1~Crón 27

₁Häp lhamelna Israel lhayis, häp iyhäj kaniyatey, lhäy'e sip'älis kaniyatey, lhäy'e hin'ol tä hich'ote rey lechumet. Ilhokej lhamel tä veinticuatro milpej (24.000) tä lhaiw'entejchehen tä tiyäjopej lechumet iwel'apej ilhokej ifwalas yäk noj nekchäm.

₂Häp sip'älis tä ichun tä tiyäjo lechumet tä ihi iwel'a tä ichun, lhamel laka niyat häpe Jasobeam tä Zabdiel lhäs ₃tä tälhe letes p'ante lhey Fares. Lham tä itetshan ilhokej sip'älis kaniyatey tä ihi iwel'a tä ichun.

₄Häp sip'älis tä tiyäjo lechumet tä ihi iwel'a elh, lhamel laka niyat lhey Doday tä Ahoh lhayis elh, wet leniyatfwa lhey Miclot.

₅Häp sip'älis tä tiyäjo lechumet tä ihi iwel'a tres, lhamel laka niyat häpe Benaías tä Sacerdote tä Lhamya tä lhey Joyada tä lhäs. ₆Wet Benaías iyej p'ante iyhäj tä treinta tä khajayhen wet häpe lhamel laka niyat. Mat lhäs tä lhey Amisabad tä itetshan laka sip'älis.

₇Häp sip'älis tä tiyäjo lechumet tä ihi iwel'a tä cuatro, lhamel laka niyat häpe Asael, Joab tä lech'inij. Wet lhäs tä lhey Zebadías tä icheyäjo lew'et.

₈Häp sip'älis tä tiyäjo lechumet tä ihi iwel'a cinco, lhamel laka niyat häpe Samhut tä Izra lhayis elh.

₉Häp sip'älis tä tiyäjo lechumet tä ihi iwel'a seis, lhamel laka niyat häpe Ira, Iqués lhäs, tä tälhe Tekoa.

₁₀Häp sip'älis tä tiyäjo lechumet tä ihi iwel'a siete, lhamel laka niyat häpe Heles tä letes p'ante Efraín wet tälhe hupuy tä lhey N'oletnhawet.

₁₁Häp sip'älis tä tiyäjo lechumet tä ihi iwel'a ocho, lhamel laka niyat häpe Sibecay tä lew'et Husa wet tälhe hin'o p'ante lhey Zera.

₁₂Häp sip'älis tä tiyäjo lechumet tä ihi iwel'a nueve, lhamel laka niyat häpe Abiezer tä Anatot lhele tä letes p'ante Benjamín.

₁₃Häp sip'älis tä tiyäjo lechumet tä ihi iwel'a diez, lhamel laka niyat häpe Maharay tä tälhe hin'o p'ante lhey Zera wet lew'et häp hupuy tä lhey Nichätchä.

₁₄Häp sip'älis tä tiyäjo lechumet tä ihi iwel'a once, lhamel laka niyat häpe Benaías tä tälhe letes Efraín wet lew'et Piratón.

₁₅Häp sip'älis tä tiyäjo lechumet tä ihi iwel'a doce, lhamel laka niyat häpe Helday tä tälhe hin'o p'ante lhey Otoniel wet lew'et häp hupuy tä lhey Nichätchä.

₁₆Häp tähisna hin'ol tä len'ohyajay ihi tä tälhehen letetsel tä ihi doce:

Eliezer tä Zicri lhäs tä niyatej Rubén kawichi.

Sefatías tä Maaca lhäs tä niyatej Simeón kawichi.

₁₇Hasabías tä Kemuel lhäs tä niyatej Leví kawichi.

Sadoc tä tälhe lechäti p'ante Aarón.

₁₈Elihú tä David lechila tä tälhe Judá kawichi.

Omri tä Micael lhäs tä tälhe Isacar kawichi.

₁₉Ismaías tä Abdías lhäs tä tälhe Zabulón kawichi.

Jerimot tä Azriel lhäs tä tälhe Neftalí kawichi.

₂₀Oseas tä Azazías lhäs tä tälhe Efraín kawichi.

Joel tä Pedaías lhäs tä tälhe lechowej Manasés kawichi.

₂₁Ido tä Zacarías lhäs tä tälhe lechowej elh Manasés kawichi tä ihi Galaad.

Jaasiel tä Abner lhäs tä tälhe Benjamín kawichi.

₂₂Wet Azarel tä Jeroham lhäs tä tälhe Dan kawichi.

Häp tähistso hin'ol tä len'ohyajay ihi tä tälhehen letetsel tä ihi doce.

₂₃David tek iwo p'ante t'ufwahtesa wichi tä niw'ena veinte nekchämis, tsi Lhawuk tä lhämet p'ante tä yämla wujpe Israel lhayis, mälhnhiyejat iwoye katetsel tä ihi pule. ₂₄Tej tä Joab tä Sarvia lhäs iwo tesa tä iwo t'ufwahtesa wichi, mat tek noj tä yenlhi, tsi censo tumenej tä Lhawuk itiyej lewäk Israel. Häp tä tumenej tä newahi rey David lelesaynekhi.

₂₅Häp Azmavet tä Adiel lhäs, lham tä t'uye hupuy tä õlhäk ihi tä lewuk rey. Wet Jonatán tä Uzías lhäs lham tä itetshan õlhäkw'etes tä ihi iyhäj hupuy tä i'pe honhat, lhäy'e tä ihi honhat lhipey tä lepes.

₂₆Häp hin'o tä lhaitumtej tä itetshan chumhas, lhamel tä ichumyenthä honhates tä yachuyajw'etes, häpe Ezri tä Quelub lhäs. ₂₇Wet häp hin'o elh tä lhaitumtej tä t'uye häp uvas lhiley häpe Simey tä Ramat lhele. Wet häp hin'o elh tä itetshan iyhäj tä ilanhi uvas tä ihäne lehis tä õyene hat'es, häpe Zabdi tä Sefam lhele. ₂₈Wet häp hin'o elh tä lhaitumtej tä t'uye häp olivos lhiley lhäy'e higos lhiley tä ihi honhat tä w'awulhchä, häpe Ba'al-hanán tä honhat tä lhey N'olafwek tä lhele. Wet Joás häpe tä itetshan aceite tä ihiche lehis.

₂₉Wet häp hin'o elh tä t'uye w'asetas tä t'ekthä tä ihi Sarón häpe Sitray tä lew'et Sarón. Wet hin'o elh tä t'uye w'asetas tä ihi häp chenhas kawayhil häpe Safat tä Adlay lhäs. ₃₀Wet häp hin'o elh tä t'uye camellos häpe Obil, häpe Ismael lhayis elh. Wet hin'o elh tä t'uye häp asnolis häpe Jehedías tä Meronot lhele. ₃₁Wet häp hin'o elh tä t'uye tson'atas häpe Jaziz tä Agar lhayis elh.

Ilhokej lhameltso tä hich'ote p'ante rey David, wet lhamel tä itetshan wet t'uye David lakäywet.

₃₂David lewithok tä lhey Jonatán häpe hin'o tä lehusek ihi wet õlesaynekwo, wet häpe hin'o tä ichufwenlhi rey. Wet Jehiel tä Hacmoni lhäs häpe tä ichufwenhen p'ante rey leles. ₃₃Häte Ahitofel häpe hin'o tä ichufwenlhi rey David, wet Husay tä Arak lhayis elh häpe hin'o tä rey David wuj tä ichaye p'ante. ₃₄Wet Joyada tä Benaías lhäs, lhäy'e Abiatar, häpe lhamel tä icheyäjo p'ante Ahitofel lew'et. Wet Joab häpe rey kasip'älis kaniyat.