Joás tä õyene Judá laka rey
1Häp ichäte p'ante siete nekchämis tä sacerdote Joyada tä lhaikhajyen tä t'änehen sip'älis kaniyatey tä lheyis Azarías tä Jeroham lhäs, lhäy'e Ismael tä Johanán lhäs, lhäy'e Azarías elh tä Obed lhäs, lhäy'e Maasías tä Adaías lhäs, lhäy'e Elisafat tä Zicri lhäs, yämlek lhamel lhaithatche häp lham Joyada. 2Wet lhamel ilunche p'ante ilhokej honhat tä Judá wet t'änehen Leví lhayis tä ihi ilhokej hupuy tä wus lhäy'e tä niwusa tä ihi Judá, lhäy'e iyhäj kaniyatey, wet ilhokej p'ante tä lhamel ihoye Jerusalén. 3Tä lhamel ichäte, wet lhaihutwek tä ichufwi Dios Lew'et wet yok:
–¡Olhamel olhaithatche Joás, häp rey Ocozías tä lhäs!
Wet Joyada tahuyej lhamel tä yok:
–¡Ikana rey lhäs! Häp lham häpkhila rey, mälhyej Lhawuk lhämet tä yämeje p'ante David leles tä lepes lheley. 4Häp täjna m'ak tä amel lewohiyela: Häp sacerdotes lhäy'e Leví lhayis tä tiyäjihola lechumet häp ifwala tä õt'elakw'et, is chik lhip lhamel t'uye Lhawuk Lew'et lepelis. 5Wet lhip ihihila rey lew'et, wet lhip ihlawhäye lepe tä lhey Õfwetes. Wet wichi ilhokhiyeja tä lhamel ihihila Lhawuk Lew'et lhipey tä i'alhotaje. 6Mat ihichet'a elh chik tiyäjlachufwi Lhawuk Lew'et, chik kahäpeya sacerdotes lhäy'e Leví lhayis tä iwoye lechumet. Ts'ilak lhamel tä tiyäjlachufwi Lhawuk Lew'et, tsi häpe lhamel tä õyen t'amajchetesa. Mat wichi iyhäj iwohiyet'ak lhamel niwoyaye Lhawuk lhämet tä ne'tek imälhe alhoye. 7Wet Leví lhayis lhamel ilunhiyejlhila rey, elh weihalhapej lakwelhele ihi, wet hin'o chik häpe chik fwitaj tiyäjchufwi Lhawuk Lew'et, õ'länla. Is chik lhamel t'uye rey, iwohla let'unfwaya lhip chik häpe tä lham ihoye.
8Häp Leví lhayis lhäy'e wichi tä Judá lheley lhamel iwoye ilhokej m'ak tä sacerdote Joyada ne'tek iwoye. Wet elh weihalhapej ihutwek laka wichi, häp lhamel tä tiyäjo lechumet ifwala tä õt'elakw'et lhäy'e iyhäj tä yikch'oye lechumet ifwalatso. Tsi sacerdote Joyada tek iwahin chik lhamel yikhen tä noj lechumet. 9Wet Joyada yachaje sip'älis kaniyatey lehunis lhäy'e laka'tshayajp'otes tä wus lhäy'e tä niwusa tä rey David laka'tshayajchal p'ante tä ichufwi Dios Lew'et. 10Wet ne'tek hin'ol tiyäjo lhipey tä t'uye, tälhe Lhawuk Lewukwe lhip tä tumej lefwomkat yäk ichäte lhip tä tumej lets'amkat, lhäy'e tä tumej altar. Elh weihalhapej lakwelhele ihi yämlek t'uye rey. 11Wet sacerdote Joyada nech'e itonphä Joás wet iti'pe lhetek lep'ot. Wet hiw'enho õlesaynek tä häpe Lhawuk lhämtes, wet lham lhäy'e leles itsäype aceite lhetek tä õyene rey. Wet ilhokej wichi t'änhen tä yok:
–¡Lewujyaj ihi rey! ¡Is chik pitajla ifwalas tä iläy tä i'pe honhat!
Õ'län Atalía
12Täjp'ante Atalía iläte wichi tä inukwe alhoho tä t'änhen tä iwujyen rey, wet lham ihochufwi Lhawuk Lew'et. 13Wet hiw'en rey tä ikasit tä iwhäye ch'ute tä wujche tä ihi lepe, wet niyatey tä iwhäye, lhäy'e iyhäj tä yafwutchehen lefwolis trompetas. Wet ilhokej wichi wuj tä kästhä tä lhamel yafwutche trompetas, wet iche hin'ol tä ichoythä wet y'aji música tä hich'ote wichi tä iwo lakäjyaja. Wet Atalía hich'esajche lew'uy wet t'änlhi tä yok:
–¡Kantses! ¡Kantses!
14Wet sacerdote Joyada t'änehen sip'älis kaniyatey wet tahuyej tä yok:
–¡Tonphä, hän alhotaje! ¡Wet län elh chik häpe chik ihän!
Tsi tek iwatläk õ'län Atalía tä ihi Lhawuk Lew'et. 15Tä mälhyejtso, lhamel itsoklhi wet itonphä, itälhatche lhip tä yel'atas n'äyij tä ihoye rey lew'et, wet ihi p'ante lhiptso tä lhamel ilän.
Joyada inech'aynhiche m'ayhay
16Wet Joyada ifwenhomche rey Joás lhäy'e wichi tä ne'tek lhamel hip'ajtej lham tä lhamel iwoyeje lhämet häp Lhawuk wet yäm kalelhäj, yämlek lhamel häpehen t'at Lhawuk laka wichi. 17Wet ilhokej wichi ihoye Ba'al lew'et tä lhamel inachuhen laka altares wet iwasthiche lecheyälis. Wet lhamel ilän Ba'al laka sacerdote tä lhey Matán tä iwhäye altares. 18Wet sacerdotes lhäy'e Leví lhayis, häp Joyada ne'tek lhamel tä itetshan õchumyaj tä ihi Lhawuk Lew'et, mälhyej tä rey David ne'tek õ'woye p'ante. Joyada ne'tek lhamel iwunhomche tshätäy tä õyen n'okhayajayej Lhawuk, mälhyej tä õ'lesayen p'ante tä ihi Ley tä tälhe Moisés. Häte Joyada ne'tek lhamel ichoythä tä lakäjyaj ihi, mälhyej tä David p'ante ne'tek õ'woye. 19Häte itihi lepewos yämlek lhamel t'uye lepelis tä ihi Lhawuk Lew'et, yämlek newache elh tä kok'aye chik tiyäjchufwi. 20Wet t'änehen sip'älis kaniyatey, lhäy'e wichi tä len'ohyajay ihiche, lhäy'e niyatey iyhäj, lhäy'e ilhokej wichi. Wet lhamel iwo t'unfwaya rey tä lhamel tälhe Lhawuk Lew'et, wet inukwe lepe tä tumej tafwojhiye yäk ichäte rey lew'et. Wet itayyenphä Joás tä ihi leniyatyajw'et. 21Wet ilhokej wichi kästhä, wet letamsekis ihi tsi pajche õ'län Atalía.
