1Amtena yaiyhäj tä ahäpehen Dios leles, amel tä Dios tatshupi amehen. Olham tä othaläkw ochen amehen olhämetna tä oalehumnhay tä y'ap'akej m'ak tä matche. Mat ts'ilakhit'a olham, häte nilhokej lhamel tä pajche nitäfwelej m'ak tä matche wuj tä ihumnhen amel. 2Tsi m'ak tä matche tä ihiche lhahusey, häp tä tamenej tä ohumin amel, wet ihla n'amejen yämlek tiyäj'attsiy.
3Dios Lhajcha lhäy'e Jesucristo tä Lhajcha Lhäs itihlat n'amejen le'isyaj lhäy'e lep'altsenyaj lhäy'e lhatamsek, häp n'amel tä y'ap'akej m'ak tä matche lhäy'e tä y'ahumnhen iyhäj.
4Wuj tä okäjyaj ihi tä ow'en elhpej amel tä nileyayej m'ak tä matche, mälhyej tä Lhajcha ne'tek y'awoye. 5Wet athana, ipuhfwas tä oalehumnhay, onityen amejen tä oyok, N'ahumnhen iyhäj. Häp täja häpkhit'a Dios lhämet tä nech'ayek, mat häpe t'at m'ak tä pajche in'amejen tälhe tä y'awo tesa p'ante. 6Wet che y'awoye m'ak tä Dios lhämtes ne'tek y'awoye, n'äl tä lhahumnhayaj ihi. Wet Dios lhämet tä lelätaye tälhe tä lewoyay tesa p'ante yok, Yej leyej n'ohumnhayaj.
Wichi tä akantses
7Iche wujpe akantses tä ilunpe honhat, lhamel ikachu tä Jesúcristo lhayen p'ante hin'oya tä näm honhatena. Mat oyok, elh che häpe tä lhämet mälhyejtso häpe akantsaj tä lhamya, Cristo letayhfwa.8Tä mälhyejtso, amaj amejenlä häpkhilek nittäya amejen m'ak tä tälhe achumet, mat lekalhi laha tä imälhewek.
9Elh at che häpe che lhainuhatpe m'ak tä Cristo ichufwenej, Dios ihiyejt'a. Mat elh che lhaip'ajtej n'ochufwenyajtso, häp tä Lhajcha lhäy'e Lhäs iyej t'at.
Juan lhämet tä lepes
10Elh che iho amehen che nichäja n'ochufwenyajna, yej wo lew'eta wet yej n'okwiyej. 11Tsi elh che n'okwiyej lhaitan'istej tä iwoye m'ak tä ni'isa.
12Iche wujpe m'ayhay tä ot'uhläk oyäme, mat otihihit'a oka cartana. Tsi ot'uhläk oho amehen yämthilek oyämlhi amhohen, häpkhilek matche tä lhakäjyaj ihi wet nittäya lhip.
13Dios leles tä ikana, tä häte lham tatshupiye, lhamel ichen amehen len'okhayaj.
