David ifwenho niyatey tä häpe lhäs Salomón tä yenlalhi Lhawuk Lew'et
1Rey David t'änehen p'ante ilhokej Israel lhayis tä len'ohyajay ihi yämlek lhaihutwek tä ihi Jerusalén. T'änehen häp hin'ol tä len'ohyajay ihi tä tälhehen letetsel tä ihi doce. Häte t'änehen häp sip'älis kaniyatey tä hich'ote rey, lhäy'e hin'ol tä itetshan rey laka honhates lhäy'e leläy, lhäy'e tä itetshan rey leles kahonhates lhäy'e leläy, lhäy'e häp iyhäj tä ichumhilhi rey lew'et, lhäy'e sip'älis tä lhamenya.
2Wet rey David ikasitphä wet yok:
–Ch'ahuyay n'oye, häp amel tä ahäpe oka wichi wet oalepuhfwas. Olham otichunhayajte tä owatlä tä oyenlhi Arca tä Õt'amajchet tä Lhawuk lhämtes lehi Lew'et, yämlek telhame tä Lew'et ihi Lhawuk Dios. Wet pajche owaklhat m'ayhay yämlek oyenlhi. 3Mat Dios ifwen n'oho tä yok, “Kha, am tek lhenlalhi Ow'et. Tsi am ahäpe hin'o tä õka'tshayajwo wet wuj w'oyis tä letsäy.”
4“Mat Lhawuk tä Israel laka Dios itshupihte n'oye tä oiyej ilhokej opuhfwas yämlek yen n'oye Israel laka rey yämlek tiyäj'attsiy. Tsi itshupiye p'ante Judá lhayis yämlek häpe iyhäj kaniyatey, wet tälhe Judá lhayis tä itshupiye opuhfwas. Wet tä oiyej opuhfwas, Lhawuk ihuminche yämlek olham ohäpe rey tä i'pe ilhokej Israel. 5Wet wujpe oles tä hiw'en n'oho, wet itshupiye olhäs elh tä lhey Salomón yämlek häpe niyat tä ihi Lhawuk leniyatyaj tä i'pe Israel.
6“Häte Lhawuk ifwen n'oho tä yok, Häp äs Salomón lham tä yenlalhi Ow'et lhäy'e lhip tä i'alhotaje. Tsi olham tä otshupiye yämlek häpe olhäs, wet olham ohäpkhila häp lajcha. 7Wet oyämla kalelhäj leniyatyaj tä t'un yämlek tiyäj'attsiy, chik lham tujlhache tä lhaikhajyen tä iwoye olhämtes lhäy'e ochufwenyajay, mälhyej tä iwoye yäk fwalasna.
8“Athana, yaiyhäj, mälhyej tä y'ehi tä ilhokej Israel lhayis itayche, lhäy'e Lhawuk Dios laka wichina tä lhaihutwek, lhäy'e lham tä ilät n'amehen, wet tä mälhyejtso, amajej wet woyaye ilhokej Lhawuk Dios lhämtes, yämlek kamaj alewuhuy honhat tä isna tä lheyayhi, wet yämlek amel len'äyhiyeja ales wet lhamel tä lhayenla lewuhuya honhatna, wet telhamhiyela tä lhamel ihi yämlek tiyäj'attsiy.
9“Wet am, yäs Salomón, tichunche lhaka Dios wet en Awuka imälhewek ahusek lhäy'e imälhewek atichunhayaj. Äm is alhoho ilhokej m'ak tä lewoye, tsi Lhawuk ihanej ilhokej hin'o letichunhayaj, wet häte ihanej ilhokej hin'o lenech'ethayaj lhäy'e m'ak tä t'uhläk iwoye. Chik am let'ukwe häp lham, wet lelhokhiyela. Mat chik leleyej, wet lham aitihiyeja kanhi yämlek tiyäj'attsiy.
10“Athana lhek yahinya, häp Lhawuk itshupi ame yämlek am tä lhenlhi Lew'et tä T'amajchet. Tä mälhyejtso, akhajyen tä lhenlhi.”
David yachaje Salomón õchumyaj häp m'ak tä mälhyej tä yenlalhi Lhawuk Lew'et
11Wet David yachaje lhäs Salomón õchumyaj häp m'ak tä mälhyej tä yenlalhi Lhawuk Lew'et, lhäy'e lech'o tä ihi lepe, lhäy'e hupuy tä õlhäkw'etes, lhäy'e lhipey tä ilech'oye tä tumphä lhäy'e tä ikaphä, lhäy'e häp lhip tä Lhamya tä Õt'amajchet tä Lhawuk itäyhat wichi lesukyajay. 12Häte yachaje ilhokej õchumyaj tä yen letichunhayaja yämlek yenlhi Lhawuk Lew'et lhipey tä i'alhotaje, lhäy'e lew'etch'ol tä ichehen lhipey, lhäy'e m'ayhay tä laha ihi lew'etes, lhäy'e m'ayhay tä õt'amajchetes lew'etes, 13lhäy'e sacerdotes lew'etch'ol lhäy'e Leví lhayis lew'etch'ol tä lhamel ichufwi yämlek iwoye ilhokej lechumyaj tä ichufwi Lhawuk Lew'et, lhäy'e ilhokej m'ayhay tä õ'chumyenthä tä õn'okwiyej Lhawuk tä ichufwi Lew'et.
14Häte hiw'enho wuj oro lhäy'e plata, m'ak tä naya yämlek õyeneje ilhokej m'ayhay tä õ'chumyenthä tä õn'okwiyej Lhawuk. 15Hätet iwoye tä hiw'enho wuj oro lhäy'e plata tä naya yämlek õyene õchäkwhis lhäy'e lechäkwis, yämlek w'awulho häp m'ak tä õyene elh weihalhapej. 16Häte hiw'enho wuj oro yämlek õyen mesasa tä õ'ti'pe pan tä õt'amajchet, lhäy'e plata tä naya yämlek õyen mesasa. 17Häte hiw'enho oro tä ts'ilak yämlek õyene õlhäkchal tenedores, lhäy'e õlhäthis tä wus lhäy'e tä niwusa. Wet hiw'enho oro tä naya lhäy'e plata tä naya yämlek õyene copas, mälhyej elh weihalhapej tä choyhat. 18Häte hiw'enho wuj oro tä isilataj yämlek õyene altar, incienso tä õ'wunej tä lew'et. Hätet iwoye tä hiw'enho oro yämlek õyenlhi kaletaj tä m'ayhay tä lhefwis ihi tä i'pe, wet lhamel hich'enchephä lhefwis yäk hip'o'pe Arca tä Lhawuk lhämtes ihi.
19Wet David yok:
–Ilhokej tähisna tä Lhawuk ilesayen tä ipäyen n'oye yämlek y'ithat n'oho ilhokej õchumyaj, m'ak tä mälhyej ilhokej tä ihi lelesaynek tä ne'tek õyenlhi.
20Wet David tahuyej lhäs Salomón tä yok:
–Akhajyen, otle t'unhat, wet enlhi achumet. Yej noway wet yej t'ayhatchä akhajyhayaj, tsi Lhawuk Dios tä olham oka Dios ihla amej. Häp lham ilehit'ala amej wet tek aiwomlame yämlek noj ilhokej achumyaj tä lhenlhi Lew'et. 21Wet ikana sacerdotes lhäy'e Leví lhayis, lhamel wak'alh tä hich'othiyela ilhokej õchumyaj tä ihi Dios Lew'et. Häte ihichela wichi tä wuj tä ihanej iwoyneje tä yenthä m'ayhay, lhamel hich'otla ame tä yenlalhi lechumtes tä w'enhahiche. Wet niyatey lhäy'e ilhokej wichi tä hich'ahuhila ame.
