Wichi tä tälhe p'ante letes Judá
1Judá leles tä hin'ol häpehen p'ante Fares, Hesrón, Carmi, Hur, lhäy'e Sobal. 2Wet Sobal lhäs Reaías häpe p'ante Jahat lajcha, wet Jahat leles häpehen p'ante Ahumay lhäy'e Lahad. Wet wichi tä tälhehen lhamel yen p'ante lew'eta Sora.
3-4Hin'o tä lhey Caleb yen p'ante lech'efwaya atsinha tä lhey Efrata, wet lhamel lhäs tä lechunkatsek lhey Hur. Wet Hur leles tä hin'ol häpehen Etam, Jezreel, Isma, Idbas, Penuel, lhäy'e Eser, wet lhäse lhey Haslelponi. Penuel häpe p'ante Gedor lajcha, wet Eser häpe p'ante Husa lajcha. Wet häte Hur häpe hin'o tä lhey Belén letes.
5Häp Tekoa lajcha tä lhey Asur täkwfwas lech'efwas, lhamel lheyis Hela, Naara. 6Wet Asur leles tä ihihlä Naara lhamel lheyis Ahuzam, Hefer, Temeni, Ahastari. Naara häpe t'at lhamel lako. 7Wet Asur leles tä ihihlä Hela lhamel lheyis Seret, Jesohar, Etnán.
8Hin'o tä lhey p'ante Cos, leles lheyis Anub, Sobeba. Wet Cos häpe letes häp wichi tä tälhe Harum lhäs Aharhel.
9Wet hin'o tä lhey Jabés häpe elh tä lhäy'e lhip tä len'ohyaj ihi, inu'pe lepuhfwas iyhäj. Wet lako yen lheya Jabés, tsi yok:
–Matche tä äytaji tä ow'en olhäs.
(Häp õlhey Jabés yiwitej õlhämet tä yok, Äytaji.)
10Wet Jabés t'änch'oye Israel laka Dios wet yok:
–Olhaip'altsen ame chik lew'en n'oho akäpfwayaj tä is, lhäy'e ow'et honhat tä tsajphä. Wet ch'ot n'oye, fwayhat n'oyej m'ak tä ni'isa yämlek najit owit'äya.
Wet Dios hiw'enho m'ak tä t'alhe.
11Häp Súa lech'inij tä lhey Kelub häpe p'ante Mehír lajcha, wet Mehír häpe p'ante Estón lajcha. 12Estón leles häpehen Bet-rafa, Paseah, lhäy'e Tehina, häp lham tä yenlhi p'ante hupuy tä lhey Nahas. Lhamel yen lew'eta honhat lhip tä lhey Reca.
13-14Kenaz leles p'ante lheyis Otoniel lhäy'e Seraías. Wet Otoniel leles häpehen p'ante Hatat lhäy'e Meonotay tä häpe Ofra lajcha. Seraías lhäs häpe Joab, wet wichi tä tälhe p'ante Joab lhamel yen lew'eta honhat lhip tä chenhas kawayhi yämlek yenlhi lechumet, tsi wuj tä ihanej tä yenlhi m'ayhay.
15Caleb häpe p'ante Jefone lhäs, wet leles häpehen Irú, Ela, lhäy'e Naam. Ela häpe p'ante Kenaz lajcha.
16Jahaleel leles häpehen p'ante Zif, Zifa, Tirías, lhäy'e Asarel.
17-18Esdras leles p'ante lheyis Jeter, Mered, Efer, lhäy'e Jalón. Mered yen ch'efwaya Egipto kaniyat lhäse tä lhey Bitia, wet lhamel leles lheyis Miriam, Samay, lhäy'e Isba tä häpe Estemoa lajcha. Häte Mered iyej p'ante atsinha tä tälhe Judá kawichi. Tä iwo lelesahlä, wet yen lheyisa Jered, Heber, Jecutiel. Jered häpe p'ante Gedor lajcha, wet Heber häpe p'ante Soco lajcha, wet Jecutiel häpe p'ante Zanoa lajcha.
19Häp hin'o tä lhey p'ante Hodías yen ch'efwaya atsinha tä lechila häpe Naham, häp Keila lajcha. Wet lhamel leles lheyis Dalia tä häpe Garam lhele lhäy'e Estemoa tä häpe Maaca lhele.
20Häp Simón leles p'ante lheyis Amnón, Rina, Ben-hanán, lhäy'e Tilón.
Wet Yisí leles p'ante lheyis Zohet lhäy'e Ben-zohet.
Wichi tä tälhe p'ante Judá lhäs Sela
21Wet Judá lhäs tä lhey Sela, leles häpehen Er tä Leca lajcha lhäy'e Lada tä Maresa lajcha. Häte wichi tä yen p'ante lechumyaja lino tä ihi Bet-asbea, lhamel tälhe t'at Sela. 22Wet iyhäj Sela leles häpehen Joaquim, lhäy'e hin'ol tä Cozeba lheley, Joás lhäy'e Saraf, tä lhamel yen ch'efwasa atsinhay tä Moab lhayis wet yäple p'ante Belén. Mälhyejtso tä ihi õlesaynekhi tä pajche. 23Häp lhameltso häpe iyhät tä lewos. Lew'et p'ante Netaim lhäy'e häp lhip tä lhey N'olafwek. Wet lhamel iwhäye rey lew'et wet hich'ote.
Wichi tä tälhe p'ante letes Simeón
24Simeón leles p'ante lheyis Nemuel, Jamín, Jarib, Zera, lhäy'e Saúl. 25Saúl häpe p'ante Salum lajcha, wet Salum häpe p'ante Mibsam lajcha, wet Mibsam häpe p'ante Mismá lajcha. 26Mismá häpe p'ante Hamuel lajcha, wet Hamuel häpe p'ante Zacur lajcha, wet Zacur häpe p'ante Simey lajcha. 27Wet Simey hiw'en dieciséis leles tä hin'ol lhäy'e seis leles tsinhay. Mat lepuhfwas tek wujpe leles tä hiw'en wet tek lhayäm wujpe laka wichi, tek mälhyej Judá kawichi. 28Wet lhamel lew'etes p'ante Beerseba, Molada, M'awow'et, 29Bilja, N'otkhajay, Tolad, 30Betuel, N'otäyhyaj, Siklag, 31Kaletasw'et, Yel'atasw'etes, Bet-biray, lhäy'e Lepelis. Häpe p'ante honhatesna tä lhamel laka honhates yäk ichäte tä David ihi leniyatyaj. 32Wet lhamel hiw'en p'ante cinco honhates iyhäj tä niwusa tä häpehen Etam, N'opek, Rimón, Token, lhäy'e Tutsey, 33lhäy'e ilhokej wichi lew'etes tä tott'ahomche yäk ichäte lhip tä lhey Lewuk Tsinha. Häpe lhipeytso tä lhamel lew'etes p'ante, lhäy'e tä õ'lesaynhen lheyis lepuhfwas.
34-38Wichi tä lheyis ihi täja lhamel häpehen iyhäj kaniyatey:
Mesobab, Jamlec, Josías tä häpe Amasías lhäs
Joel, Jehú tä lajcha häpe Josibías wet lechätilis Seraías lhäy'e Asiel
Elioenay, Jaacoba, Jesohaías, Asaías,
Adiel, Jesimiel, Benaías, lhäy'e Ziza.
Ziza lajcha häpe p'ante Sifi, wet lechätilis häpehen Alón, Jedaías, Simri, lhäy'e Semaías. Häp lhameltso tä õ'wo lheyisa häpe iyhäj kaniyatey. Wet lepuhfwas lhayäm wujpe, 39yäk lhamel ichäte honhat lhip tä tumejlä hupuy tä lhey Gerar lhip tä ifwala tälhche tä lhamel t'ukwe leläy tshätäy lhäk. 40Wet lhamel ilhoke tayhi tä isilataj tä wujpe leläy lhäk tä naya, lhäy'e honhat tä tsajphä, letamsek ihi. Häp ifwalas tä pajche Cam lhayis tä lew'et p'ante. 41Mat häpe lewhäy tä Ezequías häpe Judá laka rey, nämhen lhamel tä õ'wo lheyisa wet itäyhthen Cam lhayis yäk nofwej. Wet iwasthiche lewukwey wet nech'e yen lew'eta honhattso, tsi leläy tshätäy lhäk ihi. 42Wet quinientos iyhäj hin'ol tä Simeón leles tä lhamel ihoye chenaj tä Seír. Pelatías tä yikchufwi p'ante lhamel, lhäy'e Nearías, Refaías, lhäy'e Uziel, tä lhamel häpehen Yisí leles. 43Wet lhamel ilänhen Amalek lhayis tä imälhehi p'ante yäk nofwej. Wet tälhe lewhäytso tä lhamel yen lew'eta yäk häp ifwalasna.
