2~Ped 3

₁Ipuhfwas tä oalehumnhay, häp täja oka carta elh tä segunda tä ochen amehen. Wet häp cartana lhäy'e elh tä ichunte, häpe t'at olhämtes tä ot'uhläk is alhoho atichunhayajay, ₂häpkhilek tek lep'ethatlä n'olhämtes p'ante tälhe Dios laka profetas tä t'amajchetes, lhäy'e Lhawuk tä Lhafwayhthi lhämtes tä laka apóstoles ichufwen amejen.

₃Chunkat enay atichunhayaja tä ifwalas chik lepese nämhihena hin'ol tä aläkwyhantses wet iwohiyela lenech'ethayajay tä ni'isachehen. ₄Lhamel yohipejakwe leläkwyhanyaj, “¿Chipte tä kamaj ninäma Cristo tä fwetaj tapinla? Yäk lhajchalis y'inhen t'at, mat kamaj mälhyet lham tälhe täjp'ante nech'e honhat iche.”

₅Lhamel tek t'uhläk yen tichunhayaja tä tälhe tä nech'enyaya iche t'at pule, wet Dios lhämet t'at tä ne'tek honhat tälhe inät, wet tä isej inät honhat iche t'at. ₆Häte häpe t'at inät tä wuj, häp pelhay, tä itäyhat p'ante wichi tä i'pe honhat. ₇Wet häp pule lhäy'e honhat tä iche athana, Dios lhämettso häpe t'at tä t'amajej, iniwhatejlä itäj tä wuj chik nichäte ifwala tä ikalelhthen wichi wet itäyhthen lhamel tä lakachuhanyaj ihi.

₈Häte ipuhfwas tä oalehumnhay, is chik lehanej, häpet Lhawuk, ifwala weihalha hätet chik mil nekchämes, wet mil nekchämes hätet chik ifwala weihalha. ₉Häpkhit'a chik Lhawuk ipantej yämthilek iwoye m'ak tä ifwel, mälhyej tä elhpej yäme. Mat iteläytej t'at, tsi ihuminhit'a chik elh amel tatäy, mat t'uhläk nilhokej iwo lehusey iyhäja.

₁₀Mat ifwala tä Lhawuk tapinla, mälhhiyejat iwoye etantsaj tä näm tä iselkat wichi. Wet ihichela lepak tä äytaji wet pule wasihila, wet itäj iwunhihomchela m'ayhay tä iche pule. Wet honhat lhäy'e nilhokej m'ayhay tä ihi nech'e ihihila Dios lakalelhthayaj.

₁₁Wet tä nilhokej m'ayhay mälhhiyejatso chik wasiche, ¿atsi m'ak tä t'uhawetej chik lewoyaye? Oyok, iwatläk lhämay matche tä alhenay t'amajchetesayej Dios wet lenuyaykwe t'at lham len'äyij. ₁₂Nihihlä Dios laka Ifwala chik nämla. Yej alenahhatej m'ak at chik häpe, häpkhilek näm thahya. Häp Ifwalatso itäj iwasthihila pule, wet m'ayhay tä iche pule y'uhohla yäk wachuhiche. ₁₃Mat n'amel y'aniwhihlä pule tä nech'ayek lhäy'e honhat tä nech'ayek tä pajche Dios ifwel, tä häpkhila n'o'isyaj lew'et.

₁₄Ipuhfwas tä oalehumnhay, tä leniwhihlä m'ayhaytso akhajyenhen, häpkhilek Dios hiw'en tä atamsekis iyeji t'at häp lham, wet niwohit m'ak chik yen tesa amejen. ₁₅Is chik lehanej tä Lhawuk iteläyit n'amejen, häp tä t'uhläk y'atfwayhen. Wet häte lhapuhfwa Pablo tä wuj tä n'amel y'ahumin, pajche ichen amehen lhämet tä ifwel amhohen tähestso, häp tä isej lehanyaj tä Dios hiw'enho. ₁₆Nilhokej laka cartas hip'ajtejpej tä yäme tähestso, tej tä iche elhpej lhämet tä athaho wichi tä nhanayej lhäy'e iyhäj tä lechayaj nitkhajayahen. Wet häp tä lhamel itilhkathi, mälhyej tä itilhkathi N'olesaynhay iyhäj tä N'ot'amajchetes, wet tamenej tä lhamel tiyäje t'at letäyhyaj.

₁₇Tä mälhyejtso, ipuhfwas tä oalehumnhay, häp amel tä pajche lehanej m'ayhaytso, oyok, Amaj amejen häpkhilek tek aiwetahathen iyhäj tä ni'isahen, wet kachäta katsi tä lhehi Lhawuk len'äyij. ₁₈Mat is chik lhäy'epej lhip tä letäfwelayej Lhawuk Lhafwayhthi Jesucristo wet alechiheltejen lep'altsenyaj. ¡Is chik lewujyaj iyej athana wet yämlek tiyäj'attsiy! Amén.