2~Crón 33

₁Manasés hiw'en p'ante doce nekchämis tä iwo tesa leniyatyaj, wet cincuenta y cinco nekchämis tä ihi Jerusalén tä iwoye niyat lechumet. ₂Mat Manasés isit'a m'ak tä iwoye wet Lhawuk y'ulhanej. Tsi iten lakeyis tä lhäy'e lhip tä ni'isachehen tä wichi tä w'enha lhamej iwoye, häp lhamel tä Lhawuk pajche yokoschephä p'ante tä ihi honhat tä Israel lhayis nekche. ₃Häp Manasés yachajo tä yenlhi õn'okhayajw'etes tä ihiche chenhas tä lajcha Ezequías iwasthiche p'ante. Wet ineyhatphä Ba'al lhayis laka altares wet yenlhi dios tsinha tä lhey Asera lepeykas. Häte n'okwiyej katetsel lhäy'e ilhokej m'ayhay tä ihi pule. ₄Wet yenlhi altares tä ihi Lhawuk Lew'et, häp hup tä Lhawuk yop'antekwe, “Oyenla Ow'eta.” ₅Häte yenlhi altares tä itihi täkwfwas lhipey tä i'alhotaje tä ihi Lhawuk Lew'et, yämlek n'okwiyej katetsel lhäy'e ilhokej m'ayhay tä ihi pule. ₆Wet iwunho lhäs tä ihi honhat lhip tä lhey Ben-hinom tä yen lew'ayhata dios tä w'enha lhamej. Wet iwoye hayawu lechumyaj, wet lhayen n'ältshantsaja, wet fwitaj ihanej m'ak tä ihichela. Wet iwo lew'eta iyhäj tä inämthen husey wet y'ätshane tseyhay, wet iwoye m'ak tä inu'pe tä ni'isa tä iwäkwyhaynej Lhawuk. ₇Häte itihi lecheyä häp Dios Lew'et tä pajche Dios ifwenho p'ante David lhäy'e lhäs Salomón tä yok:

–Ow'etna tä ihi Jerusalén otihi olhey yämlek tiyäj'attsiy. Tsi olham tä otshupyene tä ihi ilhokej honhat tä Israel lhayis ihi. ₈Wet chik Israel lhayis iwoye ilhokej m'ak tä one'tek lhamel iwoye, wet t'amajej ilhokej olhämtes lhäy'e ochufwenyajay tä okawo Moisés hiw'enhomchehte lhamel, chik mälhyejtso, wet olham tek osohiyeja lhamel honhatna tä ow'enhohte achätilis.

₉Mat Manasés tä tumenej tä Judá lhayis lhäy'e wichi tä ihi Jerusalén tä lhamel iwoye m'ak tä lhäy'e lhip tä ni'isa, inu'pe wichi iyhäj tä pajche Lhawuk itäyhat p'ante tä ihi honhat tä Israel lhayis nekche. ₁₀Wet häp tä Lhawuk ifwenho lhämet Manasés lhäy'e wichi, mat lhamel tek hich'ahuye. ₁₁Häp tä tumenej tä Lhawuk itayhtejlä Asiria laka rey kasip'älis kaniyatey. Wet lhamel itsokyenejlhi ganchos Manasés, wet yäyitlhi tä yen t'akaya chinhas tä ihäne Babilonia.

₁₂Mat tä Manasés ihi lelhakli, wet lhaip'altsene Lhawuk tä letetsel laka Dios, wet wuj tä lhay'ayhatchä tä ihi tä itayche. ₁₃Wet tä iwo let'alhyaja, Dios hich'ahuye wet ichulho let'alhyaj. Wet Dios yachaje Jerusalén yämlek ikanchä tä ihi leniyatyaj. Wet Manasés nech'e ihanej p'ante tä Lhawuk häpe t'at Dios.

₁₄Häpe p'ante tä tiyäme täjtso, Manasés ne'tek õyenlhi David laka Hupuy lefwamhat tä i'alhotaje tä tumejlä häp Gihón lhip tä ifwala itayche. Tiyäjche honhat lhip tä ifwache tewok lhäsaj wet yäk ichäte lepe tä w'ahatwos len'äyhitaj, wet ilafwlhi lhip tä lhey Ofel. Häp õyäm tojphä lefwamhat. Häte itihi laka sip'älis kaniyatey ilhokej Judá laka hupuy tä khajayhen. ₁₅Wet itiyejche kanhi dios lhayis tä w'enha lhamej lhäy'e lecheyä tä ihi Lhawuk Lew'et, lhäy'e ilhokej altares tä ni'isa tä yenthä tä ihi chenaj tä Lhawuk Lew'et i'pe, lhäy'e tä ihi Jerusalén lhipey iyhäj. Wet ihän w'echehi wet ifwomejthä, ithat alhotaje. ₁₆Wet häp yenlhi Lhawuk laka altar, wet iti'pe tshätäy tä ilänhen tä yen n'okhayajayej Lhawuk yämlek lha'isyene lhäy'e tä hiw'enho gracias. Wet inityenej wichi tä ihi Judá chik lhamel n'okwiyej Lhawuk tä Israel laka Dios. ₁₇Kamaj wichi tujlhache tä yenlhi õw'ayhtes tä iti'pe altares tä ihi lhipey tä toschephä, mat tajlhame Lhawuk tä laka Dios tä lhamel yen n'okhayajayej.

₁₈Häp m'ayhay iyhäj tä Manasés iwoye, lhäy'e let'alhyaj tä t'alhe Dios, lhäy'e profetas lhämtes tä lhamel ifwenho tä tälhe Lhawuk tä Israel laka Dios, ilhokej tähestso ihi olesaynekhi tä lhey “Reyes tä ihi Israel.” ₁₉Häp lhäy'e let'alhyaj tä iwoye, lhäy'e m'ak tä mälhyej tä Lhawuk ichulho let'alhyaj, lhäy'e ilhokej m'ak tä ni'isa tä iwoye tä kamaj lhakniy'ayhatahchä p'ante tä ihi tä Dios itayche, lhäy'e lesukyaj, lhäy'e tä yenlhi õn'okhayajw'etes tä ihi lhipey tä toschephä, lhäy'e tä itihiche hal'äy tä Asera lepeykas, atsinha tä õyen diosa len'okhayajw'et, lhäy'e lecheyälis - häp ilhokej tähestso ihi profetas lelesaynhay. ₂₀Wet Manasés y'il p'ante tä nech'e ihoye lechätilis, wet tä õjänch'oye, õ'tihi lelafwek lhip tä ihi lew'et. Wet lhäs tä lhey Amón häp tä icheyäjo lajcha leniyatyajw'et.

₂₁Amón hiw'en p'ante veintidós nekchämis tä iwo tesa leniyatyaj, wet täkwfwas nekchämis tä ihi Jerusalén tä iwoye niyat lechumet. ₂₂Mat isit'a m'ak tä iwoye, hätet iwoye lajcha Manasés, wet Lhawuk y'ulhanej lakeyistso. Amón n'okwiyej ilhokej lecheyälis tä lajcha Manasés yenthä p'ante, wet iwopej lew'ayhata lhamel. ₂₃Mat lham tek lhay'ayhatchä tä ihi tä Lhawuk itayche, mälhnhiyejt'a p'ante lajcha Manasés m'ak tä iwoye. Mat Amón häm lhäy'e lhip tä letes ihi.

₂₄Wet leniyatfwas lhaikhajyenhen wet itayhlä lham, wet lhamel ilän tä ihi lew'et. ₂₅Mat wichi tä ihi honhat ilänhen anikoyistso, wet lhamel yen laka niyata lhäs tä lhey Josías tä tiyäjo lajcha leniyatyajw'et.