Pablo yämlhi'pe lechumet tä häpe apóstol
1Olham Pablo olhaip'altsen amehen, häp tä isej Cristo lep'altsenyaj tä nin'äyayej. Iche iyhäj tä yäme tä oi'amejenpa, ohäpe hin'o tä t'otle nit'unayej m'ak chik häpe, mat chik otofwe ahilähen, nech'e olhayenepa elh tä t'otle t'unej m'ayhay tä oyäme. 2Is t'at. Mat olhaip'altsen amehen, oyok, Ifwala chik ohohla amehen, isit'a chik ihichela m'ak chik tamenej chik ot'otle hit'unthiyeja chik oyämhoplhi iyhäj tä iti n'oyejen lhämet tä yok, “Pablo lhayis iwoye m'ak tä lhamel lenech'ethayaj, tajlhame.”
Olham ofwel amhohen tä owak'alh t'at yämlek ottayhlä lhamel tä lhämet mälhyejtso. 3Tsi tej tä olhamel ohin'ol t'at, mat oka'tshayaj tä owoye häpkhit'a m'ak tä hin'ol lenech'ethayajay. 4Wet oka'tshayajchal tä in'oyejen häpkhit'a hin'ol laka'tshayajchal, mat häpe Dios lakhajyhayaj tä ihanej tä iwasthiche m'ayhay tä takhajayhen. Wet häp tä olhamel owastejiche n'olhämtes tä kamatachehen, 5lhäy'e nilhokej m'ak tä hin'ol lhaiwujyenej wet tamenej tä nitäfwelayej Dios. Wet olhamel okalhi nilhok hin'o letichunhayaj, yämlek tach'ahuye Cristo. 6Wet chik wak'alh amel ahusey tä lemälhtayejwek tä letach'ahuye Lhawuk, olhamel owak'alhen t'at tä otihiyeja letes elh at chik häpek tatayhlä häp Lhawuk lenech'ethayaj.
7Oyok, tetshanay m'ayhay tä iche. Chik iche elh tä yäm lhame tä matche tä häpe Cristo ch'otfwa, is chik itichunejlhi lhämettso, häpkhilek ihanej tä häte olhamel matche tä ohäpehen Cristo ch'otfwas. 8Wet tej tä olhayämetpe lhimphaj on'ohyaj tä Lhawuk hiw'en n'oho, mat niwohit m'ak chik oyen n'äfwlhiya. Tsi häp on'ohyaj tä Lhawuk hiw'en n'oho, häpkhit'ak owastejiche amel, mat häpkhilek otch'ot amehen wet ahusey isej. 9Ohuminhit'a chik oka cartas tä ochen amehen häpe olhämet tä ostun amejen. 10Iche iyhäj tä yok, “Äyteschehen Pablo lhämtes tä itihi laka cartas. Mat tä in'amejen, n'äl tä häpe elh tä w'et m'ayek t'at. Wet ihanhiyejt'a tä iwo lhämeta, lhämtes lajit lahaya.”
11Oyok, häp iyhäj chik lhämet mälhyejtso, is chik ihanej tä ts'ilakhit'a tä n'am ne amejen wet ochen amehen olhämet tä äytajche. Mat häte chik oihla amejen, hätehlat iwoye.
12¡Olhamel otektshanhit'a lhamehen yämlek olhaiw'awlhatej hin'oltso tä lhaiwujyenhen, wok olhayen häpeya iyhäj tä hätet iwoye lhamel! ¡Ch'isukwis, tä lhamel t'at tä yäm lhamehen tä fwetaj kalelhäj tä häpehen iyhäj tä isen m'ayhay tä iwoye! 13Mat olhamel chik olhaiwujyenej ochumet, tek olhayämet w'echehi häp m'ak tä Dios iti n'ohihen. Tsi lham t'at tä yäm kalelhäj lepes, wet iwahinte n'oyejen yämlek onchät amehen. 14Chik lham ifwenhi n'ohohen wet yohikwe, “Yej hoye Corinto”, mat oho amehen, n'äl tä olhainuhat w'echehi lenech'ethayaj. Mat tä yok, “Hoye Corinto”, n'äl tä tek olhainuhat w'echehi lenech'ethayaj. Wet matche, olhamel ohäpehen iyhäj tä ichunte tä ihän amehen Dios Silätyaj tä yäme Cristo.
15Wet tä olhaknämeta w'echehi m'ak tä Dios iti n'ohihen, tek olhaiwujyenej hin'ol iyhäj lechumet. Mat ohumin chik lhäy'epej lhip achayaj, häpkhilek lhaichihelit ochumet tä Dios hiw'en n'ohohen tä i'amejen. 16Chik mälhyejtso, ohanhiyeja owoyneje chik owo siläta Dios Silätyaj tä ihi honhates tä iw'echehi Corinto. Mat tek otiyäjihola honhates tä pajche iche iyhäj tä ihoye, tsi tek ot'uhläk olhaiwujyenej m'ak tä iyhäj lechumet tä wak'alh tä yenlhi.
17Lhawuk lhämet tä ihi Lehi yok, “Chik elh t'uhläk lhaiwujyen, is tä lhaiwujyenej Lhawuk.” 18Tsi hin'o tä laha ihi, häpe elh tä Lhawuk t'at tä iwujyen, häpkhit'a elh tä lham t'at tä lhaiwujyen.
