay tä ihi rey lechumet.
