2~Tes 3

₁Tä lepese ipuhfwas, alhyen n'oyehen Dios häpkhilek lhämet iläfwel tä yikpe honhat wet äp wichi iwujyen tä tachumlä, mälhyej täjte amel lewoye. ₂Häte alhyen n'oyehen Dios yämthilek olhamel laj owit'äyahlä häp hin'ol tä fwitses lhäy'e tä ni'isahen, tsi nilhokhiyejt'a wichi tä lechayaj ihi.

₃Mat Lhawuk häpe t'at afwtintsaj, wet aikhajyenhihena wet äp t'uhla amehenlä m'ak tä ni'isa. ₄Wet olhamel oisej Lhawuk wet häp tä ochaye tä kalelhäj tä amel lewoye m'ak tä olhamel ofwel amhohen wet letujlhahichela t'at. ₅Is che Lhawuk ipäyen amehen yämthilek lhäy'epej lhip tä leti amejen Dios lehumnhayaj, lhäy'e tä Cristo aikhajyenhen tä ateläythayaj ihi, mälhyej tä lham iteläytej p'ante.

₆Ipuhfwas, tä Lhawuk Jesucristo lhämet n'oyejen, oyok, Yej alep'ajtayej apuhfwa che häpe che n'etäjej lechumet wet niwoyaye ochufwenyaj tä ochufwente amejen. ₇Tsi amel lehanej t'at m'ak tä t'uhawetej yämthilek leten m'ak tä olhamel owoye. Tsi tä olhamel oihte amejen, otchum'atwethä ₈wet otiskan'atpe elh che häpe lhäk tä otufw. Fwalapej honatsipej lhäy'e lhip tä oy'enhen tä otchumwethä, häpkhilek niwohit elh che nahayejlhi m'ak tä owatlä. ₉Tej tä t'uhawetej t'at che amel letach'ot n'oyehen, mat olhamel owohiyet'a, otchum'atwethä tsi ot'uhläk letenay t'at m'ak tä owoye. ₁₀Tä oihte amejen, ofwelpej amhohen tä oyok, Oelh che nit'uyahläk tachumlhi, häte isit'ak iwatlä lhäk.

₁₁Mat olhamel ohanch'oye tä iche t'at iyhäj tä i'amejen tä n'etäjej lechumet, wet lhainahhatejwethä m'ak tä iyhäj iwoye. ₁₂Tä mälhyejtso, tä Lhawuk Jesucristo lhämet n'oyejen, ofwenho lhamel tä oyok, Chumaywethä, woye t'at achumet, häpkhilek iche m'ak tä aisej.

₁₃Mat häpet amel, ipuhfwas, yej t'elej tä lewoye m'ak tä ischehen. ₁₄Che iche elh tä nitch'ahuyaye m'ak tä ofwel amhohen tä ihi cartana tä ochen amehen, tetshan elh tä häpe, wet yej alep'ajtej, häpkhilek n'äfwelh. ₁₅Mat yej lhen atayhfwaya, tsi apuhfwa t'at, mat ämhoplhi, nityenej che ileyej tä ikachuye m'ak tä oyen lhämeta.

₁₆Is che Lhawuk tä n'otamsek tälhe, hiw'enpej amhomche atamsek, m'ak at che häpe che lewoye. Wet is che Lhawuk iyej nilhokej amel.

₁₇Olham Pablo olesayen olhämtes tä on'okhayajna tä ilepese. Mälhyej lhampej otihi olhey nilhokej oka cartas tä ochene wichi. ₁₈Is che Lhawuk Jesucristo lep'altsenyaj iyej nilhokej amel.