1~Ped 4

₁Tä mälhyejtso tä Cristo leteläythayaj iyej p'ante, häte amel is chik awak'alhen, elat nichät amehen ateläythayaj. Tsi elh chik häpe tä leteläythayaj iyej, ifwayhattshi lesukyajay, ₂häpkhilek nemhit iwoye lham lenech'ethayajay, mat iwoyepej Dios lenech'ethayaj tä kamaj ihonhatena. ₃Naya t'at lewhäy tä amel leten p'ante lakeyes häp wichi tä nitäfwelayej Dios. Alech'atejen amukwehyajay lhäy'e akänyajay tä ni'isahen, alhenaypej w'oknhasa, lewoyay akäjyaja wet lelän amejen hat'es tä leyäyej, wet len'okwiyayej dios tä n'otkwey lhenhay tä hich'atej tä ni'isa.

₄Wet athana tä amel nem alep'ajtayej lhamel tä iwoye m'ak tä lhäy'e lhip tä ni'isachehen, lhamel wuj tä iseltej wet nech'e aisitäynhen. ₅Matkat Dios itetshanhila letes, tsi lham wak'alh yämlek itiyej lakalelhthayaj häp lhamel tä kamaj iläyhen lhäy'e iyhäj tä y'inhen. ₆Tsi pajche õ'wohte silätayej lhamel tä pajche y'inhen häp Dios Silätyaj tä Is, yämlek tej tä õ'tiyej letes tä kamaj ihonhatena, mat iläyhen tä häpehen n'ohusey, mälhyej iwoye Dios tä iläy.

₇Tott'a alhoho lepes nilhokej m'ayhay. Tä mälhyejtso, oyok, Amaj amejen wet a'amkatayej tä lewopej alhyaja. ₈Wet m'ak tä inu'pe tähestso, ämay wuj ahumnhayaj tä leti amejen, tsi n'ohumnhayaj tamenej tä tatäy wujpe n'osukyajay. ₉Chumlä aelh chik häpe chik näme haw'et, yej lhak'anlä. ₁₀Elhpej amel chumyenlhi m'ak tä Dios hiw'en amho yämlek aiyhäj isej. Tsi ahäpehen t'at iyhäj tä Dios yen lewosa n'otw'ayhtes tä häpe n'okhajyhayajay tä w'enhahiche. ₁₁Elh chik iwo lhämeta, is chik häpe t'at Dios lhämtes tä yäme. Elh chik tach'ote iyhäj, is chik isej lakhajyhayaj tä Dios hiw'enho. Wet m'ak at chik häpe tä lewoye, woye yämlek wichi iwunit Dios häp tä isej Jesucristo, häp lham tä Lewuk lakhajyhayaj lhäy'e lewujyaj yämlek tiyäj'attsiy. Amén.

₁₂Ipuhfwas tä oalehumnhay, yej seltej häp ateläythayaj tä hätet itäj tä äytaj tä näm amehen, wet hätet iwoyek ni'isa alhoho tä i'amejen. ₁₃Mat akäsyenwethä, tsi i'amejen häp leteläythayaj p'ante iyej Cristo, häpkhilek häte wuj tä akäjyajay ihi chik lham lewujyaj lhain'älit. ₁₄Chik iche iyhäj tä ailäkwethä tä lep'akayej Cristo, Dios lakäpfwayaj tä is i'amejen, tsi täjtso hin'älit tä laka Espíritu tä lewujyaj ihi i'amejen. ₁₅Chik iche elh amel tä leteläythayaj iyej, isit'ak häpe tä ilän elh tä õ'menyenej, wok t'etanyaj, wok m'ak at chik häpe tä ni'isa tä iwoye, wok häpe tä lhay'uytho m'ak tä iyhäj iwoye. ₁₆Mat chik häpe tä lep'akej Cristo tä tamen amej, yej n'äfwelh, mat wunit Dios tä ahäpe t'at elh tä ihän Cristo.

₁₇Tsi näm t'at lewhäy n'okalelhthayaj, wet ichun n'amel tä n'ahäpehen Dios leles tä õ'ti n'amejen. Wet chik mälhyejtso, ¿chihla iwoye häp wichi tä nitch'ahuyaye Dios Silätyaj tä Is? ₁₈Tsi lhämet tä ihi Lehi yok:

₁₉Tä mälhyejtso, häp lhamel tä Dios tach'anlhaye yämlek leteläythayaj iyej, is tä tujlhache t'at tä iwoye m'ak tä is wet lhayachaje Dios takweyey, häp lham tä lhenek t'at wet äp afwtintsaj.