Espíritu tä tälhe Dios wet espíritu tä tälhe Cristo Letayhfwa
1Ipuhfwas tä oalehumnhay, yej chayaye elh che häpe tä yäm lhame tä Dios laka Espíritu ihi. Mat chunkat tä letetshan ayej, pajla'tha lew'en che m'ak tä ihi häpe t'at Dios laka Espíritu wok kahäpeya. Tsi wujpe hin'ol tä fwetaj häpehen Dios lhämetwos tä ilunpe honhat. 2¿Chip iwoye che y'ahanej ihi elh tä hiw'en Espíritu tä tälhe Dios? Oyok, häpe t'at elh che häpe che yok, “Jesús häpe N'ofwayhthi tä Dios Chenek tä lhayen p'ante hin'oya tä näm honhatena.” 3Mat elh che nimälhyayejtso lhämet hiw'enhit'a Dios laka Espíritu, mat Cristo Letayhfwa laka espíritu häp tä ihi. Pajche letoyenlä tä espíritutso nämla, wet oyok, athana ihi t'at honhat.
4Ilesas, amel ahäpehen Dios leles wet pajche lekalhayhi häp akantsestso. Tsi Elh tä i'amhihen lakhajyhayaj inu'pe elh tä ihi lhamel tä honhat leles. 5Akantsestso tälhe t'at honhat, häp tä tamenej tä lhämtes hätet iwoye honhat leles lhämtes, wet iyhäj tä honhat leles tach'ahuye t'at. 6Matkat n'amel n'ahäpehen Dios leles, wet elh che nitäfwelej Dios tach'ahu n'amehen, mat elh che kahäpeya Dios leles elh tach'ahuhit'a n'amehen. Täjtso häp tä ihanhat n'amejen elh tä Espíritu tä matche ihi lhäy'e elh tä espíritu tä akantsaj ihi.
Dios häpe n'ohumnhayaj
7Ipuhfwas tä oalehumnhay, n'ahumnhen iyhäj, tsi n'ohumnhayaj tälhe t'at Dios. Wet häp tä elh tä iwo lehumnhayaja häpe t'at Dios leles elh wet äp nitäfwelej Dios. 8Mat elh che niwoya lehumnhayaja nitäfwenhiyejt'a Dios, tsi Dios häpe t'at n'ohumnhayaj. 9Wet Dios hin'älit lehumnhayaj tä iti n'amejen, tä ichen honhatena häp Lhäs tä weihalha yämlek lhaw'atshancheyaj iyeji. 10Häp täja n'ohumnhayaj: häpkhit'a tä n'amel pajche y'ahumin Dios, mat lham tä ihumnhen n'amel wet ichen häp Lhäs yämlek lhayachaje t'ilek, häpkhilek lhach'isukyajay tatäy n'amejen wet noj t'at Dios lewäk.
11Ipuhfwas tä oalehumnhay, tä mälhyejtso tä Dios n'aihumnhen, häte n'amel n'ahumnhen iyhäj. 12Matche, ihit'a katsik hiw'enpe Dios. Mat che y'ahumnhen iyhäj, Dios in'amejen wet n'äl tä lehumnhayaj wak'alh n'amhihen. 13Wet elh tä ikalelhät tä n'amel y'ewej Dios wet äp Dios in'amejen, häpe t'at laka Espíritu tä hiw'en n'amhohen. 14Wet olhamel ow'ente Lhäs tä Lhajcha ichen honhatena yämlek ifwayhthen wichi, wet häp tä oyen silätyaja. 15Elh che häpe che yok, “Jesús häpe Dios Lhäs”, iyej Dios wet Dios iyej t'at häp lham. 16Tä mälhyejtso, y'ahanej wet y'achaye tä Dios matche tä n'aihumnhen.
Dios häpe n'ohumnhayaj, wet elh che häpe che nileyayej tä iwo lehumnhayaja, iyej t'at Dios wet Dios iyej häp lham. 17Wet wak'alh n'amhihen n'ohumnhayajna, häpkhilek lhanowayhyaj newa n'amhihen che näm ifwala tä Dios ikalelhthen wichi. Tsi n'ahäpehen Dios lehumnhay, mälhyej at iwoye Jesucristo. 18N'ohumnhayaj iwohit'a lew'eta n'onowayhyaj, häp tä n'ohumnhayaj tä wak'alh itiyej kanhi n'onowayhyaj. Mat elh tä noway ihan lhamej tä n'otasnhayaj nämhiyela. Tä mälhyejtso, elh che häpe che lenowayhyaj ihi, häp tä kamaj wak'alhihit'a n'ohumnhayaj.
19Dios ichun tä n'aihumnhen, häp tä tamenej tä n'amel lhahumnhayaj ihi. 20Elh che häpe che yok, “Ohumin Dios”, mat n'äyiho lepuhfwa, w'et yämlhi t'at. Tsi che nhumina lepuhfwa tä hiw'en, wet ihanhiyejt'a iwoyneje che ihumin Dios tä niw'ena'pe. 21Wet Dios hiw'en n'amhohen lhämetna tä yok, Elh che häpe che ihuminn'o, is che ihumin lepuhfwa.
