2~Rey 17

₁Ihi doce nekchämis tä Acaz niyatej Judá, wet Oseas tä Ela lhäs nech'e iwo tesa tä lhayen niyata tä ihi Israel. Wet nueve nekchämis tä ihi Samaria tä iwoye niyat lechumet. ₂Mat isit'a m'ak tä iwoye wet Lhawuk y'ulhanej, tej tä lakey tek wuj tä häte iwoye reyes lakeyis tä lhamel ichunch'oye p'ante lham tä ihi Israel.

₃Wet Salmanasar tä Asiria laka rey itayhlä p'ante Oseas wet yen lakawoya, wet Oseas tiskanpe impuestos tä Salmanasar t'alhe'pe. ₄Mat Salmanasar ihanch'oye p'ante tä Oseas itiyej lakanyaj tä ichene lesilätwos Egipto laka rey tä lhey So tä t'ukwe lech'otyaj. Häte nem tiskanpe Asiria laka rey häp kolhki tä t'alhe'pe nekchämpej. Wet häp tä Salmanasar ne'tek õ'tsoklhi Oseas yämlek õhp'ohi, õ'thatho õp'onthi. ₅Wet Asiria laka rey lhäy'e laka nifwotas, lhamel tiyäjo ilhokej honhat tä Israel. Wet itayhlä hupuy tä Samaria wet tres nekchämis tä lhamel ilunej. ₆Wet tä lepese, ihi nueve nekchämis tä Oseas ihi leniyatyaj, wet Asiria laka rey ikalhi Samaria wet lhayen lewuka, wet yen lakwenkaya Israel lhayis tä ihäne Asiria. Wet itihi iyhäj lhamel häp hupuy tä lhey Halah, wet iyhäj itihi Gozán tä iwhäye tewok tä lhey Habor, wet iyhäj itihi Medo lhayis kahupuy.

₇Häp m'ak tä tumenej tä Israel lhayis lewit'äy ihi, häp tä lhamel iwo lesukyaja tä itayhlä Lhawuk tä laka Dios tä itonphä p'ante lhamel lechätilis tä ihi honhat tä Egipto wet ifwayhtejen p'ante Egipto laka rey. Wet lhamel n'okwiyej dios lhayis iyhäj ₈wet iten t'at wichi iyhäj lakeyis, häp lhamel tä Lhawuk pajche yokoschephä p'ante tä ihi honhat tä Israel lhayis nekche. Häte iten m'ak tä ni'isa tä Israel laka reyes yenlhi p'ante.

₉Wet Israel lhayis iwoye p'ante lhämtes tä ni'isachehen tä lhamel iwoyeje Lhawuk tä laka Dios. Wet yenlhi lhamhohen len'okhayajw'etes tä itihiche ilhokej lhipey tä yen lew'etesa, häp hupuy tä wus lhäy'e tä niwusa, yämlek n'okwiyej Lhawuk lhäy'e dios lhayis tä w'enha lhamej. ₁₀Wet häte lhamel yenlhi tuntey tä iwo len'okhayajayej, lhäy'e hal'äy tä yen dios tsinha tä lhey Asera lepeykasa. Itiche'pe ilhokej chenhas, häte itichechufwi hal'äy lehupelis. ₁₁Wet lhamel iwunej incienso tä itihi ilhokej lhipey tä toschephä. Wet iten t'at wichi iyhäj lakeyis, häp lhamel tä Lhawuk pajche yokoschephä p'ante tä ihi honhat tä Israel lhayis nekche. Wet lhamel iwoye m'ayhay tä wuj tä ni'isachehen, wet häp tä iwäkwyhaynej Lhawuk. ₁₂Wet lhamel n'okwiyej lecheyälis, häp m'ak tä Lhawuk n'äyejo p'ante lhamel wet yok, “Yej woye täjtso.”

₁₃Häp Lhawuk ichen p'ante lesilätwos lhäy'e laka profetas, ne'tek ifwenho lhämet Israel lhayis lhäy'e Judá lhayis wet yok, “Leyache akeyis tä ni'isa, wet woyaye ilhokej olhämtes lhäy'e ochufwenyajay tä ofwenhohte amel achätilis lhäy'e tä okawos profetas iwo siläta amejen.”

₁₄Mat lhamel niwoyaye, wet nem koyhyaj tä t'unhen lehusey, hätet iwoye lechätilis tä lhamel tek ichaye Lhawuk tä laka Dios. ₁₅Wet lhamel yen w'et m'ayeka lechufwenyajay, lhäy'e lhämet tä ische tä iwoyeje p'ante lechätilis tä yok, “Olham ohäpkhila aka Dios, wet amel ahäpkhila oka wichi.” Hätej lhamel tek hich'ahuye lham lhämtes tä ne'tek iwoye. Mat lhamel yen lewuhuya lecheyälis tä najit lahaya, wet tä iwoynejetso, häte tumen lhamejen tä w'et m'ayek t'at. Wet lhamel iten lakeyis wichi tä w'enha lhamej tä ihi honhates tä iwhäye. Häpe m'ak tä Lhawuk n'äyejo p'ante lhamel chik iwoye. ₁₆Wet lhamel ileyej ilhokej Lhawuk tä laka Dios lhämtes, wet lhamel yenthä lhamhohen p'ante täkwfwas w'asetas les tä chinaj tä õhp'o tä yen lecheyälisa. Häte lhamel yenlhi Asera lepeyak, wet lhamel n'okwiyej ilhokej m'ayhay tä ihi pule lhäy'e dios tä lhey Ba'al. ₁₇Wet lhamel iwunhomche leles tä lhamel yen lew'ayhata häp dios tä lhey Milcom. Wet lhamel lhayen n'ältshantsesa, wet fwitaj ihanej m'ak tä ihichela. Wet lhamel lhayachaje m'ak tä ni'isa wet Lhawuk y'ulhanej lakeyis, wet mälhyejtso p'ante tä lhamel iwäkwyhayen.

₁₈Wet Lhawuk wuj tä tewäkwäye Israel lhayis wet itiyej kanhi lhamel, wet telhame p'ante Judá lhayis tä imälhehi. ₁₉Mat hätej Judá lhayis tä lhamel iwohiyet'a Lhawuk tä laka Dios lhämtes, mat lhamel iten t'at Israel lhayis lakeyis. ₂₀Wet Lhawuk itiyej kanhi ilhokej Israel leles wet ilhaklitthä, wet yachaje itäyes lakweyey.

₂₁Wet hiw'enhat p'ante Israel, isoyej tä ihi David leniyatyaj. Wet Israel lhayis itshupyene p'ante Jeroboam tä Nabat lhäs tä lhamel yene laka rey. Wet häpe p'ante tä tumenej tä Israel lhayis ileyej Lhawuk wet lhamel iwoye lesukyaj tä wuj tä ni'isa. ₂₂Lhamel iwoye ilhokej lesukyajay tä mälhyej tä Jeroboam iwoye, wet lhamel ilehiyejt'a. ₂₃Wet tä ilepese Lhawuk itiyej kanhi Israel, mälhyej tä ifwenho p'ante ilhokej lakawos profetas tä ne'tek iwo siläta laka wichi. Wet mälhyej p'antetso tä õyen kwenkaya Israel lhayis tä lhamel yikch'oye laka honhat tä õ'chäje Asiria. Wet lhamel ihi tä yen lew'eta yäk fwalasna.

₂₄Häp Asiria laka rey ichäj p'ante wichi tä tälho Babilonia, lhäy'e tä tälho Kuta, lhäy'e tä tälho Ava, lhäy'e tä tälho Hamat, lhäy'e tä tälho Sefarvaim. Wet itihi hupuy tä ihi Samaria tä Israel lhayis tä lew'et p'ante. Wet wichitso lhayen lewuka hupuytso wet yen lew'eta. ₂₅Mat lhamel tek n'okwiyej Lhawuk, tälhe lewhäy tä lhamel yen lew'eta hupuy. Wet Lhawuk ichene owalhas tä fwitses wet ilänhen iyhäj lhamel. ₂₆Wet õ'fwenho Asiria laka rey tä õyok:

–Häp wichihte lechäj tä lhen akwenkaya tä lhen lew'eta hupuy tä ihi Samaria, lhamel itäfwnhiyejt'a honhattso laka dios lhäy'e lakeyis. Wet tä lhamel nitäfwelayej, wet lham ichene owalhas tä fwitses wet ilänhen lhamel.

₂₇Tä Asiria laka rey iläte, wet yok:

–Chene elh sacerdotes tä tälh kanhi tä y'achäjte kana tä y'en lhakwenkaya. Is chik ihoye wet iwo w'eta kanhi, yämlek ichufwenejen häp honhattso laka dios lakeyis.

₂₈Wet yik elh sacerdotes tä lhamel pajche yen lakwenkaya tä itälhte Samaria. Wet yen lew'etahi Betel wet ichufwenejen wichi häp lakey tä n'okwiyej Lhawuk. ₂₉Mat wichi ilehiyejt'a tä yenthä lhamhohen lecheyälis tä ihi hupuy tä lhamel lew'et. Wet lhamel itihiche len'okhayajw'etes tä ihi lhipey tä toschephä tä Samaria lheley tä yenlhi p'ante. ₃₀Wet Babilonia lheley lhamel yenlhi laka dios tä lhey Sukot-benot lepeyak. Wet Kuta lheley yenlhi laka dios tä lhey Nergal lepeyak, wet Hamat lheley yenlhi laka dios tä lhey Asima lepeyak. ₃₁Wet Ava lheley yenlhi laka dios tä lhey Nibhaz lepeyak lhäy'e laka dios elh tä lhey Tartac lepeyak. Wet Sefarvaim lheley lhamel iwunhomche leles, ithatho itäj yämlek yenlhi lew'ayhat tä n'okwiyej Adramelec lhäy'e Anamelec tä Sefarvaim lheley laka dios lhayis. ₃₂Häte lhamel n'okwiyej Lhawuk, mat lhamel t'at tä itshupyen lhamehen elh chik häpe tä yene laka sacerdote yämlek hich'ote õchumet tä ihi len'okhayajw'etes tä ihi lhipey tä toschephä. ₃₃Mälhyej p'antetso, tej tä lhamel n'okwiyejpej Lhawuk, mat kamaj lhamel iwujyen lhamel laka dios lhayis, mälhyej honhates tä lhamel tälhehen p'ante lakeyis.

₃₄Yäk athana kamaj lhamel iwoye m'ak tä pajche iwoye p'ante, tä lhamel tek yäm matche tä n'okwiyej Lhawuk. Häte lhamel iwohiyet'a lhämtes lhäy'e lechufwenyajay tä lham ne'tek Jacob leles iwoye, häp hin'o p'ante õyen lheya Israel. ₃₅Wet täjp'ante Lhawuk lhayäm islä lhamel, ifwenho lhämet tä yok:

–Yej lhen awuhuya dios lhayis iyhäj wet yej len'okwiyej. Yej let'upiyejchä lhamel wet yej lewoyay lew'ayhata. ₃₆Mat enn'o Awuka tä ohäpe aka Dios tä oaitonphä tä lheyayhi p'ante honhat tä Egipto tä on'älit tä wuj tä okhajyhayaj ihi. Matche, ts'ilak olham chik let'upihchä n'oyej wet len'okwiyay n'oyej, lhäy'e chik lewoyay ow'ayhata. ₃₇Wet woyaye ilhokej olhämtes lhäy'e ochufwenyajay, lhäy'e ilhokej m'ak tä olesayen tä ow'en amhohen yämlek lewoyaye. Wet yej lhen awuka dios lhayis iyhäj. ₃₈Yej p'ethatlä olhämet tä kalelhäj tä owoyejte amehen, wet yej lhen awuka dios lhayis iyhäj. ₃₉Mat ts'ilak olham tä ohäpe aka Dios chik lhenn'o Awuka, wet olham ofwayhthila amejen ilhokej atayhfwas.

₄₀Mat wichitso lhamel iwohiyet'a Lhawuk lhämtes, mat lhamel ihän t'at lakeyis tä pajche. ₄₁Wet lhamel n'okwiyej Lhawuk, mat kamaj lhamel ithatlä lecheyälis tä lhamel n'okwiyej. Wet leles lhäy'e lechetsos lhamel iten lechätilis lakeyis, wet kamaj iwoye yäk fwalasna.