1Häpet t'awayhtes tä lehutaywek yämthilek Dios leles isej, ochenhit'a amehen olhämet chik oyäme täjtso, 2tsi ohanej t'at tä lehumin tä lewoye. Ofwenhopej Macedonia lheley, oyok, “Matche tä okäjejlhi lhapuhfwas Corinto lheley tä ihi laka honhat Acaya, tsi wak'alhen tälhe nekchäm elh naji yämthilek tach'ote Dios leles tä p'elitses tä ihi Judea.”
Wet tä Macedonia lheley iläte olhämettso, wujpey lhamel tä lhaikhajyen tä iten m'ak tä amel lewoye tä alet'amkatej achumetna. 3Mat athana ochen amehen Tito lhäy'e lhapuhfwas tä yikche, yämthilek tach'ot amehen wet matche tä awak'alhen, wet n'äl tä w'et oyämhilhit'a tä oyenpej lhämeta amel tä lewoye m'ak tä isna. 4Tsi elat ihichela iyhäj chik tälhe Macedonia chik nek n'okwe chik osikay amehen, wet hiw'en tä akniwak'alhahen. Wet matche tä olhamel on'äfwlhi ihihila chik mälhyejtso, tä pajche oyämpej amehen tä oyok, “Wuj tä is Corinto lheley.” Wet ¿chihla iwoye amel, chik mälhhiyejatso?
5Häp tä tamenej tä oyok, Is t'at chik lhapuhfwas ichun och'oye tä iho amehen, yämthilek iwaklhat m'ak tä pajche lefwelay tä lechenhiyela Dios leles iyhäj. Chik mälhyejtso, wak'alhila chik olham onchät amehen, wet n'änhila tä amel t'at tä lehumin tä lewoye täjtso, häpkhit'a olhamel tä onityen amejen.
Dios itiyej lakäpfwayaj tä is häp elh chik häpe chik iwo t'awayhata
6Tetshan olhämetna. Elh tä lhimphaj tä tutchey, lhimphaj lhay tä ihutwek, wet elh tä wuj tä tutchey, wuj lhay tä ihutwek. 7Elh weihalhapej is chik m'ak tä iwom häpe t'at m'ak tä pajche yen tichunhayaja. Häpkhit'a m'ak tä nhuminak iwoye wok lhainityenej chik iwoye. Tsi elh tä akäjlhi tä iwo t'awayhata, häp tä Dios ihumin. 8Wet Dios ihanej chik yäm wuj lakäpfwayajay tä isen tä w'enhahiche chik hiw'en amhohen, häpkhilek lajit lepesa tä ipej amejen nilhokej m'ayhay tä lewatlä. Chik mälhyejtso, lew'en m'ak tä naya amejen yämthilek lech'otyeneje achumtes tä isen. 9Mälhyej Dios lhämet tä ihi Lehi tä yok:
“Häp hin'o tä is ihumin
tä iwo t'awayhata p'elitses,
wet lepes ihihit'a le'isyaj
yämlek tiyäj'attsiy.”
10Dios hiw'enho n'utchenaj häp yachuyaj lhoy yämthilek tutchey, lhäy'e lhäk yämthilek tufw. Wet häp tä hätet iwoye, hiw'enla amhohen lhoy tä häpe ha'isyaj, yämthilek wujpe lhay tä tälh amehen. Wet ichihelthila 11yämthilek lew'enay nilhokej akäywet wet wuj tä lehanej lewoyneje chik lech'otyeneje m'ak chik iyhäj isej. Wet häp t'awayhat tä lechene lhapuhfwas, lhamel iwohla graciasayej Dios chik olhamel oyachaje lhamel. 12Tsi lhachumyaj tä is tä y'awoyena, tajlhamhiyet'a tä iche m'ak tä Dios leles isej, mat häte tamenhiyejak wuj laka gracias tä hiw'enho Dios. 13Tsi chik lhamel hiw'en tä wuj tä lep'altsene wet lechene hach'otyaj häp lhamel lhäy'e nilhokej Dios leles iyhäj, lhamel iwunthila häp Dios, tsi n'äl tä lewoye t'at Cristo lhämet. 14Wet chik lhamel yen tichunhayaja häp Dios lep'altsenyaj tä wuj tä iti amejen, lhamel y'alhyenhipeja amehen häp lham wet wuj tä itihla amejen lehumnhayaj. 15¡Owo graciasayej Dios tä hiw'en n'amho lhatw'ayhat tä lhäy'e lhip tä isilataj! ¡Ihichet'a olhämet chik w'awulhej!
