1Tä mälhyejtso, tä ohäpehen iyhäj tä tach'ote Dios lechumet, olhaip'altsen amehen, oyok, Yej känchi Dios lep'altsenyaj tä iti amejen. 2Tsi lhämet tä ihi Lehi yok:
“Häp lewhäy tä n'op'altsenyaj iche, otch'ahuhte ame,
wet ifwala tä n'ofwayhyaj iche, otch'otte ame.”
¡Lhek tetshan, athana häp tä lewhäy! ¡Athana häpe t'at ifwala chik alefwayhthen!
Äytaj Pablo len'äyij
3Ihichet'a m'ak chik olhamel owoye wet ikänchi elh chik häpe letichunhayaj, häpkhilek nehiche t'at elh chik yok, “Isit'a m'ak tä lhamel iwoye.” 4Mat nilhokej m'ak at chik häpe olhamel on'älit t'at tä ohäpehen Dios lakawos. Tek onlhak'alwethä tä oihi oteläythayajay, wok newache m'ak chik olhamel oisej, wok athapej on'äyij, 5wok õ'tasnhen olhamel, wok õ'that n'ohohen n'op'onthi, wok wichi inu n'oyehen, wok ochumet tä äytaji, wok n'am mähen tä honatsi, wet äp onchuyuhen.
6Häte olhamel owoyepej m'ak tä is, wet ontäfwelej Dios lhämet tä matche, wet oteläytej iyhäj wet op'altsenhen lhamel, wet Dios laka Espíritu tä T'amajchet in'ohiche, wet otiyej iyhäj ohumnhayaj tä matche, 7wet oyen silätyaja Dios lhämet tä matche, wet Dios lakhajyhayaj in'oyejen. Oyok, nilhokej tähestso on'älit tä ohäpehen Dios lakawos.
Olhamel oyen oka'tshayajchala häp m'ak tä is alhoho tä owoyepej, wet häp tä otayhtejlä m'ak tä olhamel ottayhlä, wet otayhtejlä m'ak tä õ'ti n'oyejen. 8Ichepej tä wichi ihumin olhamel, iche tä õ'läkwethä olhamel. Iche tä wichi yok, “Isen t'at lhamel”, iche tä wichi yok, “Isihent'a”, tä yäm n'oyehen. Tej tä olhamel oyen lhämeta m'ak tä matche, mat wichi yen n'oyehen hin'ol tä w'et yäm'atwethä. 9Wet tej tä õntäfwel at n'oyejen, mat wichi yen n'oyehen hin'ol tä kan'otäfwnhaya. Otwelkaywethä, mat kamaj tek oy'inhen. Õ'tasinwethä olhamel, mat õ'länhihent'a olhamel. 10Ofwitajayaj ilän n'ohen, mat okäjyaj ihi t'at. Op'elitsesch'oye m'ayek, mat wujpey wichi tä lehusey lakäywet tälh n'oyehen. Hätet iwoyek niwohit m'ak chik in'oyejen, mat nilhokej t'at m'ak tä in'oyejen.
11Ipuhfwas tä lheyayhi Corinto, ihichet'a olhamel otichunhayaj chik oskat amhohen tä oyämlhi amhohen. Mälhewek tä ofwoyenche ahilähen ohusey, 12haw'et ihi t'at, mat n'äl tä amel tek lewoyay ow'etahi ahusey. 13Tä mälhyejtso, olhaip'altsen amehen, hätet iwoye hin'o chik lhaip'altsene leles. Oyok, woynejetso m'ak tä lewoyej n'oyehen, mälhyej m'ak tä olhamel owoyej amehen.
N'ahäpehen Dios tä n'ilataj Lew'et
14Yej alep'ajtayej iyhäj tä nit'ekhayaye Cristo, wet yej alet'aje m'ak tä iwoye. Tsi m'ak tä is ikalhihit'a tä lhaip'ajtej m'ak tä ni'isa, wet isi lhäy'e honatsi ihanhiyejt'a iwoyneje che lhaip'ajtitwek. 15Cristo ihanhiyejt'a iwoyneje che ihuminche m'ak tä ahättaj iwoye, wet ahättaj ihanhiyejt'a iwoyneje che ihuminche m'ak tä Cristo iwoye. Elh tä t'ekhaye Cristo ihanhiyejt'a iwoyneje che ihuminche m'ak tä kachuhantsaj iwoye, wet kachuhantsaj ihanhiyejt'a iwoyneje che ihuminche m'ak tä elh tä t'ekhaye Cristo iwoye. 16Häp Dios Lew'et lhäy'e n'ocheyälis, ihichet'a m'ak che y'ajejwek che ihi. Wet n'amel n'ahäpehen t'at Dios tä n'ilataj Lew'et, mälhyej tä lham yop'antekwe:
“Oyenla ow'eta lhamel,
wet olunhichela lhamel.
Ohäpkhila lhamel laka Dios,
wet lhamel häpkhila oka wichi.”
17Häp tä tamenej tä häte yokwe Lhawuk:
“Mäyaych'oye lhamel tä n'okwiyej n'ocheyälis, aw'enhatlä.
Yej tachuma m'ak tä kok'aye,
häpkhilek otchum ahilähen.
18Ohäpkhila amel Ajcha,
wet amel ahäpkhihena oles
tä hin'ol lhäy'e tä atsinhay,
yokwe Lhawuk tä lajit letumfwaya.”
