2~Cor 4

₁Tä mälhyejtso, olhamel olhaikhajyenhen, tsi ohanej tä Dios lep'altsenyaj tä tamenej tä hiw'en n'ohohen ochumetna. ₂Olhamel owohiyet'a häp m'ayhay tä õ'weskatej tä õ'woye tä ni'isachehen, wet tek olhayektshahyenwethä wet oyämhiyet'a m'ak tä kahäpeya tä Dios lhämet yäme. Mat häp m'ak tä matche, häp tä olhamel oyen lhämeta wet tek oskathi, yämthilek Dios lhäy'e nilhokej wichi hiw'en tä ohäpehen hin'ol tä ische alhoho. ₃Wet chik iche wichi tä yäme tä nikalelhäja Dios lhämet tä olhamel oyen lhämeta, oyok, ts'ilak lhamel tä tiyäje letäyhyaj tä fwetaj mälhyejtso, häp tä lep'ot ihi lehusey. ₄Tsi tä lhamel ikachu, honhat laka dios yen asnamisa lehanyaj, yämthilek niw'ena isi tä häpe Dios Silätyaj tä yäme Cristo tä lesilatyaj ihi tä häpe Dios lepeyak. ₅Tä olhamel owo lhämeta, oyämhit'a lhamehen, oyäme tä Jesucristo häpe Lhawuk. Mat olhamel olhaikalelhät amejen tä ohäpehen akawos, häp tä otiyej ohumnhayaj Jesús. ₆Tsi häp Dios tä yop'antekwe, “Is chik isi tälho honataj”, äp häpe t'at lham laka isi tä ihutunho olhamel ohusey, häpkhilek n'amel y'antäfwelej häp lham lewujyaj tä isi tä i'pe Cristo tate'pe.

₇Mat häp m'ak tä wuj tä laha ihi tä oyämetso, Dios itihiche t'at olhamel tä ohäpe m'ak tä nit'una, hätet iwoye n'okathathi tä iyhät. Tä mälhyejtso, n'äl tä n'okhajyhayaj tä wuj tälhe lham, tälhiyet'a olhamel. ₈Tej chik wuj m'ayhay tä ithahyenpej olhamel on'äyij, mat tek onahahi. Tej chik iche m'ayhay tä olhamel oyenpej tichunhayaja, mat tek onlhak'alwethä. ₉Tej chik wichi iti n'oyejen laka'tshayaj, mat iche Elh tä ipej n'oyejen. Tej chik õ'thatche katsi olhamel, mat tek õ'täyhat n'ohen. ₁₀Honhat chik ohoye, otilhäjlhi t'at Jesús t'ilek, häpkhilek häte lham lew'atshancheyaj lhain'älit n'ohihen. ₁₁Tsi olhamel tä oläyhen wet ohänlhi Jesús, õyachajpej n'oyehen ot'ilek, häpkhilek häte lham lew'atshancheyaj lhain'älit tä ihi ot'isan tä nit'una. ₁₂Häp täjtso lechumet häp n'ot'ilek tä iwoyejpej n'oyehen. Mat häp amel, n'ow'atshancheyaj tä iwoyej amehen lechumet.

₁₃Iche N'olhämet p'ante ihi Lehi tä yok, “Ochayaj ihi, häp tä tamenej tä owo lhämeta.” Wet mälhyejtso olhamel ochayaj, ochaye Dios wet äp owo lhämeta. ₁₄Tsi olhamel ohanej tä Dios tä inuhatphä Lhawuk Jesús tä tälho n'op'itseyhay, häte inuhthiphäla olhamel, lhäy'e amel, wet ihänla n'amehen häp Cristo. ₁₅Tsi nilhokej owit'äyhyajay tä nichät n'oyehen, häpkhilek amel aisej t'at. Wet tä lhäy'epej lhip Dios lep'altsenyaj, wujla'pe wichi chik iwo graciasayej lham wet iwujyen.

₁₆Tä mälhyejtso, y'alhaikhajyenhen. Tej tä yik t'at tä lhat'isanis hich'uthen, mat lhahusey lhainech'aynhi t'at fwalapej. ₁₇Häp lhateläythayaj tä in'amejen häpe m'ak tä niwuja, wet yofwajkwet tajyämepej. Mat yenlhi n'amhohen lhawujyaj tä t'un tä najit lepesa tä lhäy'e lhip tä inu'pe täjtso. ₁₈Tsi y'atetshanhit'a m'ayhay tä n'äl, y'atetshan m'ayhay tä nin'äla. Tsi m'ayhay tä n'äl tatäypej, mat m'ayhay tä nin'äla, häp tä t'un.