Natán ifwenho David häp Dios lhämet tä äytajche
1Lhawuk ichene p'ante profeta Natán häp David. Tä ichäte, ifwenho tä yok:
–Iche täkwfwas hin'ol, elh hiw'en m'ayek wet elh häpe hin'o tä p'elitsaj. 2Elh tä hiw'en m'ayek wujpe tson'atas lhäy'e w'asetas tä hiw'en. 3Mat elh tä p'elitsaj tek wo m'ak chik hiw'en, ts'ilak tson'ataj lhäsaj tä ichäj p'ante. Wet lham t'at tä ichihelit, wet iyej t'at lham lhäy'e leles. Wet ichufwiyejlhi tä t'ek lhäy'e tä iyähi lhäthi, wet itsufwelej tä imä. Matche tä ihumin, hätet iwoye lhäse. 4Wet iche ifwala tä näm hin'o tä isikaye elh tä hiw'en m'ayek. Mat hin'o tä hiw'en m'ayek tek ichuma elh leläy tson'atas wok w'asetas yämlek yenhoplhi lakasiyak lhäk. Mat ichuma hin'o tä p'elitsaj lelä tson'ataj lhäsaj wet yenlhi lhäk yämlek lakasiyak tufw.
5Tä David iläte m'ak tä Natán yäme, wet wuj tä tawäkwäych'oye hin'o tä hiw'en m'ayek. Wet tahuyej Natán tä yok:
–Kalelhäj olhämet, mälhyej tä Lhawuk iläy, oyok, ¡Elh tä iwoye täjtso t'uhawetej chik y'il! 6¡Wet iwatläk tiskanpe laha tä t'uhawetej cuatro tson'ataj les, tsi isit'a m'ak tä iwoye tä nip'altsena elh!
7Wet Natán ifwenho David tä yok:
–¡Am ahäpe hin'o tä oyäme! Wet Lhawuk, Israel laka Dios, lhämet yokwe, “Olham tä otshupihte ame yämlek ahäpe Israel laka rey. Wet ofwayhatte amej Saúl, 8wet oyachajte ame lew'et, lhäy'e laka'tsinhay tä lech'efwas, wet oayen niyatayej Israel lhäy'e Judá. Häp kamaj täjtso, wet oy'isiyejn'e m'ayhay iyhäj tä ow'en amho. 9Tä mälhyejtso, ¿chäte tä lhen w'et m'ayeka olhämet tä lewoye m'ak tä ni'isa tä n'am huminche? Lelän Urías, häp Het lhayis elh, tä lelänej Amón lhayis, wet lechuma atsinha tä lech'efwa wet lhen hach'efwaya. 10Tä mälhyejtso, tä lhenn'o w'et m'ayeka tä leti amej atsinha tä Urías lech'efwa, tek ihichela chik täyej haw'et m'ak tä ni'isa wet nemla letamsek ihi haw'et lheley. 11Olham tä Awukn'o olhämet yokwe, Otihla amej m'ak tä ni'isa tä tälho am haw'et lheley. Wet am lew'enla chik ochumhiyela atsinhay tä hach'efwas wet oyachajiyela aelh, wet lham imähiyejena lhamel tä ihi tä ifwala. 12Am lewoye m'ak tä leskat. Mat olham owohiyela m'ak tä owoye tä ihi tä ifwala, yämlek ilhokej Israel lhayis hiw'en.”
13Tä David iläte Dios lhämet, ichulho Natán tä yok:
–Owoye osukyaj. Otayhlä häp Lhawuk.
Wet Natán yok:
–Lhawuk itiyej kanhi asukyaj. Tek ley'inhila. 14Mat tä lewoye m'ak tä wuj tä ni'isa tä lhen w'et m'ayeka häp Lhawuk, wet äs tä nech'e iche tä y'inhila.
15Wet Natán yäple lew'et.
Y'il David lhäs tä nech'e iche
Wet Lhawuk ichene t'inhayaj han'äfwaj tä atsinha tä Urías lech'efwa iwo lhäsahlä David. Wet wuj tä äytaj. 16Wet David lhaip'altsene Dios tä y'alhyene han'äfwaj, wet lhaichuyhat. Wet honatsipej imähi honhat. 17Wet hin'ol tä thänhäy tä iyej lew'et, lhamel ihoye, ne'tek inephä tä ihi honhat. Mat lham iwohiyet'a, wet tek ichufwiyej lhamel tä t'ekhen.
18Wet tiyäme siete ifwalas, wet y'il han'äfwaj. Wet David lakawos lhamel nowaye tä ifwenho tä y'il han'äfwaj. Wet lhamel tahuy lhamejen tä yok:
–Täjnaj kamaj iläy han'äfwaj, n'amel y'atahuyejpej wet tek hich'ahu n'amehen. Athana chik y'afwenho tä y'il han'äfwaj, elak nem is m'ak tä iwoye.
19Tä David hiw'en lakawos tä tahuy lhamejen, wet itiyej tä pajche y'il han'äfwaj. Wet tahuyej lhamel tä yok:
–¿Hä y'iln'e han'äfwaj?
Wet lhamel ichulho tä yok:
–Ey'a, y'ilne han'äfwaj.
20Wet David inephä tä ihi honhat wet inay, iwo lenija tä akäjche wet iwo iyhäja lakhäy, wet ihochufwi Lhawuk lew'et yämlek n'okwiyej. Tä ileyej, wet ihoye lew'et wet t'alhch'oye lhäk wet tufw. 21Wet lakawos y'ätshane tä yok:
–¿Atsi m'ak tä lewoye? Täjnaj kamaj iläy han'äfwaj, am alechuyhat wet letafwlhi. Wet athana tä y'il han'äfwaj, nech'e lenephä, letufw äk.
22Wet David ichulho tä yok:
–Täjnaj kamaj iläy han'äfwaj, olham olhaichuyhat wet otafwlhi tä oyen tichunhayaja tä oyok, Elak Lhawuk hip'altsen n'oye wet iläyit han'äfwaj. 23Mat athana tä y'il han'äfwaj, ¿atsi m'ak tä tumenej chik olham olhaichuyhat? ¿Hä iwoye tä oläyit? ¡Kha! ¡Chik ichäte lewhäy, olham ohohiyela lham, mat lham ihanhiyejt'a iho n'oye!
Salomón nech'e iche
24David ikäjyenlhi lech'efwa Betsabé, wet imäyej, wet iwo lhäsa, wet David iwo lheya han'äfwaj tä yen lheya Salomón. Wet Lhawuk ihumin han'äfwaj, 25wet ichene David häp profeta Natán, ne'tek ifwenho tä yok:
–Lhawuk ihumin t'at häp han'äfwaj.
Wet häp tä David y'isej elh lhey tä iwoyeje han'äfwaj, wet yen lheya Jedidías, tä letetnek tä Lhawuk lehumnek.
David itayhlä honhat lhip tä lhey Hup Lhokwetaj wet lhayen lewuka
26Wet Joab iwo laka'tshayaja tä itayhlä Amón lhayis kahupuy tä lhamya tä lhey Hup Lhokwetaj. Wet tä ataj tiyäjiho p'ante, 27wet ichene lesilätwos David wet lhamel ifwenho tä yok:
–Joab lhäy'e laka sip'älis itayhlä Hup Lhokwetaj, wet wichi tä ihi nemhit hiw'en waj, tsi Joab lhayen lewuka honhat lhip tä tumejlä tewok. 28Athana, iwuk, is chik lehutwek sip'älis iyhäj tä imälhehi wet taylahlä hupuy, tiyäjola, yämlek tek häpe olham tä ochuma wet tek õ'tiyej olhey.
29Tä mälhyejtso, David ihutwek ilhokej laka sip'älis wet lhamel ihoye tä itayhlä Hup Lhokwetaj wet itsoklhi. 30Wet isoyej rey lhetekp'ot tä oro tä hiw'en tuntey tä isis wet hiw'en treinta y tres kilos, wet õ'ti'pe David lhetek. Hätej lhäy'e wujpe m'ayhay tä laha ihi tä David ichumahen tä ihi hupuy. 31Wet David itonphä wichi tä imälhehi hupuy wet ichumyenthä. Iyhäj yisthen hal'äy lhäy'e tä ichuma chinhas lhäy'e hosan. Hätej iyhäj tä ichuma õnhonthis, yenlhi ladrillos. Wet mälhyejtso tä David iwoyeje ilhokej Amón lhayis tä ihiche hupuy iyhäj. Wet David yäple Jerusalén, lhäy'e ilhokej laka sip'älis.
