2~Cor 5

₁Tsi lhat'isanis tä õyen lhaw'atshancheyaj lewukweya tä y'e honhatena, hätet iwoye carpa, häpkhit'a m'ak tä kalelhäj. Mat chik wasi, y'ahanej tä Dios iwaklhat n'amhohen lhawukwey tä t'un tä ipuleye, tä kahäpeya hin'ol kweyey lhenek. ₂Wet matche, tä kamaj y'e honhate, y'anlhak'alpejwethä, y'at'upejläk y'ahoyet thahya lhawukwey tä ipuleye, ₃yämthilek hip'o'pe n'amel mälhyej iwoye lhaw'uy wet tek n'ats'ilakchehen. ₄Tä kamaj y'ehi t'at lhawukwena tä häpe lhat'isan, y'anlhak'alwethä, choyhat t'at. Häpkhit'a tä y'at'uhläk õ'wom lhat'isan tä y'ehina, mat õhp'oyejpe elh lhat'isan tä nech'ayek, häpkhilek lhaw'atshancheyaj tä nit'una tatäyhi t'at lhaw'atshancheyaj tä t'un. ₅Elh tä iwaklhat n'amel yämthilek y'akatej täjtso, häpe t'at Dios, wet hiw'en n'amhohen laka Espíritu tä T'amajchet tä häpe lhip tä ichunkat n'amehen tä tälhe m'ak tä y'akathiyeja chik nichäte lewhäy.

₆Tä mälhyejtso, nilhokej ifwalas lhahusey takhajayhen t'at, tej tä y'ahanej, tä kamaj y'ehi lhat'isanna y'a'tofwehlä Lhawuk. ₇Athana y'ahanhiyejt'a y'awoyneje yämthilek lhattelhoy hiw'en Lhawuk, mat y'alhaitsokejwethä häp lhachayaj. ₈Lhahusey takhajayhen t'at, wet y'ahumin chik y'ekch'oye lhat'isan tä y'ehina yämthilek y'ahoye häp Lhawuk. ₉Tä mälhyejtso, tej chik y'ehi lhat'isanna wok nemhit y'ehi, matchet tä y'awo yiyach'oyek lajit lepesa tä y'akänitlhi Lhawuk. ₁₀Tsi iwohiyet'ak kay'ehihila tä itayche Cristo chik iwo lakalelhthayaja, häpkhilek elhpej ikatej laha lechumyaj tä iwoye tä ihonhatena, chik is wok ni'isa.

₁₁Tä mälhyejtso, olhamel ohanej tä t'uhawetej chik ohumin Lhawuk wet owoye lhämtes. Wet häp tä olhamel onityen chik wichi iti lhamejen Lhawuk lhämet. Dios wuj tä itäfwel n'oyejen, wet olhamel ohumin chik häte amel matche tä letäfwelay n'oyejen. ₁₂Mat häpkhit'a tä olhamel oyachajo tä olhaikalelhät amhohen wet olhaiwujyenhen. Tajlhama tä ot'uhläk iche m'ak chik tamenej chik a'akäswethä n'oyejen, wet lehanej lewoyneje ämet chik lechulhejlä häp lhamel tä lhaiwujyenejen m'ak tä n'äl tä nitälhaho lehusey. ₁₃Chik olhamel olhayene ch'isukis, häp tä owunit Dios, wet chik olhayene iyhäj tä lehusey ihi, amel tä aisej. ₁₄Tsi Cristo lehumnhayaj lhayen niyatayej olhamel, tälhe tä olhamel ohanej tä iche Hin'o weihalha tä y'ilpe nilhokej wichi, wet äp tälhe täjtso nilhokej wichi lep'itseyhay t'at. ₁₅Oyok, Cristo y'ilpe nilhokej, häpkhilek lhamel tä iläyhen nemhit iwoye m'ak tä lhamel lenech'ethayaj, mat iwoye lenech'ethayaj häp Elh tä y'ilpe lhamel wet inuphä tä tälho n'op'itseyhay yämthilek lhamel isej.

₁₆Wet häp tä nemhit olhamel oten wichi letichunhayaj chik häpe chik itiyej elh chik häpe. Tej tä mälhyejtetso otichunhayaj tä otiyej Cristo, mat nemhit mälhyejtso fwalasna. ₁₇Wet häp tä mälhyejtso, chik iche elh tä hap'akej Cristo, n'äl tä Dios inech'aynhi lhenek. Tajyäme m'ayhay tä pajche, nech'e iche m'ayhay tä nech'ayhis.

₁₈Nilhokej tähestso Dios t'at tä yenlhi. N'ahip'ajtit lhamej häp tä n'aisej Cristo, wet hiw'en n'ohohen ochumet wet olhayen lewosa yämthilek wichi hap'akej häp lham. ₁₉Wok oyok, Dios hip'ajtit lhamej wichi häp tä isej Cristo, wet nemhit yen tichunhayaja lech'isukyajay. Wet häp tä hiw'en n'ohohen ochumetna yämthilek otäfwnhatej wichi häp täjtso. ₂₀Tä mälhyejtso, ohäpehen Cristo lakachenhay, wet tä oyen lhämeta Dios Silätyaj, mälhyej chik Dios lham t'at tä inityen wichi. Wet tä Cristo lhämet n'oyejen, olhamel onityen amejen, oyok, ¡Ap'ajtayej Dios! ₂₁Cristo häpe Elh tä newache lech'isukyaj chik iwoye. Mat Dios yen n'amel lhach'isukyaj menhata, häpkhilek tatäy t'at lhates häp n'amel tä y'ap'akej Cristo.