2~Tes 2

_1-2Athana ipuhfwas, häpet lewhäy chik Lhawuk Jesucristo nämla wet y'alhaihuthiyejawek häp lham, iche wichi tä yäme tä näm t'at häp ifwalatso. Mat olhamel olhaip'altsen amehen tä oyok, Chik lelätaye n'olhämet tä mälhyejtso tä elh chik häpe yäme, yej tach'anlhaye chik itilhkathi atichunhayajay. Tej chik fwetaj Dios laka Espíritu yämyenlhi, wok iche p'iya carta chik nichät amehen tä hätet iwoyek tälh n'oyehen, mat yej nuhat amhohen, ₃wet yej tach'anlhaye chik elh at chik häpe ikan amejen. Tsi chik kamaj ninäma ifwalatso, wujla'pey wichi chik iwomla Dios wet tatayhlä, wet n'änhila Hin'o tä häpe M'ak tä Ni'isa T'isan, häp elh tä n'otäyhyaj lhäs. ₄Lhamtso tatayhlahlä nilhokej m'ak tä õyen lheya dios lhayis lhäy'e tä õ'tiyej n'on'okhayaj, wet häte yenla lew'eta Dios Lew'et tä T'amajchet, wet tatayhihiphäla wet yohlak, “Olham ohäpe Dios.”

₅¿Hä letichunache täjte oi'amejen tä oyämepej tähestso? ₆Wet lehanej t'at m'ak tä häpe tä itsoklhi athana, pajla'tha nichäte lewhäy chik n'änhila. ₇Ifwalasna iche t'at häp M'ak tä Hich'atej tä Ni'isa tä tälhe Hin'otso. Tej tä nin'äla, mat ihi t'at honhat. Mat chik õ'tihiyeja kanhi häp n'okhajyhayaj tä itsoklhi, ₈wet nech'e häpkhilek n'äl Hin'otso. Mat chik äp paj wet nämla Lhawuk Jesús, wet ilänhiyeja leyalh tä tälhche lhayhi wet itäyhthiyeja leleplehyaj.

₉Wet häpet Hin'otso tä häpe M'ak tä Ni'isa T'isan chik näm, oyok, Satanás lakhajyhayaj nekhichela, wet yenhilhila m'ayhay tä iselkathiyeja wichi, lhäy'e letetnhay tä kamatachehen. ₁₀Wet yenhilhila nilhokej m'ayhay tä ni'isachehen tä ikanejen wichi tä ihoye t'at letäyhyaj, häp lhamel tä nitchumahlä m'ak tä matche mat y'ulhan, wet tek tafwayhen. ₁₁Häp tä tamenej tä Dios yen n'otkanyaj kwenkaya lhamel, yämthilek t'ekhaye m'ak tä kamatache. ₁₂Tä mälhyejtso, nilhokej wichi tä ikachuye m'ak tä matche, mat yen lakäjyaja m'ak tä ni'isa, Dios itiyej t'at letes.

₁₃Mat olhamel owopej graciasayej Dios atapehen, ipuhfwas tä Lhawuk lehumnhay, tsi Dios tatshupi amehen yämthilek ahäpehen wichi tä ichun tä ikatej n'ofwayhyaj, häp tä isej laka Espíritu tä ayen t'amajchetesa lhäy'e tä let'ekhaye m'ak tä matche. ₁₄Häp täjtso tä tamenej tä Dios t'än amehen, häp tä isej Lesilätyaj tä olhamel owohte siläta amejen, häpkhilek i'amejen Lhawuk Jesucristo lewujyaj. ₁₅Tä mälhyejtso, ipuhfwas, akhajyenhen wet tsokaylhi ochufwenyaj tä olhamel ofwelte amhohen wok otihi oka carta tä ochennaj amehen.

₁₆Wet athana oy'alhyen amehen häp Lhawuk Jesucristo lhäy'e Dios Lhajcha tä n'aihumnhen, lhäy'e tä n'aip'altsenhen tä iti n'amejen lakhajyhayaj tä najit lepesa lhäy'e lhaniwhayaj tä is. ₁₇Is chik wuj tä ikhajyenhen ahusey, yämthilek matche tä isen nilhokej ämtes lhäy'e m'akpej tä lewoye.