2~Cor 8

₁Athana ipuhfwas, ot'uhläk ohanhat amejen häp Dios lakäpfwayajay tä isen tä hiw'enho häp leles tä ihi Macedonia. ₂Tsi tej tä athapej len'äyij wet wuj leteläythayaj, mat lhäy'e lhip tä lakäjyaj ihi. Wet tej tä matche tä p'elitses, mat nem koyhyaj tä ihumin tä iwo t'awayhata Dios, hätet iwoyek häpe wichi tä hiw'en m'ayek. ₃Olham oyäme, tsi ow'en tä matche tä lhay'amkatej tä iwo t'awayhata, mälhyej m'ak tä lhamel ikalhi tä iwoye. ¡Mat m'ak tä iwoye inu'pe m'ak tä ikalhi tä iwoye! ₄Lhamel lhaip'altsen n'oyehen wet inityen n'oyejen chik owahnej chik tach'ote Dios leles tä ihi Judea.

₅Wet olhamel lhäy'e lhip tä oseltejen, tsi ichunkat lhayachaje Lhawuk, wet nech'e äp lhayachaj n'oyehen, mälhyej m'ak tä häpe Dios lenech'ethayaj. ₆Wet häp tä olhamel onityenej Tito tä oyok, “Mälhyej tä am pajche lewo tesa tä lehutwek m'ak tä lhapuhfwas tä ihi Corinto yachaje Dios, athana is chik lhäm wak'alh häp m'ak tä isilataj tä lhamel iwoyena.”

₇Yaiyhäj, amel lhäy'e lhip tä i'amejen m'ayhay tä isen: häp achayaj, lhäy'e ahanyaj, lhäy'e tä lehanej tä lhen ämeta Dios lhämet, lhäy'e tä wuj tä lehumin tä letach'ote aiyhäj, lhäy'e ahumnhayaj tä olhamel on'älit amhihen. Tä mälhyejtso, häte ísej lhip hap'altsenyaj tä letiyej aiyhäj tä niw'ena m'ayek.

₈Mat tä owoynejetso olhämet, tek omälhyej iwoye elh tä amel aka niyat. Tajlhama tä ot'uhläk lehanayej m'ak tä is tä iyhäj iwoye, yämthilek häte amel len'älitay tä matche ahumnhayaj. ₉Tsi lehanej tä Lhawuk Jesucristo lhäy'e lhip tä n'ahip'altsenhen. Tej tä lham häpe elh tä hiw'en m'ayek, mat lhayen häpeya p'elitsaj atapehen, yämthilek aisej tä lhayen p'elitsaja wet ahäpehen iyhäj tä hiw'en m'ayek.

₁₀Häp nekchäm elh naji, häpe t'at amel tä lechun tä lewo tesa tä lehutwek chinaj t'äj yämthilek Judea lheley isej. Wet ts'ilakhit'a tä lewoye täjtso, mat häte lehumin tä lewoye. Tä mälhyejtso, lhek tetshan otichunhayaj, oyok, ₁₁Tä alet'amkatayej naji, is chik lhachajo tä alet'amkatayej athana wet letujlhache pajla'tha wak'alh. W'enho Dios m'ak chik lekalhi chik lew'enho, ₁₂tsi m'ak tä lehuminche wet lekalhi tä lew'enho, häpkhilek tachumlä. Lham tek t'alhej ame m'ak tä kaw'ena.

₁₃Mat häpkhit'a chik one'tek letach'ote iyhäj yämthilek iche m'ak tä iyhäj isej, mat nech'e amel tatäy amej m'ayek. ₁₄Mat is chik w'awulhchä wichi tä iche t'at m'ak tä isej. Athana amel lew'en m'ayek yämthilek lech'otyeneje lhamel tä iwatlä m'ayek. Mat elat fwala chik häpe amenlak lewatlä m'ayek wet lhamenlak hich'otyenej amehen m'ak tä hiw'en. Wet chik mälhhiyejatso, nilhokej w'awulhilahchä. ₁₅Mälhyej Dios lhämet tä ihi Lehi yok, “Tek imälheyej lhip häp elh tä wuj m'ak tä ihutwek, wet niwohit m'ak chik tatäyej häp elh tä niwuja m'ak tä ihutwek.”

₁₆Owo graciasayej Dios tä lham itihi Tito lehusek yämthilek wuj tä yen tichunhayaja amel, mälhyej iwoye olham. ₁₇Tsi tä onityene chik iho amehen, iwoye t'at. Mat häte ow'en tä lham t'at tä lenech'ethayaj chik yik, tsi wuj tä iwatläk tach'ot amehen.

₁₈Wet elh tä ochenche häpe t'at lhapuhfwa tä nilhokej Dios leles yäme tä häpe elh tä wuj tä is m'ak tä iwoye tä tach'ote Dios lechumet wet yen lhämeta Dios lhämet. ₁₉Häte Dios leles itshupyeneje lham yämthilek nek n'okwehen tä oyikhen tä oyikchufwi m'ak tä wichi yen t'awayhata Dios. Häp olhamel olhayen lewosa täja, häpkhilek lakäjyaj ihi Dios leles wet iwunit häp Lhawuk, wet häte häpkhilek wichi hiw'en tä matche tä olhamel ot'uhläk otch'ote Dios lechumet. ₂₀Mälhyejtso m'ak tä olhamel owoye, häpkhilek nehit katsik yok, “Isit'a m'ak tä Pablo lhayis iwoyeje chinaj t'äj.”

₂₁Häp tä tamenej tä olhamel matche tä ot'uhläk is m'ak tä owoye, ts'ilakhit'a tä oihi tä Lhawuk itayche, mat häte tä oihi tä wichi itayche.

₂₂Wet ochenche lhamelna häp elh lhapuhfwa, häp hin'o tä hin'älit tä ilehiyejt'a tä tach'ote Lhawuk lechumet, mat lhay'amkatejpej tä iwoye. Wet athana lhäy'e lhip tä tach'ote, tsi wuj tä t'ekha amehen.

₂₃Chik iche elh chik tay'ätshanej amehen m'ak tä lechumet Tito, fwenho tä olham och'otfwa t'at, lham tach'ote ochumet yämthilek amel aisej. Wok chik tay'ätshanej amehen m'ak tä lechumet häp iyhäj tä yikche Tito, fwenho tä Dios leles t'at tä ichen amehen, wet lhamel iwujyenej Cristo häp lechumet tä iwoyena. ₂₄N'älitay ahumnhayaj tä letiyej lhamel, wet hantej lhamel lhäy'e nilhokej Dios leles iyhäj tä matche olhämet tä oyäm amehen tä oyopejkwe, “Is t'at lhapuhfwas tä ihi Corinto, lehusey ihi.”