1~Cor 4

₁Tä mälhyejtso, tajlhama enay at n'oyehen tä ohäpehen Cristo lakawos, häp hin'ol tä Dios yenn'o lewosa yämlek ochufwenej wichi m'ayhay tä nin'äla tä lham t'uhläk iwoye. ₂Elh che häpe che tachuma lechumet tä lewuk ne'tek iwoye, iwohiyet'ak nin'älita tä häpe elh tä t'ifwtiyej lewuk wet yäm is alhoho lechumet. ₃Wet olham, tej che amel leti n'oyej akalelhthayaj tä elhpej yok, “Isit'a Pablo”, wok wichi iyhäj tä i'pe honhat ikalelhätn'o, oyenhit'a lhakliya. Wet häte olham tek olhaikalelhät. ₄Tej tä newache m'ak tä ni'isa che olhayen chowejayej, oyämhit'a lhame che ofwetaj o'isyaj ihi. Tsi elh tä ikalelhätn'o häpe t'at Lhawuk. ₅Tä mälhyejtso, yej wo akalelhthayajayej m'ak at che häpe tä kamaj ninäma lewhäy tä häpe ifwala che Lhawuk näm. Tsi lhamlak itihi isi m'ayhay tä õ'iskathen tä ihi honatsi, wet hin'älthila wichi letichunhayajay tä ihiche lehusey. Wet nech'e häpkhilek Dios hiw'enho elhpej lewujyaj tä t'uhawetej.

₆Ipuhfwas, oyämej amehen m'ayhayna tä oyäme Apolos wet äp oyäm lhame, häpkhilek amel aisej wet tek alenuhatay w'echehi m'ak tä pajche õ'lesayen, wet äp newache elh amel che lhaichäjejlhi lechufwenyajwo elh wet yen w'et m'ayeka elh. ₇Tsi ¿hä lefwetaj lenu'pe iyhäj? ¿Mat atsi m'ak tä i'amejen tä nitälhaye Dios? Oyok, Dios t'at tä hiw'en amhohen nilhokej m'ayhay. Tä mälhyejtso, ¿chipte tä alechäjejlhi hätet iwoyek ka'awayhata?

₈¡N'älej tä ahäpehen wichi tä hiw'en m'ayek, tsi i'amejen nilhokej m'ayhay tä lewatlä! ¡Wet aletech'aynej niyatey wet tek lewatlä olhamel och'otyaj! ¡Istajyak matchek ahäpehen niyatey, wet olhamel olhamtej oniyatejen aniyatyaj! ₉Tsi oyenek olhamel tä ohäpehen apóstoles, Dios iti n'ohihen tä w'et om'ayhay t'at, hätet iwoyek n'olänhay, wet nilhokej wichi tä i'pe honhat, lhäy'e ángeles, lhamel iyahin t'at owit'äyhyaj. ₁₀Olhamel olhaich'isukyenhenpe Cristo, mat amel lefwetaj ahäpehen Cristo laka wichi tä ihanche m'akejen. Olhamel tek otkhajayhen, mat amel lefwetaj atkhajayhen. Wichi yenn'o w'et m'ayhaya, mat amel ayen niyateya. ₁₁Yäk häp fwalana ichepej tä nehläs ilänhen olhamel, ochimhen, wet najit ow'uya. Wichi ipäjpej n'owethä, ow'et kalelhäjit'a, ₁₂wet oy'enhen tä otchumpejwethä yämthilek ichepej m'ak tä oisej. Tä wichi iläkwethä olhamel, onchulhejpejlä olhämtes tä isen. Tä lhamel itipej n'oyejen laka'tshayajay, oteläytej t'at, ₁₃wet tä isitäyen n'ohen, owoyeje op'altsenyaj. Õyen at n'oyehen wichi laka basura, m'ak tä lhamel ikokyene, wet mälhyejpejtso yäk nämena.

₁₄Ofwel amhohen m'ayhaytso, häpkhit'a che on'äfwlhatwethä amejen, mat ot'uhläk oaichufwenhen hätet iwoye oles, tsi ohumnhen amel. ₁₅Tsi tej che i'amejen wujpey lewos tä yämej amehen Cristo, mat wujit'a'pe iyhäj tä hätet iwoyek ajchalis. Mat olham t'at tä ohäpe amel ajcha, tsi ohänte amehen Dios Silätyaj tä Is yämthilek let'ekhaye Cristo Jesús. ₁₆Wet häp tä olhaip'altsen amehen, oyok, tenayn'o. ₁₇Häp tä tamenej tä ochen amehen Timoteo, tä hätet iwoyek olhäs tä afwtintsaj tä ohumnekej Lhawuk. Lham itichunyenla amchehen ochumyajay tä owoye tä onukwe Cristo Jesús len'äyij, mälhyej tä ochufwenejenpej Dios leles tä ihi lhip che häpe.

₁₈Athana iche iyhäj amel tä lhaichäjwethäpa, wet äp fwetaj n'am hohla amehenpa. ₁₉Mat oyok, che Lhawuk ihuminche, ot'isiyakayhla amehen thahya, häpkhilek ow'en lhamel tä lhaichäjwethä, che matche tä len'ohyajay ihi wok häpe iyhäj tä w'et ämtses t'at. ₂₀Tsi Dios Niyatyaj häpkhit'a n'olhämtes, mat häpe t'at n'okhajyhayaj tä tälhe Dios. ₂₁Tä mälhyejtso, ¿atsi m'ak tä let'uhläk ohän amehen - otasnhat, wok ohumnhayaj lhäy'e op'altsenyaj?