1~Rey 22

₁Ihi tres nekchämis tä Aram lhayis lhäy'e Israel lhayis nemhit tachum. ₂Tä nichäte tres nekchämis, wet Judá laka rey Josafat t'isiykaye häp Israel lhayis laka rey Acab. ₃Wet Acab yäme häp lech'otfwas wet yok:

–Amel lehanayej tä honhat tä Ramot tä ihi Galaad n'amel tä n'alewuhuy. ¿Chipte tä kay'attayahlä Aram lhayis laka rey häpkhilek y'asoyej?

₄Wet tay'ätshane Josafat wet yok:

–¿Hä lenekla n'okwe chik onuye Ramot tä ihi Galaad?

Josafat nichulho wet yok:

–Olham lhäy'e oka sip'äl, lhäy'e lew'utey yel'atas, olhamel olhaip'ajtit amej lhäy'e aka nifwotaj. ₅Mat is chik y'achunkat tä n'at'ukwe chik häpe Lhawuk lenech'ethayaj m'ak tä y'awoye.

₆Rey Acab t'äne cuatrocientos profetas, wet tay'ätshane, yok:

–¿Hä is chik onuye Ramot tä ihi Galaad, wok n'am nuye?

Lhamel nichulho wet yok:

–Nuye, tayhlä. Lhawuk tach'otla ame yämthilek lekalhi.

₇Mat Josafat tay'ätshane Acab wet yok:

–¿Hä newache elh profeta chik ichena häpkhilek n'aisej chik y'aty'ätshane Lhawuk?

₈Acab nichulho Josafat wet yok:

–Kamaj iche tefwaji profeta tä n'aisej chik y'aty'ätshane häp Lhawuk. Häpe Micaías, Imla lhäs. Mat matche tä on'äyiho, tsi chik oty'ätshane, ts'ilak owit'äyhyaj tä ifwel n'oho. Ohanhiyejt'a chik ifwel n'oho m'ak tä is.

Josafat yok:

–¡Kha, yej woynejatso ämet!

₉Wet Acab t'äne häp lech'otfwa wet yok:

–Ukwe Micaías, Imla lhäs. Is chik yokwet näm.

₁₀Wet Israel lhayis laka rey Acab lhäy'e Judá laka rey Josafat, lhamel taw'uyhiche lakhäy tä leniyatyaj w'uyis, tatayhichephä t'at leniyatyajw'etes tä ihi plaza tä ihi Samaria lepe. Wet nilhokej profetas tä iwo profeta lhämeta tä ihi tä lhamel tatache. ₁₁Wet Sedequías, Kenaana lhäs, yenlhi lech'ul tä lechinhas, wet t'än, yok:

–Lhawuk lhämet yok, “N'och'ulna ilänhihena Aram lhayis pajla'tha nofwej.”

₁₂Wet nilhokej profetas lhamel lhämet häpe t'at tä inityenej rey, yok:

–Nuye Ramot tä ihi Galaad, lekalhihila, Lhawuk tach'otla ame.

₁₃Wet hin'o tä õ'chen tä t'ukwe Micaías, yäme wet yok:

–Lhek yahinya, nilhokej häp profetas lhämet tefwaj'atni. Ihichet'a elh chik w'enha lhamej lhämet tä ifwenho rey tä ikalhihila letayhfwas. ¡Huwa ämlhi, is chik ämet hätet iwoye lhamel lhämet! Fwenho t'at häp rey tä ikalhihila t'at letayhfwas.

₁₄Micaías nichulho wet yok:

–Lhawuk ihanej tä matche olhämet, tä oyenla lhämeta lham lhämet tä isukun n'oyej chik oyen lhämeta.

₁₅Wet Micaías ihoye rey, wet rey tay'ätshane, yok:

–Micaías, ¿hä is chik olhamel onuye häp Ramot tä ihi Galaad, wok n'am nuye?

Micaías nichulho wet yok:

–Nuye t'at, lekalhihila. Lhawuk tach'otla ame.

₁₆Mat rey yok:

–¿Chihtefwas lewhäyes tä onityen amej chik kafwela n'oho m'ak tä kamatache chik tälhe Lhawuk?

₁₇Micaías yok:

–Lhawuk ipäyen n'oye tä nilhokej Israel lhayis kanifwotas w'et ifwtsat'atpehen häp chenhas, hätet iwoye tson'ataspej laj lewoya. Wet Lhawuk yok, “Äp lewuk ihihit'a. Is chik elhpej letamsek ihi, yäple t'at lew'et.”

₁₈Tä Acab iläte Micaías lhämet, wet yäme häp Josafat wet yok:

–¿Hä kahäpeya tä ofwelmat amho? Profetatsi ihanhiyejt'a chik ifwel n'oho m'ak tä is. Tajlhama owit'äyhyaj tä ifwel n'oho.

₁₉Wet Micaías y'isej elh lhämet wet yok:

–Ch'ahuye Lhawuk lhämet tä oyen lhämeta. Ow'ene Lhawuk tä tatayhiphä leniyatyajw'et, wet nilhokej pule lheley tä lhaihute. Takasthen tä ihi lhip tä lefwomkat lhäy'e lhip tä lets'amkat. ₂₀Wet Lhawuk tay'ätshane lhamel wet yok, “¿Atsihilak inityenej Acab chik inuye Ramot tä ihi Galaad, häpkhilek y'il?” Lhamel tay'ätshan lhamehen wet yok, “¿Atsi m'ak tä y'awoye?” ₂₁Wet iche tefwaji espíritu tä ihoye Lhawuk wet yok, “Olhamlak okanej.” Wet Lhawuk yok, “¿Atsihila m'ak chik lewoyneja yämthilek lekanej?” ₂₂Lham nichulho wet yok, “Ohohiyela, oyämyenhiyejlhila lhämtes tä kamatachehen nilhokej häp rey laka profetas.” Tä Lhawuk iläte, wet yok, “Is t'at atichunhayaj. Mäh t'at, woynejatso m'ak tä lewoyeje.”

₂₃Wet Micaías yäme rey Acab wet yok:

–Athana wet nech'e lehanej t'at tä Lhawuk itihiche nilhokej aka profetas lak'as häp espíritu tä lhämtes kamatachehen. Tsi nichäte lewhäy tä Lhawuk hiw'en amho awit'äyhyaj.

₂₄Wet Sedequías, Kenaana lhäs, lhayämte häp Micaías, wet y'ajej takwech'o elh ch'alo wet yok:

–¿Chiwoye chik lefwitaj Lhawuk laka espíritu yikm'at n'och'oye wet häp tä yämlhi amho?

₂₅Micaías nichulho wet yok:

–Lehanhiyeja t'at chik nichäte ifwala tä let'uychufwi hup chik häpe tä leweskatlä atayhfwas.

₂₆Wet Acab tahuyej lakawos wet yok:

–Chumaye Micaías, häne hupuyna laka gobernador Amón lhäy'e olhäs Joás. ₂₇Fwenhola tä olham tä ot'uhläk õ'tihi n'op'onthi, wet is chik ts'ilak t'at pan lhäy'e inät tä õhw'enho ifwalapej pajla'tha otpil, otfwayej otayhfwas.

₂₈Micaías yok:

–Letapinhila t'at, letafwayhiyeja atayhfwas, chik kamatache tä Lhawuk lhämet n'oyej. ¡Mat letapinhit'ala!

₂₉Wet Israel lhayis laka rey Acab lhäy'e Judá laka rey Josafat, lhamel yikhen tä tatayhlä hupuy tä Ramot tä ihi Galaad. ₃₀Wet Acab tahuyej Josafat wet yok:

–Chik otiyäjo n'oka'tshayaj, wet owo lakhäy iyhäja. Wet am häp tä is chik letaw'uyhiche am akhäy tä aniyatyaj lew'uyis.

Wet Acab iwo iyhäja lakhäy wet tiyäjo n'oka'tshayaj. ₃₁Wet Aram laka rey tahuyej sip'äl kaniyatey tä ihi treinta y dos tä yikchufwi kaletas tä n'oka'tshayajchal. Wet yok:

–Yej yatchen elhaj wichi. Ts'ilak t'at Israel lhayis laka rey tä ukwe, häp tä is chik lelän.

₃₂Häpet tä sip'äl kaniyatey tä yikchufwi kaletas tä n'oka'tshayajchal hiw'ene Josafat, fwitaj häpe Israel lhayis laka rey. Wet lhamel ilunej tä lhaihutej, t'uhläk ilän. Wet Josafat t'än, t'uhläk iche elh tä ifwayhat. ₃₃Tä lhamel hiw'en tä kahäpeya Israel lhayis laka rey, lhamel ileyej tä t'uhläk ilän. ₃₄Wet iche sip'ä tä w'et tafwomej t'at lech'äha, itayhte Israel lhayis kasip'äl, yiwetpe Acab, yiwtho lew'uyis tä laka'tshayajchal lepesey tä tijwek. Wet Acab tahuyej hin'o tä yikchufwi laka kaletaj wet yok:

–Tilhkathi kaletaj, mähat n'och'oye n'oka'tshayaj. Oisit'a, matche tä otfwoyho.

₃₅Ifwalatso matche tä äytajche n'oka'tshayaj. Wet Acab lhaitsoklhi t'at tä takasthi laka kaletaj, iyahne t'at letayhfwas Aram lhayis. Tä honaj y'il, lew'oyis nitsäyho t'at laka kaletaj. ₃₆Häpet tä y'uy ifwala, wet pitsaje n'opak tä tälho Israel lhayis kasip'äl, yok:

–¡Elhpej is chik yäple laka honhat!

₃₇Tsi häp tä y'il rey. Wet nech'e õyikchufwi lep'itsek, õ'häne Samaria wet õtjänlä. ₃₈Wet õ'lej kaletaj, õ'häne inät tä ihi Samaria, häp inät tä atsinhay tä kain'oyaj länhay inayhipej, wet asinhäs inap'u Acab lew'oyis. Häp Lhawuk lhämet tä lhaimatitche tä lakawo yen lhämeta.

₃₉Häp m'ayhay iyhäj tä Acab iwoye, lhäy'e häp rey lewukwe tä lham ne'tek õyenejlhi elefante tsotey, lhäy'e häp honhates tä wus tä ne'tek õyenchelhi, ihi t'at n'olesaynekhi tä lhey “Reyes tä ihi Israel.” ₄₀Wet tä y'il, nech'e ihoye lechätilis, wet lhäs tä lhey Ocozías häp tä icheyäjo lajcha leniyatyajw'et.

₄₁Ihi cuatro nekchämis tä Acab niyatej Israel, wet Josafat, Asa lhäs, nech'e iwo tesa tä lhayen niyata tä ihi Judá. ₄₂Hiw'en p'ante treinta y cinco nekchämis tä iwo tesa leniyatyaj, wet veinticinco nekchämis tä ihi Jerusalén tä iwoye niyat lechumet. Wet lako lhey Azuba, Siljí tä lhäse. ₄₃Wet Josafat is alhoho m'ak tä iwoye, ilehichet'a m'ak tä is tä lajcha Asa iwoye p'ante, wet Lhawuk akäjejlhi. Mat tach'anlhaye t'at tä tek õ'wasthiche n'on'okhayajw'etes tä ihi chenhas, häp tä wichi kamaj ilehiyejt'a tä ihoye lhipeytso yämthilek iwunej incienso wet ilän itshätäy tä yen n'okhayajayej lecheyälis.

₄₄Wet Josafat lhäy'e Israel lhayis laka rey, lhamel yenlhi lhämet tä isit'ak lhayen letayhfwasa. ₄₅Wet m'ayhay iyhäj tä Josafat iwoye, lhäy'e tä t'otle t'un, lhäy'e tä ihoye n'oka'tshayaj, lhamel ihi t'at n'olesaynekhi tä lhey “Reyes tä ihi Judá.” ₄₆Wet Josafat yokosch'oye honhat nilhokej wichi tä iwo lakain'oyajahi n'on'okhayajw'etes tä fwitaj ikäjyenlhi laka dios lhayis. Häp wichitso lhamel imälhehi p'ante honhat tä Josafat lajcha Asa ihi leniyatyaj.

₄₇Häp ifwalastso ihichet'a p'ante rey tä ihi honhat tä Edom. Tajlhamat gobernador tä ihi.

₄₈Wet Josafat ne'tek õyenchelhi barcos tä wustas, tsi t'uhläk yike oro tä ihi Ofir. Mat yikhihent'a barcos, tsi häp tä lewit'äyhyaj ihi, wasiche tä ihi Esión-geber. ₄₉Wet Ocozías, Acab lhäs, tay'ätshane Josafat wet yok:

–¿Hä is chik okawos yikche akawos tä ihiche barcos?

Mat Josafat iwohiyet'a.

₅₀Tä Josafat y'il, nech'e ihoye lechätilis, wet õtjänlä, õ'tiyej lhamel lep'itseyhay tä ihi David laka Hupuy. Wet lhäs tä lhey Joram häp tä icheyäjo lajcha leniyatyajw'et.

₅₁Ihi diecisiete nekchämis tä Josafat niyatej Judá, wet Ocozías, Acab lhäs, nech'e iwo tesa tä lhayen niyata tä ihi Israel. Wet täkwfwas nekchämis tä ihi Samaria tä iwoye niyat lechumet. ₅₂Mat iwoye m'ak tä ni'isa wet Lhawuk y'ulhanej lakeyis. Tsi iten lajcha lhäy'e lako lakeyis, lhäy'e m'ak tä Jeroboam, Nabat lhäs, iwoye p'ante tä tamenej p'ante tä Israel lhayis iwo lech'isukyaja. ₅₃Wet Ocozías n'okwiyej Ba'al wet yen lewukwa, wet häp tä iwäkwyhaynej Lhawuk tä Israel lhayis laka Dios, mälhyej tä lajcha iwoye p'ante.