Wichi yachaje lew'ayhat Lhawuk Lew'et
1Rey David tahuyej ilhokej wichi tä lhaihutwek, wet ifwenho tä yok:
–Häp olhäs Salomón, ts'ilak lham tä Dios itshupiye. Häpe elh tä manse, kamaj häpe elh tä nithaläkwa. Mat wuj häp õchumyaj tä iche, tsi hup tä yenlalhi häpkhit'a hin'o tä lew'et mat Lhawuk Dios tä Lew'et. 2Tä mälhyejtso, olham wuj tä olhaikhajyenej yämlek owaklhat m'ak tä õ'watejlä oka Dios Lew'et: häp oro, plata, bronce, chinhas, lhäy'e hal'äy, häp m'ak tä õ'watejlä m'ak weihalhapej tä õyenlhi. Häte owaklhat ilhokej tuntey tä isis, lhäy'e tuntey tä lepiyhi, lhäy'e tuntey tä lhäy ihi, tuntey tä chalajen, tuntey tä w'enhahiche, wujpe tuntey, lhäy'e mármol tä häpe tuntey tä talesay. 3Matche, häpe tähistso m'ak tä pajche owaklhatej oka Dios Lew'et. Wet tä wuj ohumnhayaj tä otiyej oka Dios Lew'et, wet häp tä othatlä tä oyachaje häp oro lhäy'e plata, m'ak tä olham tä olewuk tä ow'enho häp Lhawuk Lew'et: 4cien mil (100.000) kilos häp oro tä lhäy'e lhip tä isilataj tä ow'enho, lhäy'e doscientos treinta mil (230.000) kilos plata tä wuj tä isilataj. Ilhokej tähistso tä ow'enho yämlek õhp'oyejpe hup lhipey, 5häte lewos isej tä yenejlhi ilhokej m'ayhay tä laha ihi. Wet athana, ¿atsihila elh chik häpe chik ihuminche chik yachaje lew'ayhat häp Lhawuk ifwalana?
6Wet wichi tä len'ohyajay ihi tä tälhehen letetsel tä ihi doce, lhamel hiw'enho lew'ayhat Lhawuk, lhäy'e wichi kaniyatey iyhäj, lhäy'e sip'älis kaniyatey, lhäy'e hin'ol tä itetshan rey lechumet. 7Wet lhamel hiw'enho yämlek ithatho õchumyaj tä ihi Dios Lew'et, ciento sesenta y cinco mil (165.000) kilos oro, lhäy'e diez mil (10.000) monedas tä oro, lhäy'e trescientos treinta mil (330.000) kilos plata, wet ichäte t'at seiscientos mil (600.000) kilos bronce, lhäy'e tres millones trescientos mil (3.300.000) kilos chinaj.
8Häte ilhokej lhamel tä hiw'en tuntey tä isis tä lhamel hiw'enho p'ante elh tä itetshan Lhawuk Lew'et tä t'uye m'ayhay, häpe hin'o tä lhey Jehiel tä letes p'ante häpe Gersón.
9Häp ilhokej wichi tä käjejlhi m'ak tä ische tä lhamel iwoye tä lhamel hiw'enho ilhokej m'ayhayna häp Lhawuk, tsi is alhoho lhamel letichunhayaj. Hätej p'ante rey David wuj tä käjlhi.
David iwujyen Lhawuk
10Wet David iwujyen Lhawuk tä ihi tä ilhokej wichi tä lhaihutwek. Wet yok:
“¡Owunit Lhawuk yämlek tiyäj'attsiy,
häp lhates Israel laka Dios!
11Iwuk, am tä awujyaj ihi,
lhäy'e akhajyhayaj, lhäy'e asilatyaj,
lhäy'e han'ohyaj, lhäy'e aniyatyaj.
Tsi Alewuk ilhokej m'ayhay tä ihi pule
lhäy'e m'ayhay tä ihonhate.
Häte Alewuk häp aniyatyaj,
tsi am, Iwuk, lenu'pe ilhokej.
12Wet hin'o lakäywet lhäy'e len'ohyaj tälh ame,
wet am tä aniyatej ilhokej m'ayhay.
Akhajyhayaj ihi, lhäy'e awujyaj,
yämlek lewujyen wet lekhajyen ilhokej wichi.
13Wet athana, ika Dios,
olhamel ow'en amho oka gracias
wet oaiwujyen tä asilatyaj ihi.
14“Wet ¿atsi tä ohäpe olham wet atsi tä häpe oka wichi tä olhamel okalhi tä ow'en amho wujpe m'ayhay? Tsi kalelhäj tä Alewuk ilhokej m'ayhay, wet m'ak tä olhamel ow'en amho häp tä tälh ame. 15Tsi lehanej tä olhamel ohätet iwoye iyhäj tä inukwe honhat tä kalew'eta, hätet iwoye olhamel otetsel p'ante. Wet olhamel oka ifwalas tä oi'pe honhat hätet iwoye hupel tä nit'una, tä naj lenihayaja.
16“Iwuk tä ahäpe olhamel oka Dios, Alewuk wet tälh ame ilhokej m'ayhay tä laha ihi tä olhamel owaklhat yämlek oyenlhi Haw'et tä amajchet. 17Olham ohanej, ika Dios, tä am letetshan m'ak tä ihi hin'o letichunhayaj wet lehuminche m'ak tä is alhoho. Häp tä tumenej tä oyäm is alhoho otichunhayaj tä ow'en amho ilhokej m'ayhayna. Wet athana okäjlhi tä ow'en aka wichi tä lhamel lhaihutwek kana tä wuj tä lakäjyaj ihi tä lhamel hiw'en amho awayhat. 18Iwuk tä Abraham laka Dios, wet Isaac laka Dios, wet Israel laka Dios, tä lhamel häpe olhamel otetsel, amajej aka wichi. Is chik nileyayej tä yäm is alhoho letichunhayajay lhäy'e lenech'ethayajay, wet is chik iwopej lehuseya atape. 19Häte is chik lew'enho olhäs Salomón letichunhayaj tä matche tä is alhoho yämlek iwoye ilhokej ämtes lhäy'e achufwenyajay, wet yen lechumyaja yämlek ikalhi tä yenlhi Haw'et tä olham pajchenaj owaklhatej.”
20Wet David ifwenho ilhokej wichi tä lhaihutwek wet yok:
–Athana lhek wujyenay Lhawuk Dios.
Wet ilhokej wichi tä lhamel iwujyen Lhawuk tä lhamel letetsel laka Dios. Wet t'upichehchä yäk letachol ihi honhat tä lhamel ihi tä Lhawuk itayche lhäy'e tä ihi tä rey itayche.
Salomón tiyäjo leniyatyaj
21Tä ifwala elh wichi hiw'enho lew'ayhat Lhawuk tshäwet tä õ'länhen lhäy'e tshäwet tä õ'wunhomche: mil w'asetaj les, mil tson'atas, lhäy'e mil tson'ataj les. Wet lhamel ithatlä tä ichäj lew'ayhat hat'es lhäy'e wujpe lew'ayhtes tä tälhe ilhokej Israel lhayis. 22Wet ifwalatso lhamel t'ekhen wet iyä, wet wuj tä lakäjyaj ihi tä lhamel ihi tä Lhawuk itayche. Wet yachajo tä lhamel itshupyene Salomón tä David lhäs yämlek lhamel yene rey. Wet lhamel itsäype lhetek aceite tä lhamel ihi tä Lhawuk itayche yämlek häpe lhamel laka niyat. Wet häte Sadoc tä lhamel itshupyene tä lhamel yen sacerdoteya.
23Mälhyej p'antetso tä Salomón tiyäjo Lhawuk leniyatyaj yämlek häpe rey tä icheyäjo lajcha David lew'et. Wet wuj tä is alhoho wet ilhokej Israel tä hich'ahuye. 24Wet ilhokej häp niyatey, lhäy'e õka'tshayajwos, lhäy'e ilhokej rey David leles, tä lhamel yen lewuka rey Salomón. 25Wet Lhawuk iwujyen p'ante Salomón tä hiw'enho len'ohyaj wet yäm is alhoho yämlek ilhokej Israel tä hiw'en. Wet hiw'enho leniyatyaj tä isilataj, wet newache p'ante elh rey tä häte iwoye Salomón tä ihi Israel.
David ileyej honhat
26-27David tä Isaí lhäs cuarenta nekchämis tä leniyatyaj ihi ilhokej Israel. Häp siete nekchämis tä ihi Hebrón wet treinta y tres nekchämis tä ihi Jerusalén. 28Wet wuj tä thaläkw tä y'il. Häpe p'ante hin'o tä wichi iwujyen wet wuj lakäywet. Wet lhäs Salomón tä icheyäjo leniyatyajw'et.
29Wet ilhokej m'ak tä rey David iwoye, tälhe m'ak tä ichun tä iwoye yäk ilepese, ihi t'at õlesaynekhis tä yäme häp profetas Samuel, Natán lhäy'e Gad. 30Häp õlesaynhaytso yäme häp m'ak tä David iwoye tä ihi leniyatyaj, lhäy'e lakhajyhayaj, lhäy'e m'ayhay tä õ'woyeje lham, lhäy'e m'ayhay tä õ'woyeje Israel lhäy'e ilhokej honhates iyhäj.
