1~Rey 7

₁Salomón ne'tek õyenlhi lham lewukwe, wet wak'alh tä trece nekchämis. ₂Wet õyenlhi lech'o elh tä yen lheya “Tayhi tä Líbano”. Ihi cuarenta y cinco metros tä pitaj, veintidós metros y medio tä tsajo, wet trece metros y medio tä atofwphä. Wet õ'tihi cuatro lech'utey tä pino tä ilech'oye tä yiwet lhamhiche tä itsoklä lhetekch'o, häp tä õ'ti'pe hal'äy tä äp pino. ₃Ihi cuarenta y cinco hal'äyna, wet quincepej tä õ'ti'pe lech'utey fila tefwaji, tsi ihi tres lech'utey tä yiwetpej lhamhiche. Wet hup lhetekch'o äp pino. ₄Wet ventanas ihi tres tä yiwet lhamhiche, wet trespej, wet iyhäj yiwithichepej. ₅Nilhokej lepel lhäy'e ventanas, tä pites w'awulhi t'at tä tsajomche, iyhäj äp yiwithipej wet äp tres tä yiwet lhamhiche. ₆Wet õyenlhi lech'o tä lech'utey ihi, wet veintidós metros y medio tä pitaj, wet trece metros y medio tä tsajo. Lech'o elh tä ihi tä lepe tatache äpte lech'utey ihi, wet äp lhetekch'o ihi. ₇Äpte õyenlhi hupch'o elh tä Salomón leniyatyajw'et, wet häp tä ihi tä iwo lakalelhthayaja. Wet õhp'oyejpe pänhichetek tälhe tä honhate pajtha taj tä tumphä. ₈Wet rey lewukwe tä Salomón ichufwi hätet iwoye hupuy iyhäj, wet laka alho iw'echehi. Wet hup tä Salomón ne'tek õyenhoplhi lech'efwa tä Egipto kaniyat lhäse, hätet iwoye. ₉Nilhokej hupuy tä õyenchelhina, tälhe tä honhate pajtha taj tä tumphä, lhäy'e laka alho tä wuj, õyenejlhi tuntey tä wus lhäy'e tä isis tä pajche õyisthen. Häpe medidas tä õ'wawlhatho lhipey tä õyenla lew'etesa. ₁₀Lefwetes äpte häpe tuntey tä wus lhäy'e tä isis. Iche tä cuatro metros y medio, iyhäj wet tres metros wet sesenta centímetros. ₁₁Wet õ'ti'pe lefwetes häp tuntey tä isis lhäy'e pino. Pajche õyisthen tunteytso, häpe medidas tä õ'wawlhatho lhipey tä õyenla lew'etesa. ₁₂Tsajo hup ka'alho, õ'lafwejlhi tres tuntey tä pajche õyenchelhi tä õ'fwahatchehchä tä õ'tiche letape, wet tefwaji hal'ä t'ähes tä pino tä õ'piyen wet õ'tiche letape. Häp Lhawuk Lewukwe ka'alho elh tä ilech'oye hup, häp tä kamaj hätet iwoye, lhäy'e lech'o elh tä ihi lepe.

₁₃Salomón iwo chenekaye hin'o tä lhey Hiram, Tiro lhele. ₁₄Lako häpe atsinha tesa tä tälhe wichi tä tälhe letes Neftalí. Wet lajcha lew'et t'at Tiro, wuj tä ihanej p'ante tä yenlhi chinaj tä bronce. Wet Hiram wuj tä lehusek ihi wet ihanej tä yenejlhi bronce m'ak at chik häpe. Wet häp tä ihoye Salomón wet yenlhi nilhokej lechumtes.

₁₅Hiram iwachuhathiche bronce wet yen ch'uteya, itihi täkwfwas. Ihi ocho metros tä atofwphä wet cinco metros y medio tä itolajche. ₁₆Wet iwo lhetheya ch'ute pesey tä tumphä tä äp bronce, elh tefwaji hiw'en dos metros wet veinticinco centímetros. ₁₇Wet yenlhi täkwfwas m'ak tä hätet iwoyek ifwinchehen, mälhyej chik cadenas, hätet iwoyek yäytejomche lechowhal bronce tä i'pe ch'ute lhethey. ₁₈Wet äp yenlhi täkwfwas m'ayhay tä bronce tä hätet iwoye hal'ä lhay tä wus tä itolajen. Häp tä äp ifwamhatche n'ofwinek tä pajche iyej ch'ute lhethey.

₁₉Wet hupch'o elh tä ihi lepe, lech'ute lhethey hiw'en dos metros, wet äp õ'tech'aynej hal'ä lhawo. ₂₀Elh tefwaji ch'ute lhetek tä itolajlhi, lhip tä tsajphä tä tumphä õ'lunkatejwethä doscientos n'olhenhay tä hätet iwoye hal'ä lhay tä wus tä itolajen. Õ'fwamhatche iyhäj tä pajche iyej.

₂₁Wet Hiram itihi lhenhay ch'utey hupch'o elh tä ihi lepe. Wet iwo lheya elh tä ihi lhip tä lefwomkat wet yen lheya Jaquín. Elh tä ihi lets'amkat wet yen lheya Boaz. ₂₂Häp m'ayhay tä i'pe ch'ute pesey õ'tech'aynej hal'ä lhawo. Wet häp tä mälhyejtso tä wak'alh ch'utey.

₂₃Wet Hiram yenlhi inät lehi tä wujtaj tä bronce, itolajlhi. Wet ihi cuatro metros y medio tä tsajo, tä atofwphä hiw'en dos metros wet veinticinco centímetros, wet tä itolajlhi hiw'en trece metros y medio. ₂₄Wet tä tumejlä lhip tä tumphä, cuarenta y cinco centímetrospej õ'tihipej diez m'ak tä hätet iwoye amyotas, wet dos filas tä ilunej. Imälhewek tä w'enhahit'a lhamej, lhip t'at häp inät lehi. ₂₅Wet inät lehi õ'ti'pe doce w'asetas tä bronce. Ihi tres tä iyahin tafwojnhiye, wet tres tä iyahin tapinhiye, wet tres tä tumej tä ifwala inuhiphä, wet tres tä ihi tä ifwala y'uyhi. Lepach'ol tä imälhchehen tumej lech'oye, wet häp tä inät lehi i'pe itshätäy peykasna. ₂₆Wet lepästey w'awulhi n'otkwech'o tä tsajo, wet o'tech'aynej hal'ä lhawo. Wet inät tä tiyäjo ihi cuarenta y cuatro mil (44.000) litros.

₂₇Äpte Hiram yenlhi diez inät lehis tä niwusa lew'etes tä bronce. Elh tefwaji hiw'en un metro wet ochenta centímetros tä pitaj, wet tä tsajo hätet iwoye tä pitaj, wet hiw'en un metro wet treinta y cinco centímetros tä atofwphä. ₂₈Wet Hiram yenlhi häp lechinaj tä bronce tä hap'ak, wet äp yenlhi lew'etes, wet häp tä y'uythomche wet häp tä itsokwethä. ₂₉Wet itiche'pe t'owalhas peykas, lhäy'e w'asetas peykas, lhäy'e m'ayhay tä lhafwis ihi lepeykas. Wet yenlhi lhäy tä hätet iwoye tuskal häynek, wet lepeykastso ihi lechowej. ₃₀Wet elh tefwajpejni lew'etestso hiw'en takäläy tä bronce, takäläw'utes äpte bronce. Wet ihi cuatro letselhäs, iche m'ak tä itsoklä inät lehi, wet Hiram yenlhi lhäy tä iti'pe tä hätet iwoye tuskal häynek.

₃₁Wet lew'et tä pajche õyenlhi tä itolajlhi, häp tä õy'uyitche inät lehi, wet hiw'en cuarenta y cinco centímetros, wet lhipey tä itshänlä hiw'en sesenta y ocho centímetros tä atofwphä. Äpte lepästey iche lhäy tä õ'ti'pe wet lew'etes nemhit itolajen, hap'akwethä. ₃₂Wet takäläy tä cuatro ichufwi inät lehis tä niwusa lew'etes, wet takäläw'utes itsoklhi häp lew'etes. Takälä elh tefwaji tä atofwphä hiw'en sesenta y ocho centímetros, ₃₃wet hätet iwoye kaletaj käläy. Takäläw'utes lhäy'e lechinaj tä õyene takälätso, lhäy'e lefwus, lhäy'e masa, nilhokej t'at tä bronce. ₃₄Takäläy tä cuatro t'äspe letselhäs häp inät lehi lew'et, wet äpte w'enhahit'a lhamej, imälhetwek tä lhip t'at inät lehi lew'etna. ₃₅Wet häp inät lehi lew'et lhip tä tumphä lepes itolajlhi. Ihi veintidós centímetros y medio tä atofwphä. Nilhokej lhipey tä w'enhache lhamej nech'e hap'ak'atwek, nech'e tefwaj'atni, lhip tä i'pe, lhip tä tumphä, sat'atwek. ₃₆Wet Hiram yenlhi m'ayhay tä lhafwis ihi lepeykas, lhäy'e t'owalhas peykas, lhäy'e fwitsuk peykas, tä iti'pe nilhokej bronce tä õyen lew'eta inät lehi lhipey tä imälhthiche, lhäy'e yachuyaj häynhay peykas, wet ilunkatejlhi lhenhayna.

₃₇Häp tä mälhyej p'antetso tä Hiram yenlhi diez inät lehis tä niwusa lew'etes. Nilhokej tä häpe bronce tä õ'wachuhathi, w'awulhchä, nichät lhamchehen.

₃₈Wet äpte yenlhi diez inät lehis tä bronce, wet elh tefwajpejni hiw'en un metro wet ochenta centímetros. Wet inät tä tiyäjopej elh tefwajpejni ihipej ochocientos ochenta (880) litros. Wet inät lehisna õ'tiche'pe häp lew'etes tä pajche õyenchelhi. ₃₉Wet cinco lew'etes tä õyenchelhi tä õ'tihi tä Lhawuk Lewukwe lhip tä lefwomkat, wet cinco tä õ'tumtej häp lhip tä lets'amkat. Wet inät lehi elh tä wujtaj äpte häp tä õ'tihi tä Lhawuk Lewukwe lhip tä lefwomkat tä tumej lhip tä ihi lechowej häp tapinhi lhäy'e tä ifwala tälhche.

₄₀Wet Hiram äp yenchelhi mok'otaj lehis, lhäy'e pala lhayis, wet lhäy'e häp n'olhäthis. Wet tä wak'alhen tähesna, nech'e nofwphä häp m'ayhay tä Salomón t'alheje Hiram chik yenhoplhi häpkhilek itichufwi häp Lhawuk Lewukwe.

₄₁Yenchelhi täkwfwas hup ch'utey, wet itolnhathen lhethey tä iti'pe häp lepesey tä tumphä. Wet äp yenlhi täkwfwas m'ak tä hätet iwoyek õ'fwinchehen, wet häp tä iti'pe häp ch'ute lhethey. ₄₂Wet yenchelhi cuatrocientos hal'ä lhay tä wus tä itolajen tä õ'tiyej häp täkwfwas m'akna tä hätet iwoyek õ'fwinchehen. Wet täkwfwaspej tä õ'fwamhatchehchä häp hal'ä lhaytso tä õ'piyen tä õ'tiyejpej elh tefwajpejni häp m'ak tä ihi täkwfwasna tä hätet iwoyek õ'fwinchehen. Wet häp tä õ'ti'pe häp ch'ute lhethey tä itolajen tä i'pe lepesey tä tumchephä.

₄₃Wet yenchelhi häp inät lehis tä ihi diez, lhäy'e häp lew'etes tä ihi diez, wet häp tä õ'tiche'pe. ₄₄Wet yenlhi inät lehi tä wujtaj, lhäy'e w'asetas peykas tä ihi doce, wet häp tä õ'ti'pe inät lehitso. ₄₅Wet äpte yenchelhi mok'otaj lehis, lhäy'e pala lhayis, lhäy'e n'olhäthis.

Wet nilhokej häp m'ayhaytso Hiram yenhoplhi häp Salomón häpkhilek lham itichufwi Lhawuk Lewukwe. Wet m'ayhaytso nilhokej tä häpe bronce tä õ'lejlhi wet isiche. ₄₆Tä rey Salomón ne'tek õ'wachuhathiche p'ante häp bronce, ihi p'ante lechowej häp Sukot lhäy'e häp Saretán, ihi honhat tä w'awulhchä tä ifwache tewok Jordán. ₄₇Wet tä wuj p'ante häp bronce tä õyenejchelhi häp m'ayhay, wet Salomón tek itetshanlä häp kilos tä ihi tä nilhokej häp m'ayhay tä õyenchelhi.

₄₈Wet äpte Salomón ne'tek õyenchelhi iyhäj häp m'ayhay tä t'uhläk itichufwi häp Lhawuk Lewukwe: altar tä oro, lhäy'e häp mesa tä oro tä õyen lew'eta häp pan tä õyen t'amajchetesayej Lhawuk, ₄₉lhäy'e häp n'ochäkwhis tä oro tä ts'ilak tä õ'tihi tä tatache häp Hupch'o tä Lhamya tä N'ot'amajchet, wet cinco tä õ'tihi lhip tä lefwomkat wet cinco tä õ'tihi lhip tä lets'amkat. Wet lhäy'e häp hal'ä lhawo peykas, n'ochäkwis, wet tenazas, nilhokej m'ayhaytso häpehen t'at oro. ₅₀Wet lhäy'e häp n'olhäthis, lhäy'e lecha tä õyistejpej n'ochäkw lhäk tä y'o, lhäy'e häp n'olhäthis tä wustas, lhäy'e n'okalnhey tä wustas, lhäy'e häp fwiyhol his. Wet nilhokej häp m'ayhaytso tä häpe t'at oro tä ts'ilak. Wet äpte kamaj häpe t'at oro häp lechinhas tä ihi lechowej tä itsoklhi häp Hupch'o tä Lhamya tä N'ot'amajchet lepe p'otes tä ilech'oye häp Lhawuk Lewukwe, wet lhäy'e lechinhas tä itsoklhi Lhawuk Lewukwe lepe p'otes.

₅₁Wet tä lepese, wak'alh nilhokej m'ak tä Salomón ne'tek õyenhoplhi Lhawuk Lewukwe lhäy'e tä õyenejlhi hup. Wet nech'e ihän lech'oye häp m'ayhay tä oro lhäy'e tä plata tä lajcha David yen p'ante t'amajchetesayej Lhawuk. Wet Salomón itichufwi hupch'o elh tä õyen lew'eta tä õt'amajej häp Lhawuk Lewukwe lakäywet.