Pablo t'uhikwet'a m'ak tä t'uhawetej chik õhw'enho
1Lhek yahinya, olham ohäpe apóstol, ow'ente Lhawuk Jesús, wet häp lhay tä tälhe Lhawuk lechumet tä oyen chumeta häpe t'at amel. Wet tä ohäpe apóstol, oyok, t'uhawet n'oyej tä niwohit m'ak chik õn'äyej n'oho. 2Etp'i iche iyhäj tä yok, “Pablo khit'a apóstol”. Mat amel lehanej tä ohäpe t'at, tsi tä lechaye Lhawuk tä oyen silätyaja amejen, häp tä ikalelhät tä matche tä ohäpe apóstol.
3Häp täja olhämet tä onchulhejlä lhamel tä y'ithatlhin'o: 4oyok, ot'uhawetej t'at chik õhw'en n'oho m'ak chik otuj lhäy'e m'ak chik oyäyej, 5wet äp ot'uhawetej chik och'efwa ihi tä häpe Lhawuk leles elh wet oyen lhäy'eya chik olunlhi, mälhyej tä apóstoles iyhäj iwoye, mälhyej iwoye Pedro, lhäy'e tä Lhawuk Jesús lech'inhis iwoye. 6Wok ¿hä tajlhama olham lhäy'e Bernabé tä nit'uhawetayej chik wichi hiw'en n'ohohen m'ak chik oisej? 7Lhek yahinya, ¿hä iche sip'ä chik häpe tä lham t'at tä tiskanpe m'ak tä tuj? ¿Hä iche hin'o tä itihchä uva wet nitufwa lhay? ¿Hä iche elh tä t'uye tson'atas wet niyäyayej lakat'os? 8Täjtso yej fwetajay häpe m'ak tä olham otichunhayaj t'at, tsi Ley p'ante tälhe Moisés häte yäme täjtso. 9Iche lhip tä yok, “Yej wo t'aka lenhus häp weyis tä let'äsyenhi trigo.” Täjtso häpkhit'ak Dios yen lhakliya m'ak chik weyis isej, 10mat itech'aynej täjtso tä yen tichunhayaja tä is chik iche m'ak chik olhamel oisej. Tsi olhamel tä tamenej tä õ'lesayen p'ante Dios lhämettso, häp tä elh tä isaji honhat lhäy'e elh tä ilanhi trigo, ihanej t'at tä ihichela lakaha tä ikalhi tä tälho lechumet tä iwoye. 11Tä mälhyejtso, tä olhamel otutcheyej amhiche häp m'ak tä ahusey isej, ¿hä ni'isa alhoho chik lech'otyenej n'oyehen m'ak chik olhamel oisej? 12Tä iche iyhäj tä t'alhej amehen hach'otyaj, olhamel nem koyhyaj tä t'uhawet n'oyejen.
Mat olhamel ot'uhikwet'a täjtso, oteläytej t'at nilhokej m'ayhay. Tsi tek ot'uhläk iche elh chik nahayejlhi m'ak tä owatlä, mat ot'uhläk letamsek iyeji tä tach'ahuye Dios Silätyaj tä yämeje Cristo. 13Amel lehanej, häp hin'ol tä tach'ote lechumet tä ihi Dios Lew'et tä ihi Jerusalén, lhamel tuj t'at m'ak tä ihi. Wok oyok, häp lhamel tä t'uye altar, häp itshätäy tä õ'länhen lew'et, lhamel tuj t'at lhip itshäwet tä õhp'o tä ihi. 14Wet häp tä hätet iwoye täjtso, häp lhamel tä iwo silätayej wichi Dios Silätyaj tä Is, Lhawuk yok, “Is chik isej t'at m'ak tä tälho lechumettso.” 15Wet olham tej tä t'uhawet n'oyej täjtso, mat ihichet'ak otchuma. Äpte häpkhit'a tä ot'alhej amehen chik lew'en n'oho m'ayek wet tamenej tä oyäme m'ayhayna. Kha. ¡Otch'anlhaye t'at ot'ilek chik näm n'oye, mat häp m'ak tä olhaiwujyenej tä oyämetso tä n'am t'alhej amehen m'ayek, ihichet'ala elh chik ikalh n'ohi chik t'uhläk oleche täjtso!
16Tsi olhaiwujyenhit'a lhamej tä owo silätayej wichi häp Dios Silätyaj tä Is, mat oyok, häp täja ochumet tä iwohiyet'ak n'am woye. ¡Wet owit'äy ihi chik n'am nen silätyaja! 17Chik olhamhik onech'ethayaj tä owoye ochumetna, t'uhawethiyej chik okatej okaha. Mat tä Dios t'at tä t'ekhayej n'oye wet ilhuhyen n'oyej, 18¿atsi m'ak tä okaha? Oyok, häpe t'at okäjyaj tä n'am t'alhch'oye m'akfwaj tä owo silätayej wichi Dios Silätyaj. Wok oyok, tek otchumlä n'och'otyaj tä t'uhawet n'oyej chik wichi hich'otyenej n'oye tä ohäpe elh tä yen lhämeta Lhawuk lhämet.
19Nehit katsik lakwenekn'o, mat olhayen at häpeya elh tä hätet iwoye tä nilhokej wichi kwenek, yämthilek wujpe lhamel chik okalhi wet ichaye Cristo. 20Tä oiyej Judío lhayis, ohätet iwoye Judío, yämthilek okalhi lhamel. Wok oyok, tej tä nemhit oihi Ley p'ante tälhe Moisés, mat olhaitech'aynej elh tä kamaj ihi, yämthilek okalhi lhamel tä ihi. 21Wet tä ot'uhläk okalhi wichi tä kahäpeya Judío lhayis, häp lhamel tä Ley p'ante tälhe Moisés newayej, olhayen lhamel elha. Mat tä oiyej lhamel, häpkhit'a tä olhaitiyej kanhihlä Dios laka Ley, tsi ohäpe elh tä Cristo laka Ley kwenek. 22Wet häte tä oiyej lhamel tä lechayaj niwuja, olhaiw'awlhathi t'at lhamel, olhayen häpeya elh tä nitkhajaya, yämthilek okalhi lhamel.
Tä mälhyejtso, oyok, olhaitech'aynej t'at iyhäj chik häpe, yämthilek osakanej chik ofwayhat elhpej. 23Häp Dios Silätyaj tä Is, häp tä tamenej tä owoynejetso m'ak tä owoye, yämthilek olhamtej oisej Dios lakäpfwayajay tä isen tä tälhe.
24Amel lehanej, chik iyhäj yenlhi carrera wet nilhokej lhamel inukwe alhoho, mat tajlhama elh tä inu'pe iyhäj tä wuj tä iläfwel, häp tä ikalhi t'awayhat tä laha. Tä mälhyejtso, woynejetso m'ak tä lewoyaye hätet iwoyek lenukwe alhoho tä alekhajyenhen, häpkhilek lekalhi awayhat. 25Häte iwoye m'ak tä iyhäj iwoye yämthilek ikoyej n'okoyek chik häpe, lhamel t'amaj lhamejen wet tach'anlhahiyet'a m'ak chik t'isanis ikänlä. Iwoynejetso m'ak tä iwoye, tsi t'uhläk ikalhi wet õ'ti'pe lhetek häp t'awayhat tä laha tä häpe hal'ä w'oley tä yofwajkwet tatäy. Mat häp m'ak tä n'amel y'awoye, häpkhilek y'akalhi lhatw'ayhat tä nittäya.
26Olham Pablo, tä olhaikhajyen häpkhit'ak hätet iwoyek w'et onut alhoho. Wet tä owo ka'tshayaja, häpkhit'ak hätet iwoyek w'et onhäpäjlhi leyalh. 27Mat olhainhäpäjlhi t'at wet onityenej ot'isan yämthilek iwoye m'ak tä olham owoye. Tsi chik n'am woynejetso m'ak tä owoyej lhame, elat iyhäj isej Dios lhämtes tä owo silätayej lhamel, mat olham ottäy t'at.
