1~Rey 8

₁Rey Salomón t'änehen hin'ol tä thänhäy yämthilek lhaihutwek tä ihi Jerusalén, lhäy'e nilhokej iyhäj tä niyatejen Israel lhayis tä tälhehen letetsel tä ihi doce, lhäy'e hin'ol tä niyatej lew'et lheley lhäy'e lepuhfwas. Wet Salomón ne'tek õy'ayhat Arca tä N'ot'amajchet tä Lhawuk lhämet lehi, tälhe Sión tä David laka Hupuy. ₂Wet häp tä nilhokej Israel lhayis lhaihute Salomón häp iwel'a tä siete tä lhey Etanim. Häpe t'at lewhäy tä wichi yenlhi lakäjyaj tä lhey N'ohupelis tä yen tichunhayaja m'ak tä lechätilis iwoye p'ante. ₃Wet tä nämhen hin'ol tä thänhäy, wet sacerdotes tachuma wet tilhäj Arca tä N'ot'amajchet tä Dios lhämet lehi, ₄wet y'ayhte Dios Lewukwe. Wet iyhäj lhamel, lhäy'e wichi tä tälhe letes Leví, lhamel y'isej Dios lewukwe tä pajche tä häpe tsänt'äj, lhäy'e nilhokej m'ayhay tä t'amajchetes tä ichufwi, wet ihäne Dios Lewukwe tä nech'ayek. ₅Wet Salomón lhäy'e nilhokej Israel lhayis lhamel lhaihutwek, ihi tä Arca tä N'ot'amajchet tä Dios lhämet lehi tatache. Wet lhamel ilänhen tson'atas lhäy'e w'asetas tä yen n'okhayajayej Lhawuk. Wujpey itshätäy tä ilänhen, nemhit õ'hanej chik õ'wo t'ufwahtesa.

₆Wet sacerdotes ihän lech'oye Lhawuk Lewukwe häp Arca. Ihäne Lhip tä Lhamya tä N'ot'amajchet wet itichufwi m'ayhay tä lhafwis ihi. ₇Wet m'ayhaytso hich'enhiche lhafwis wet tataype lhip tä Arca ihi. Lhamel hip'oyejpe lhafwis Arca lhäy'e hal'äy tä n'otsokkay tä õtilhäj Arca. ₈Pites hal'äyna häpkhilek õhw'en chik õ'ichufwi Lhip tä N'ot'amajchet, mat chik õknewachufwi, häp tä nemhit õhw'en. Wet itchufwi Lhip tä Lhamya tä N'ot'amajchet yäk nämena. ₉Wet Arca ts'ilak t'at täkwfwas tuntey p'ante n'olesaynhay ihi, tä Moisés ithatho tä ihi Horeb. Häpe t'at Lhawuk lhämtes tä yenhoplhi p'ante Israel lhayis tä yen laka wichiya tä lhamel yikch'oye honhat tä Egipto.

₁₀Häpet tä sacerdotes inukwephä tä tälhchufwi Lhip tä Lhamya tä N'ot'amajchet, pule näm, tiyäjchufwi Lhawuk Lewukwe. ₁₁Wet sacerdotes nemhit ikalhi chik iwo chumeta, tsi Lhawuk lewujyaj tä isi tapoyej Lewukwe.

₁₂Wet Salomón yok:

₁₄Wet rey Salomón itilhake Israel lhayis tä takasthen, wet takäpfwaye lhamel. ₁₅Wet yok:

“Lewujyaj ihi Lhawuk tä Israel lhayis laka Dios. Lham imatitche lhämet p'ante ifwenho ojcha David tä yop'antekwe, ₁₆Tälhe ifwalahte otonphä oka wichi Israel tä otälhtho Egipto, ihichet'a Israel lhayis laka honhat lhip chik häpe chik ottshupiye chik yenlhi n'oho Owukwe häpkhilek ow'et t'at. Mat ottshupiye David häp tä niyatej Israel lhayis.

₁₇“Wet ojcha David ihuminchehte chik yenlhi Lhawuk tä Israel lhayis laka Dios Lewukwe. ₁₈Mat Lhawuk yok, Matche tä is atichunhayaj tä let'uhläk lhenlhi n'oho Owukwe häpkhilek ow'et t'at. ₁₉Mat amhit'alak lhenlhi n'oho Owukwe. Äs tä ihichela häpkhilek yenlhi n'oho Owukwe.

₂₀“Wet athana Lhawuk imatitche lhämet p'ante iwoye. Olham ocheyäjo t'at ojcha David lew'et, ottayhiphä t'at Israel lhayis niyatyajw'et. Wet äp oyenhoplhi t'at Lewukwe häp Lhawuk, Israel lhayis laka Dios. ₂₁Wet owaklhat lew'et häp Arca tä N'ot'amajchet tä Lhawuk lhämtes ihi. Häpe t'at lhämtes p'ante yenhoplhi ochätilis Israel lhayis tä yen laka wichiya tä itonphä lhamel tä tälho honhat tä Egipto.”

₂₂Wet Salomón ihoho tä Lhawuk laka altar tatache, lhäy'e tä Israel lhayis tatache. Wet itichephä takweyey ₂₃wet yok:

“Iwuk, Israel lhayis laka Dios, ihichet'a dios tä ikaphä wok tä ihonhatena chik häte iwoye am, tä lhäm matche ämet tä lhen aka wichiya Israel lhayis, wet len'ältej ahumnhayaj lhamel tä matche tä iwoye ämtes. ₂₄Lematitche m'ak tä lefwenho p'ante akawo ojcha David. Ifwalana lhenlhi t'at m'ak tä lhäme p'ante.

₂₅“Athana, Iwuk, Israel lhayis laka Dios, ot'alh ame, is chik lematitche häp ämet p'ante lefwenho akawo ojcha David tä lhäme p'ante tä lhok, Lajit lepesa tä äspej t'at tä häpe Israel lhayis laka rey, chik lhamel iwoye olhämtes mälhyej am tä lewoye olhämtes.

₂₆“Häp tä mälhyejtso, Israel laka Dios, is chik lematitche t'at ämet p'ante lefwenho akawo ojcha David.

₂₇“Mat thayej, häp tä n'am hanej chik Dios yenla lew'eta honhatena. Tsi pule wet atofwphä wet tsajo, mat kamaj lenu'pe, aw'awulhihot'a. Wet lhämsaj Awukwena tä oyenlhi amho. ₂₈W'en n'oho m'ak tä ot'alhej ame, Iwuk Dios. Ch'ahu n'oye tä olhaip'altsen ame, ch'ahu n'oye tä ot'än ame, ch'ahu n'oye tä akawon'o tä ot'alh ame ifwalana. ₂₉Yej leyej tä leyahne häp Awukwena, ifwalapej lhäy'e tä honatsipej, häp lhip tä lhäme tä lhenla Haw'eta. Ch'ahuye ot'alhyajna tä akawon'o. ₃₀Ch'ahula n'oye tä olhaip'altsen ame, wet ch'ahuyela aka wichi Israel lhayis, chik olhamel oyahne Awukwena tä owo ot'alhyaja. Ch'ahula n'oyehen tä lhehi Haw'et pule, wet täyhthena olhamel otes.

₃₁“Chik hin'o yäme tä elh tatayhlä, is chik elhna õ'tihi tä altar tä ihi Awukwena tatache, häpkhilek lhaifwenho wichi tä mathichet'a. ₃₂Wet is chik letach'ahuye tä lhe puleye. Wo achumeta, tetshan chik matche lhämet tä iwoye wok kamatache. Tiyej letes elh tä iwoye m'ak tä ni'isa, tasin mälhyej lechumyaj tä ni'isa tä iwoye. Wet p'altsen, ch'ote elh tä laj letesa, mälhyej lakeyis tä isen tä iwoye.

₃₃“Wet chik letayhfwas ikalhi aka wichi Israel lhayis, häp tä iwo ch'isukyaja wet tatay ahilä, wet chik iwo lehusek elha wet tapil ame, wet iwo t'alhyaja wet lhaip'altsen ame tä ihi Awukwena, ₃₄chik mälhyejtso, wet ch'ahuyela lhamel tä lhe puleye. Täyhthena lhamel letes, nachajela honhat tä lew'enho p'ante lhamel lechätilis.

₃₅“Wet chik nemhit lefwoyenche pule wet nemhit iwomchä, häp tä aka wichi iwo ch'isukyaja wet tatay ahilä, wet chik lhamel iwo t'alhyaja wet iwo lehusek elha, wet tapil ame wet lhaifwelej amho lech'isukyajay tä iwoye, häp tä ihanej tä am tä letawäkwäye lhamel, ₃₆chik mälhyejtso, wet ch'ahuyela lhamel tä lhe puleye. Täyhteja letes akawos Israel lhayis, tsi aka wichi t'at. Chufweneja lhamel len'äyij tä is tä t'uhawetej chik inukwe. Chenela pelhay honhatna tä am lew'enho p'ante aka wichi wet lhen lewuhuya.

₃₇“Wet chik wuj nehläs wok n'ot'inhayajay tä takhajayhen tä ihi honhatna, wok nahayofw tä ilänhen hal'äy, wok hal'äwos tä tufw wichi lakäs, wok chol, wok hal'äy t'inhayaj, wok aka wichi letayhfwas ilunejlhi honhatna wet inuyehen lhamel, wok näme lhamel lewit'äyhyaj chik häpe wok t'inhayajay, _38-39chik mälhyejtso, wet ch'ahuyela nilhokej lhamel t'alhyajay. Elh chik häpe chik t'alh ame, chik lhaip'altsen ame, wok nilhokej aka wichi Israel lhayis, elhpej tä yen lhakliya m'ak tä ni'isa tä iwoye, wet chik itichephä takweyey tä itayhte Awukwena tä iwo t'alhyaja, chik mälhyejtso, wet ch'ahuyela tä lhehi Haw'et pule. Täyhteja letes, tetshana elh tefwajpeji mälhyet m'ak tä iwoye. Tsi ts'ilak am tä lehanej m'ak tä ihi hin'o letichunhayaj wet letäfwelej lehusek. ₄₀Wet chik letach'ahuye lhamel wet letäyhtejen letes, häpkhilek lhamel aihumin wet iwoye ämtes nilhokej ifwalas tä kamaj iläy tä ihi honhat tä lew'enho p'ante lhamel lechätilis.

_41-42“Häp wichi tä kahäpeya Israel wet häpkhit'a aka wichi, lhamel ilätlach'oye tä ahäpe Dios tä lewujyaj ihi lhäy'e tä lakhajyhayaj ihi. Wet chik elh lhamel ihoye honhatna, tälhe laka honhat tä atofwe, häp atoyaj tä tamenej, wet chik näm wet iwo t'alhyaja, tataye Awukwena, ₄₃chik mälhyejtso, wet ch'ahuyela tä lhehi Haw'et pule. W'enhola nilhokej m'ak tä t'alhej ame, häpkhilek nilhokej wichi tä i'pe honhat nitäfwel amej wet aiwujyen, mälhyej aka wichi Israel lhayis. Äpte lhamel nitäfwenhiyeja Awukwena tä oyenlhi amho tä häpe n'on'okhayajw'et tä lhamya.

₄₄“Wet chik aka wichi yikhen tä inuye letayhfwas, lhip at chik häpe tä lechene, chik iwo t'alhyaja wet tataye hupuyna tä am letatshupiye, lhäy'e Awukwena tä oyenlhinaj amho, ₄₅chik mälhyejtso, wet ch'ahuyela tä lhe puleye t'alhyajay lhäy'e tä lhaip'altsen ame, wet ch'otehena lhamel häpkhilek ikalhi letayhfwas.

₄₆“Wet chik lhamel iwo ch'isukyaja wet tatay ahilä, tsi ihichet'a hin'o chik niwoya ch'isukyaja, wet chik letawäkwäye lhamel wet lhachaje letayhfwas, wet yen kwenkaya wet ichäje laka honhat, chik atofwe wok ni'tofwaye, ₄₇chik lhamel ihi honhat tä õyen kwenkaya, chik lhamel iwo t'alhyaja, is chik letach'ahuye lhamel. Wet chik lhamel iwo lehusek elha wet tapil ame, wet lhaip'altsen ame wet yok, Olhamel owo och'isukyaja, owoye m'ak tä ni'isa wet n'am woye ämtes, is chik letach'ahuye t'at lhamel t'alhyajay. ₄₈Chik lhamel ihi t'at letayhfwas kahonhat tä õyen kwenkaya, wet chik lhamel matche tä iwo lehusek elha, wet chik iwo t'alhyaja wet tataye honhatna tä lew'enho p'ante lechätilis, lhäy'e hupuyna tä letatshupiye p'ante, lhäy'e Awukwena tä oyenlhinaj amho, ₄₉chik mälhyejtso, wet ch'ahuyela lhamel t'alhyaj lhäy'e tä lhaip'altsen ame tä lhehi Haw'et pule, wet ch'otehena lhamel. ₅₀Täyhteja letes aka wichi tä tatay ahilä, lhäy'e nilhokej lakeyis tä ni'isachehen tä tatayej ahilä. Wet w'enhola letichunhayaj letayhfwas häpkhilek hip'altsenhen lhamel. ₅₁Tsi aka wichi t'at wet Alewuk t'at, wet letonphä p'ante tä lhamel tälho Egipto, tä hätet iwoye n'onhonthi tä õ'wachuhathiche chinhas.

₅₂“Ch'ahuyela akawo t'alhyajay lhäy'e aka wichi Israel lhayis t'alhyajay chik lhaip'altsen ame. W'enhola m'ak tä t'alhej ame. ¡Ch'ahula n'oyehen, Iwuk Dios, chik olhamel ot'än hach'oye! ₅₃Tsi häp tä am, Iwuk, letatshupiye p'ante Israel lhayis, wet lew'enhatlä wichi tä i'pe honhat tsi häp tä lhen aka wichiya, mälhyej tä lene'tep'antek akawo Moisés ifwenhomche lhamel tä letonphä p'ante olhamel ochätilis tä tälho Egipto.”

₅₄Tä Salomón ileyej t'alhyaj tä iwoye lhäy'e tä lhaip'altsene Lhawuk, ileyej tä itsinen lakamchetey tä ihi tä Lhawuk laka altar tatache, wet ileyej tä itichephä takweyey. ₅₅Wet nephä, takasitphä, wet takäpfwaye nilhokej Israel lhayis, wet ifwitsenej lechos wet yok:

₅₆“¡N'awunit Lhawuk tä hiw'enho letamsek häp laka wichi Israel, mälhyet lhämet p'ante iwoye! Wet ihichet'a lhämet chik kamatache häp lhämtes p'ante ischehen tä ne'tek lakawo Moisés ifwenhomche Israel lhayis. ₅₇Athana is chik Lhawuk Dios in'amejen, mälhyej täjp'ante iyej n'amel lhachätilis. Isit'ak yik lhach'oyehen häp Lhawuk wet isit'ak n'aiwom. ₅₈Is chik itilhkat lhame lhahusey, yämthilek y'awoye lham lenech'ethayaj wet y'awoye nilhokej lhämtes lhäy'e lechufwenyajay tä ne'tep'antek lhachätilis iwoye.

₅₉“Häp ot'alhyajayna tä olhaip'altsene Lhawuk Dios, is chik iti lhamej ifwalapej honatsipej, häpkhilek t'amaj n'oyej tä lakawon'o wet tach'ahu n'oye, lhäy'e nilhokej laka wichi Israel lhayis, ifwalapej ifwalapej, ₆₀häpkhilek nilhokej wichi tä i'pe honhat ihanhiyeja tä Lhawuk häpe Dios, ihichet'a elh. ₆₁Wet is chik amel lets'ilkat Lhawuk Dios tä len'okwiyej wet lewoyaye nilhokej lhämtes lhäy'e lechufwenyajay, mälhyej m'ak tä amel lewoye ifwalana.”

₆₂Tä tajyäme täja, rey Salomón lhäy'e nilhokej Israel lhayis lhamel ilänhen itshätäy wet yen n'okhayajayej Lhawuk. ₆₃Salomón hiw'enho Lhawuk veintidós mil (22.000) w'asetas tä õ'länhen wet ciento veinte mil (120.000) tson'atas tä õ'länhen yämthilek lha'isyene Lhawuk.

Häp tä mälhyej p'antetso tä rey lhäy'e Israel lhayis yachaje Lhawuk häp Lewukwe yämthilek häpe t'at lham t'amajchet. ₆₄Wet ifwalatso rey Salomón äp yen t'amajchetayej Lhawuk häp hup ka'alho lechowej tä ihi tä Lhawuk Lewukwe tatache. Wet häp tä äp ilänhen itshätäy tä õ'wunhomche yämthilek yen n'okhayajayej Lhawuk. Äpte yen t'awayhata Lhawuk häp n'olhäk tä tälhe yachuyaj lhay, lhäy'e itshätäy t'alhä tä ilänhen yämthilek lha'isyene Lhawuk. M'ak tä tamenej tä yenlhi tä ihi Lhawuk Lewukwe ka'alho, häp tä itshätäytso lhäy'e t'awayhtes iyhäj w'awulhit'a'pe altar tä bronce tä ihi tä Lhawuk tatache.

₆₅Tä mälhyejtso, wet Salomón lhäy'e Israel lhayis lhamel yenlhi lakäjyaj tä lhey N'ohupelis pajtha siete ifwalas. Wet tä nichätlä lhamel lakäjyaj elh tä äp siete ifwalas, wet nech'e ihi catorce ifwalas. Wet wujpey wichi tä tälhe nilhokej honhat, tälhe chenhas kawayhi tä ihi Hamat tä itafwojhiye, pajtha nichäte lhamel tä tälhe tewok lhäsaj tä tumejlä Egipto tä itapinhiye. ₆₆Wet tä nofw lhamel lakäjyaj, tä ifwala elh Salomón iwo tsilhekayej wichi wet ne'tek yäpnhomche lew'etes. Wet lhamel itiyej lewujyaj rey wet yikhen, yäpnhomche lew'etes. Wet wuj tä akäsejwethä häp nilhokej m'ak tä hiw'en tä is tä Lhawuk iwoyeje p'ante lakawo David lhäy'e laka wichi Israel lhayis.