2~Crón 24

₁Joás hiw'en p'ante siete nekchämis tä iwo tesa leniyatyaj, wet cuarenta nekchämis tä ihi Jerusalén tä iwoye niyat lechumet. Lako atsinha tä lhey Sibia tä lew'et Beerseba. ₂Wet tä kamaj iläy p'ante sacerdote Joyada, wet is m'ak tä Joás iwoye wet Lhawuk käjejlhi. ₃Wet Joyada iwhayen p'ante Joás, hiw'enho täkwfwas lech'efwas, wet atsinhay iwo lelesahlä Joás, leles tä hin'ol lhäy'e leles tsinhay.

₄Tä paj wet Joás yen tichunhayaja tä is chik inech'aynhi häp Lhawuk Lew'et. ₅Wet ihutwek p'ante sacerdotes lhäy'e Leví lhayis wet ifwenho lhamel tä yok:

–Is chik amel lehoyaye honhates tä ihi Judá wet alhaye kolhki ilhokej Israel lhayis yämlek nekchämpej tä õyenlhi Dios Lew'et. ¡Mäyay kelitay tä lewoyaye!

Mat Leví lhayis tek ikelit tä itetshan. ₆Wet rey t'äne p'ante Sacerdote tä Lhamya Joyada wet y'ätshane tä yok:

–¿Chäte tä kalhak'alayej n'aji chik Leví lhayis ichäj kana kolhki tä tälhe Judá lhäy'e Jerusalén tä Lhawuk lakawo Moisés lhäy'e Israel lhayis p'ante tä ne'tek õ'hutpejwek yämlek õyachaje Lhawuk Lew'et?

₇M'ak tä tumenej tä rey Joás iwoyetso lhämet, häp tä Atalía tä häpe atsinha tä hich'atej tä ni'isa, lhäy'e wichi tä ihän, lhamel ikänchi p'ante Dios Lew'et tä lhamel tiyäjchufwi tä ichumahen m'ayhay tä t'amajchetes wet lhamel yachaje lecheyälis tä lhey Ba'al lhayis.

₈Wet rey ne'tek õyenlhi kolhki hi wet õ'tiwhäye lepe lhip tä ihi Lhawuk Lew'et tä i'alhotaje. ₉Wet õ'wo siläta p'ante ilhokej Judá lhäy'e Jerusalén chik wichi ichäje lew'ayhat häp Lhawuk, mälhyej täjp'ante Moisés tä Dios lakawo tä ne'tek Israel lhayis iwoye tä ihi p'ante honhat tä ts'anis. ₁₀Wet ilhokej wichi lhäy'e laka niyatey tä lhamel ihuminche wet kästhä tä lhamel ichäj lew'ayhat wet ithatho kolhki hi yäk poyej. ₁₁Häp Leví lhayis häpe p'ante lhamel tä ichäjepej kolhki hi rey lech'otfwas yämlek lhamel tä itetshan kolhki. Wet tä lhamel hiw'en tä wuj kolhki tä ihi lehi, wet nämhenpej rey lelesaynekwo lhäy'e elh tä Sacerdote tä Lhamya tä itshupyene tä hanlä tä lewo tä itetshan häp kolhki. Wet lhamel ituy kolhki tä ihi lehi wet lhamel yachajo tä itihi lew'et. Ilhokej ifwalas tä lhamel iwoye täjtso, wet naya kolhki tä lhamel ichumlä. ₁₂Wet rey lhäy'e Joyada lhamel yachaje kolhki häp iyhäj tä itetshan õchumyaj tä ihi Lhawuk Lew'et. Wet lhamel itumtej chumhas tä tuntewos lhäy'e iyhäj tä yisthen hal'äy yämlek lhamel yenlhi Lhawuk Lew'et. Häte itumtej iyhäj tä yen chumyaja chinhas lhäy'e bronce yämlek häte lhamel yenlhi häp Lhawuk Lew'et.

₁₃Wet chumhas lhaikhajyen tä ichumthä wet iläfwel m'ak tä lhamel yenlhi tä ihäne lakweyey. Lhamel ineyhatphä Dios Lew'et yäk mälhyej tä pajche p'ante, wet lhamel ikhajyen, yäm isilataj. ₁₄Wet tä wak'alh Lhawuk Lew'et, lhamel ichuma kolhki tä imälhehi wet lhamel yachaje rey lhäy'e Joyada. Wet lhamel ne'tek iyhäj yenlhi m'ayhay tä õ'watlä tä ichufwi Lhawuk Lew'et, wet lhamel tiskanejpe kolhki. Yenthä m'ayhay tä õ'chumyenthä tä õn'okwiyej Lhawuk, lhäy'e m'ayhay tä õ'chumyenthä tä õyen lew'ayhata tshätäy tä õ'wunhomche. Häte yenthä lakannhay tä wus lhäy'e õlhäthis tä oro lhäy'e tä plata. Mälhyej'attso p'ante ilhokej ifwalas tä kamaj iläy Joyada tä õyenlhipej õw'ayhat tshätäy tä õ'wunhomche tä ihi Lhawuk Lew'et.

₁₅Mat thaläkw p'ante Joyada, wet tä ileyej honhat wuj tä hich'ut. Hiw'en ciento treinta nekchämis. ₁₆Wet tä õjänch'oye, õ'tiwhäye reyes tseyhay tä ihi David laka Hupuy. Tsi is p'ante m'ak tä iwoye tä ihi Israel, wuj tä hich'ote Dios lechumet lhäy'e tä ihi Dios Lew'et.

₁₇Täjp'ante nem iche Joyada, wet hin'ol tä len'ohyajay ihi tä ihi Judá lhamel ihoye rey Joás wet n'okwiyej. Wet lhamel tahuyej wet rey hich'ahuye lhamel. ₁₈Wet wichi ileyej Lhawuk Lew'et tä letetsel laka Dios, wet lhamel n'okwiyej dios tsinha tä lhey Asera lepeykas lhäy'e lecheyälis iyhäj. Häpe p'ante täjtso lhamel lesukyaj tä tumenej tä Lhawuk lewäkw ichätpe Judá lhäy'e Jerusalén. ₁₉Mat tanej tä mälhyejtso, kamaj Lhawuk ichene laka profetas yämlek wichi yäple häp lham. Mat wichi tek hich'ahuye profetas tä tahuyejpej lhamel.

₂₀Wet Zacarías tä sacerdote Joyada lhäs, häpe tä Dios laka Espíritu ichätpe p'ante lham. Wet ikasitphä ihi lhip tä tojphä wet tahuyej wichi tä yok:

–Dios lhämet yok, “¿Chäte tä amel kawoyaye olhämtes? ¡Lekalhihit'ala m'ak tä lefwitajay lewoye! ¡Mälhyej tä amel leleyay n'oyej, häte olham olehla amejen!”

₂₁Mat lhamel iwo lehuseya p'ante tä itayhlä Zacarías, wet rey tä lhämet tä ne'tek lhamel ithatejlhi tuntey yäk y'il tä ihi Lhawuk Lew'et lhip tä i'alhotaje. ₂₂Wet mälhyejtso tä rey Joás tek itichunche m'ak tä is tä Joyada tä Zacarías lajcha iwoyeje p'ante lham, mat häp ne'tek õ'län Zacarías. Tä kamaj n'ila, tahuy tä yok:

–¡Is chik Lhawuk itetshan täjtso wet iwo lahaya häp m'ak tä lewoye!

₂₃Häp ichäte p'ante tä nekchäm elh tä Aram lhayis kanifwotas inuye Judá lhäy'e Jerusalén, wet lhamel ilänhen ilhokej hin'ol tä len'ohyajay ihi. Wet lhamel ichumahen p'ante wujpe m'ayhay wet ihäne laka rey tä ihi Damasco. ₂₄Wet Aram lhayis tej p'ante tä niwuja'pe lhamel laka wichi tä nämhen, mat Lhawuk hich'ote lhamel yämlek ikalhi häp Judá kanifwotas tä wuj. M'ak tä tumenej, häp tä Judá lheley ileyej Lhawuk tä häpe letetsel laka Dios. Mälhyej p'antetso Joás lewit'äy tä Lhawuk itiyej lakalelhthayaj.

₂₅Häp p'ante tä Aram lhayis yikch'oye, Joás wuj tä lhailät yäk imä katsi. Wet leniyatfwas lhaikhajyenhen yämlek itayhlä, wet lhamel iwo haya täjp'ante ilän sacerdote Joyada lhäs Zacarías, wet lhamel ilän Joás tä i'pe lemäwet. Häp tä õjänch'oye p'ante, õ'tihi David laka Hupuy mat tek õ'tihi reyes tseyekw'et. ₂₆Häp lhamel tä itayhlä Joás häpehen Zabad tä lako lhey Simat, häp Amón lhayis ka'tsinha, lhäy'e Jozabad tä lako lhey Simrit, häp Moab lheley ka'tsinha.

₂₇Iche elh õlesaynekhi tä lhey “Reyes”, wet lhämtes tä ihi häp tä yämeje häp Joás leles p'ante, lhäy'e Dios lhämtes tä wujpe tä itayhlä häp Joás, lhäy'e tä Joás inech'aynhi p'ante Dios Lew'et. Wet lhäs tä lhey Amasías häp tä icheyäjo lajcha leniyatyajw'et.