2~Crón 6

₁Wet Salomón yok:

₃Wet rey Salomón itilhake Israel lhayis tä takasthen, wet takäpfwaye lhamel. ₄Wet yok:

“Lewujyaj ihi Lhawuk tä Israel lhayis laka Dios. Lham imatitche lhämet p'ante ifwenho ojcha David tä yop'antekwe, ₅Tälhe ifwalahte otonphä oka wichi tä otälhtho Egipto, ihichet'a Israel lhayis laka honhat lhip chik häpe chik ottshupiye chik yenlhi n'oho Owukwe häpkhilek ow'et t'at. Wet ihichet'a hin'o chik ottshupiye häpkhilek niyatej oka wichi. ₆Mat athana ottshupiye Jerusalén häpkhilek ow'et t'at, wet ottshupiye David häpkhilek niyatej oka wichi Israel lhayis.

₇“Wet ojcha David ihuminchehte chik yenlhi Lhawuk tä Israel lhayis laka Dios Lewukwe. ₈Mat Lhawuk yok, Matche tä is atichunhayaj tä let'uhläk lhenlhi n'oho Owukwe häpkhilek ow'et t'at. ₉Mat amhit'alak lhenlhi n'oho Owukwe. Äs tä ihichela häpkhilek yenlhi n'oho Owukwe.

₁₀“Wet athana Lhawuk imatitche lhämet p'ante iwoye. Olham ocheyäjo t'at ojcha David lew'et, ottayhiphä t'at Israel lhayis niyatyajw'et. Wet äp oyenhoplhi t'at Lewukwe häp Lhawuk, Israel lhayis laka Dios. ₁₁Wet häp tä oyen lew'eta häp Arca tä N'ot'amajchet tä Lhawuk lhämtes ihi. Häpe t'at lhämtes p'ante yenhoplhi ochätilis Israel lhayis tä yen p'ante laka wichiya.”

₁₂Wet Salomón ihoho tä Lhawuk laka altar tatache, lhäy'e tä Israel lhayis tatache, wet itichephä takweyey. ₁₃Iho'pe n'ot'äsawet tä õyenejlhi bronce tä hiw'en dos metros wet veinticinco centímetros tä pitaj, tä tsajo w'awulhi tä pitaj, wet tä atofwphä hiw'en un metro wet treinta y cinco centímetros. Wet õ'tihi häp Lhawuk Lewukwe laka alho chowej, wet Salomón itsinen lakamchetey ihi tä nilhokej Israel lhayis tatache. Itichephä takweyey ₁₄wet yok:

“Iwuk, Israel lhayis laka Dios, ihichet'a dios tä ipuleye wok tä ihonhatena chik häte iwoye am, tä lhäm matche ämet tä lhen aka wichiya Israel lhayis, wet len'ältej ahumnhayaj lhamel tä matche tä iwoye ämtes. ₁₅Lematitche m'ak tä lefwenho p'ante akawo ojcha David. Ifwalana lhenlhi t'at m'ak tä lhäme p'ante.

₁₆“Athana, Iwuk, Israel lhayis laka Dios, ot'alh ame, is chik lematitche häp ämet p'ante lefwenho akawo ojcha David tä lhäme p'ante tä lhok, Lajit lepesa tä äspej t'at tä häpe Israel lhayis laka rey, chik lhamel iwoye olhämtes mälhyej am tä lewoye olhämtes.

₁₇“Häp tä mälhyejtso, Iwuk tä ahäpe Israel laka Dios, is chik lematitche t'at ämet p'ante lefwenho akawo David.

₁₈“Mat thayej, häp tä n'am hanej chik Dios yenla lew'eta honhatena. Tsi pule wet atofwphä wet tsajo, mat kamaj lenu'pe, aw'awulhihot'a. Wet lhämsaj Awukwena tä oyenlhi amho. ₁₉W'en n'oho m'ak tä ot'alhej ame, Iwuk Dios. Ch'ahu n'oye tä olhaip'altsen ame, ch'ahu n'oye tä ot'än ame, ch'ahu n'oye tä akawon'o tä ot'alh ame ifwalana. ₂₀Yej leyej tä leyahne häp Awukwena, ifwalapej lhäy'e tä honatsipej, häp lhip tä lhäme tä lhenla Haw'eta. Ch'ahuye ot'alhyajna tä akawon'o. ₂₁Ch'ahula n'oye tä olhaip'altsen ame, wet ch'ahuyela aka wichi Israel lhayis, chik olhamel oyahne Awukwena tä owo ot'alhyaja. Ch'ahula n'oyehen tä lhehi Haw'et pule, wet täyhthena olhamel otes.

₂₂“Chik hin'o yäme tä elh tatayhlä, is chik elhna õ'tihi tä altar tä ihi Awukwena tatache, häpkhilek lhaifwenho wichi tä mathichet'a. ₂₃Wet is chik letach'ahuye tä lhe puleye. Wo achumeta, tetshan chik matche lhämet tä iwoye wok kamatache. Tiyej letes elh tä iwoye m'ak tä ni'isa, tasin mälhyej lechumyaj tä ni'isa tä iwoye. Wet p'altsen, ch'ote elh tä laj letesa, mälhyej lakeyis tä isen tä iwoye.

₂₄“Wet chik letayhfwas ikalhi aka wichi Israel lhayis, häp tä iwo ch'isukyaja wet tatay ahilä, wet chik iwo lehusek elha wet tapil ame, wet iwo t'alhyaja wet lhaip'altsen ame tä ihi Awukwena, ₂₅chik mälhyejtso, wet ch'ahuyela lhamel tä lhe puleye. Täyhthena lhamel letes, nachajela honhat tä lew'enho lhamel lhäy'e lechätilis p'ante.

₂₆“Wet chik nemhit lefwoyenche pule wet nemhit iwomchä, häp tä aka wichi iwo ch'isukyaja wet tatay ahilä, wet chik lhamel iwo t'alhyaja wet iwo lehusek elha, wet tapil ame wet lhaifwelej amho lech'isukyajay tä iwoye, häp tä ihanej tä am tä letawäkwäye lhamel, ₂₇chik mälhyejtso, wet ch'ahuyela lhamel tä lhe puleye. Täyhteja letes akawos Israel lhayis, tsi aka wichi t'at. Chufweneja lhamel len'äyij tä is tä t'uhawetej chik inukwe. Chenela pelhay honhatna tä am lew'enho p'ante aka wichi wet lhen lewuhuya.

₂₈“Wet chik wuj nehläs wok n'ot'inhayajay tä takhajayhen tä ihi honhatna, wok nahayofw tä ilänhen hal'äy, wok hal'äwos tä tufw wichi lakäs, wok chol, wok hal'äy t'inhayaj, wok aka wichi letayhfwas ilunejlhi honhatna wet inuyehen lhamel, wok näme lhamel lewit'äyhyaj chik häpe wok t'inhayajay, _29-30chik mälhyejtso, wet ch'ahuyela nilhokej lhamel t'alhyajay. Elh chik häpe chik t'alh ame, chik lhaip'altsen ame, wok nilhokej aka wichi Israel lhayis, elhpej tä wuj tä yen lhakliya m'ak tä ni'isa tä iwoye, wet chik itichephä takweyey tä itayhte Awukwena tä iwo t'alhyaja, chik mälhyejtso, wet ch'ahuyela tä lhehi Haw'et pule. Täyhteja letes, tetshana elh tefwajpeji mälhyet m'ak tä iwoye. Tsi ts'ilak am tä lehanej m'ak tä ihi hin'o letichunhayaj wet letäfwelej lehusek. ₃₁Wet chik letach'ahuye lhamel wet letäyhtejen letes, häpkhilek lhamel aihumin wet iwoye ämtes nilhokej ifwalas tä kamaj iläy tä ihi honhat tä lew'enho p'ante lhamel lechätilis.

₃₂“Häp wichi tä kahäpeya Israel wet häpkhit'a aka wichi, lhamel ilätlach'oye tä ahäpe Dios tä lewujyaj ihi lhäy'e tä lakhajyhayaj ihi. Wet chik elh lhamel ihoye honhatna, tälhe laka honhat tä atofwe, häp atoyaj tä tamenej, wet chik näm wet iwo t'alhyaja, tataye Awukwena, ₃₃chik mälhyejtso, wet ch'ahuyela tä lhehi Haw'et pule. W'enhola nilhokej m'ak tä t'alhej ame, häpkhilek nilhokej wichi tä i'pe honhat nitäfwel amej wet aiwujyen, mälhyej aka wichi Israel lhayis. Äpte lhamel nitäfwenhiyeja Awukwena tä oyenlhi amho tä häpe n'on'okhayajw'et tä lhamya.

₃₄“Wet chik aka wichi yikhen tä inuye letayhfwas, lhip at chik häpe tä lechene, chik iwo t'alhyaja wet tataye hupuyna tä am letatshupiye, lhäy'e Awukwena tä oyenlhinaj amho, ₃₅chik mälhyejtso, wet ch'ahuyela tä lhe puleye t'alhyajay lhäy'e tä lhaip'altsen ame, wet ch'otehena lhamel häpkhilek ikalhi letayhfwas.

₃₆“Wet chik lhamel iwo ch'isukyaja wet tatay ahilä, tsi ihichet'a hin'o chik niwoya ch'isukyaja, wet chik letawäkwäye lhamel wet lhachaje letayhfwas, wet yen kwenkaya wet ichäje laka honhat, chik atofwe wok ni'tofwaye, ₃₇chik lhamel ihi honhat tä õyen kwenkaya, chik lhamel iwo t'alhyaja, is chik letach'ahuye lhamel. Wet chik lhamel iwo lehusek elha wet tapil ame, wet lhaip'altsen ame wet yok, Olhamel owo och'isukyaja, owoye m'ak tä ni'isa wet n'am woye ämtes, is chik letach'ahuye t'at lhamel t'alhyajay. ₃₈Chik lhamel ihi t'at honhat tä õyen kwenkaya, wet chik lhamel matche tä iwo lehusek elha, wet chik iwo t'alhyaja wet tataye honhatna tä lew'enho p'ante lechätilis, lhäy'e hupuyna tä letatshupiye p'ante, lhäy'e Awukwena tä oyenlhinaj amho, ₃₉chik mälhyejtso, wet ch'ahuyela lhamel t'alhyaj lhäy'e tä lhaip'altsen ame tä lhehi Haw'et pule, wet ch'otehena lhamel. Täyhteja letes aka wichi tä tatay ahilä.

₄₀“Ika Dios, is chik letach'ahuhiyela häp wichi tä iwohla let'alhyaja chik ihihla Haw'etna.