Ap.Lh 13

₁Häp Dios leles tä ihi Antioquía, iche profetas lhäy'e n'ochufwenyajwos tä iyej lhamel. Häpehen Bernabé, lhäy'e Simón tä õyen lheya N'ochalaj, lhäy'e Cirene lhele tä lhey Lucio, lhäy'e Menahem, häp elh tä lew'awlhafwa Herodes tä Galilea laka niyat, lhäy'e Saulo. ₂Fwala elh p'ante tä lhamel lhaihutwek tä n'okwiyej Lhawuk lhäy'e tä lhaichuyhathen, wet Espíritu tä Dios T'amajchet tahuyej tä yok:

–W'enhat n'oyej Bernabé lhäy'e Saulo yämlek iwoye lechumet tä olham ot'äneje.

₃Wet tä wichi ileyej tä lhaichuyhathen lhäy'e tä iwo t'alhyaja, iti'pe takweyey häp lhamel wet iwo tsilhekayej.

₄Espíritu tä Dios T'amajchet ichene lhamel häp hupuy tä lhey Seleucia, wet nech'e yikche barco wet ihoye lhiletaj tä Chipre. ₅Wet Juan Marcos häte yikche tä tach'ote lhamel. Tä lhamel nichätho hupuy tä lhey Salamina, ihoyehen häp Judío lhayis kan'ohusew'etes wet yen lhämeta Dios lhämet.

₆Tä yikch'oye Salamina, inukwe lechowej lhiletaj yäk nichäte hupuy tä Pafos. Wet nilhokpe Judío tä lhey Barjesús tä häpe profeta tä kamatache lhäy'e tä hiyawu, ₇wet iyej honhattso laka gobernador tä lhey Sergio Paulo. Niyattso häpe t'at hin'o tä lehusek ihi, wet t'äne häp Bernabé lhäy'e Saulo tsi t'uhläk iläte Dios lhämet. ₈Mat häp hiyawutso, tä äp õyen lheya Elimas, tach'anlhahiyet'a wet wuj tä lhaikhajyen, t'uhläk n'äyejo niyat chik iwo lechayaja. ₉Mat Saulo, tä äp õyen lheya Pablo, Espíritu tä Dios T'amajchet tapoyej, wet iyahin häp hiyawu ₁₀wet tahuyej tä yok:

–¡Ahäpe hin'o tä lhäy'e lhip tä ni'isa, a'akantsaj lhäy'e tä m'ak tä is letayhfwa! Oyok, ¡ahättaj t'at tä alhäs! ¿Chipte tä kaleyayej tä lefwetaj lekänchi Lhawuk len'äyhäy tä ische alhoho? ₁₁Athana lhek yahinya, Lhawuk aitasnhila wet a'asnamla wet nemla lew'en ayej fwala.

Häpet tä mälhyejtso, honatsi nichätpe lham wet tachasch'oye elh chik häpe chik itsok takwey. ₁₂Tä gobernador hiw'en täjtso, iwo lechayaja, wet wuj tä t'iseltej häp n'ochufwenyaj tä yämeje Lhawuk.

₁₃Tä paj Pablo lhäy'e t'unfwas yikch'oye Pafos wet yikche barco tä ihoye hupuy tä lhey Perge tä ihi honhat lhip tä Panfilia. Wet Juan Marcos ileche lhamel wet yäple Jerusalén. ₁₄Lhamel tujlhache len'äyij wet nichäte Antioquía, häp hupuy tä ihi honhat lhip tä Pisidia. Wet fwala tä n'ot'elakw'et lhamel ihoye Judío lhayis kan'ohusew'et wet tatachephä. ₁₅Wet tä õ'leyej tä õyahyen Dios lhämet tä ihi Ley p'ante tälhe Moisés, lhäy'e tä ihi profetas lesaynhay, häp hin'ol tä itetshan n'ohusew'et lechumet iwo chenekaye Pablo lhäy'e Bernabé yämlek tay'ätshane chik iche p'iya lhämet chik ikhajyenej wichi.

₁₆Tä mälhyejtso, Pablo nephä wet takwey y'aje wichi yämlek iwo letamseka. Wet yok:

–Israel lhayis lhäy'e wichi iyhäj tä lewunitaypej Dios, ch'ahuyaye m'ak tä oyäme. ₁₇Häp Israel lhayis laka Dios tatshupiye p'ante lhatetsel wet yen häpeya wichi tä wujpe tä lhamel ihi p'ante honhat tä Egipto tä kalew'eta. Tä paj wet lakhajyhayaj tä wuj itonphä lhamel tä tälhe honhattso. ₁₈Wet cuarenta nekchämes tä iteläytej m'ak tä lhamel iwoye tä ihi ts'anis, ₁₉wet itäyhat wichi tä ihiche siete naciones tä ihi Canaán, wet lew'etestso yachaje laka wichi wet yen lewuhuya. ₂₀Wet nilhokej tähestso pajtha cuatrocientos cincuenta (450) nekchämes tä iche.

“Tä tajyäme täjtso, nech'e iwo laka niyateya yäk nichäte lewhäy tä profeta Samuel ihi. ₂₁Tä paj wet lhamel t'alhch'oye chik iche niyat tä rey, wet Dios hiw'enho lhamel Saúl, häp Cis lhäs, tä Benjamín lhayis elh, wet lham niyatej Israel pajtha cuarenta nekchämes. ₂₂Ilepese Dios isoyej leniyatyaj Saúl wet hiw'enho David. Wet yok, Ow'en tä Isaí lhäs David häpe hin'o tä okäjejlhi, wet iwohiyela nilhokej m'ak tä onech'ethayaj.

₂₃“Wet häp tä leles tä lepes lheley elh häpe Jesús, häp lham tä Dios ichene Israel lhayis yämlek ifwayhthen, mälhyej lhämet p'ante hit'untejche wichi. ₂₄Wet tä kamaj ninäma Jesús, Juan yen lhämetayej nilhokej Israel lhayis wet yok, Woyay ahusey iyhäja wet abautisaynhen. ₂₅Wet tä Juan tott'aye lepes lechumet, yok, Ohäpkhit'a elh tä lhenayek ohäpe. Mat lhamtso nekche on'äyij, wet olham matche tä n'am t'uhawetej chik olanhi lenisäj t'ak.”

₂₆Wet Pablo äp yok:

–Ipuhfwas tä Abraham aleles, lhäy'e wichi iyhäj tä len'okwiyejpej Dios, häpe t'at n'amel tä Dios ichen n'amehen häp lhämetna yämlek n'aifwayhthen. ₂₇Tsi wichi tä ihi Jerusalén lhäy'e laka niyatey, lhamel tek nitäfwelej p'ante tä Jesús häpe N'ofwayhthi. Wet tej tä fwalapej tä n'ot'elakw'et lhamel yahyenpej profetas lhämtes p'ante, mat ihanhiyejt'a. Wet tä itiyej letes Jesús, nech'e yäm matche profetas lesaynhay p'antetso. ₂₈Tsi tej tä lhamel niw'enat thayej m'ak chik tamenej yämlek õ'län, mat t'alheje Pilato tä ne'tek õhp'ajtej cruz. ₂₉Wet tä lhamel iwoyeje nilhokej m'ak tä N'olesaynhay yämeje tä mälhhiyejatso, wet ilanhi lep'itsek tä ihi cruz wet ithatho n'op'itsekw'et. ₃₀Mat Dios inuhatphä tä tälho n'op'itseyhay, ₃₁wet wujpe fwalas tä lhain'ältej iyhäj tä nekche tä tälhe Galilea tä ihoye Jerusalén. Wet athana lhamel t'at tä yäme lham wet ifwenhomche wichi.

_32-33“Tä mälhyejtso, olhamel ochäj amehen Dios Silätyaj tä Isna tä yok: Dios yäm matche lhämet p'ante hit'untejche lhatetsel, tsi inuhatphä Lhäs Jesús tä tälho n'op'itseyhay. Mälhyej lhämet tä ihi Salmo Dos yok,

₃₆“Kalelhäj tä David iwoye t'at Dios lechumet tä kamaj ip'ante'pe honhat. Mat tä ileyej honhat, õtjänch'oye tä iyej lajchalis p'ante wet t'isan najut t'at. ₃₇Mat häp Hin'o tä Dios inuhatphä tä tälho n'op'itseyhay, t'isan najuthit'a. ₃₈Wet athana ipuhfwas, ohanhat amejen tä Jesús lakhajyhayaj ihi chik itäyhthen n'och'isukyajay, wet häp tä isej lham owo siläta amejen täjtso. ₃₉Wet elh chik t'ekhaye tafwayej nilhokej m'ayhay tä Ley p'ante tälhe Moisés nhanayej iwoyneje chik ifwayhtej. ₄₀Tä mälhyejtso, uyayhlä, häpkhilek nichäta atapehen awit'äy tä profetas p'ante yäme tä yok,

₄₂Tä Pablo lhäy'e t'unfwas inukwephä tä tälhchufwi n'ohusew'et, wichi t'alheje lhamel wet yok:

–Is chik lhachajo tä lhäme m'ayhayna chik elh fwala tä n'ot'elakw'et.

₄₃Wet tä nilhokej wichi inukwephä, wujpe lhamel tä Judío lhayis, lhäy'e wichi tä pajche lhayen häpeya iyhäj tä iwoye Judío lhayis t'ekhahyaj, lhamel yikche Pablo lhäy'e Bernabé. Wet Pablo lhäy'e Bernabé ifwenho lhamel tä yok:

–Yej lhekaych'oye Dios lep'altsenyaj tä iti amejen, mat akhajyenhen tä letujlhayache.

₄₄Tä semana elh, häp fwala tä n'ot'elakw'et, nem koyhyaj tä wuj wichi tä lhaihuthiwek n'ohusew'et, t'uhläk iläte Lhawuk lhämet. ₄₅Mat tä Judío lhayis hiw'en tä wujpey wichi, wuj t'ischenyaj, iläkwlhi Pablo wet tatayhlä lhämtes. ₄₆Mat Pablo lhäy'e Bernabé lhaikhajyenhen wet nichulho tä yok:

–T'uhawet at n'oyejen tä ochunkat amel tä ahäpehen Judío lhayis tä owo siläta amejen Dios lhämet. Mat tä letiyayej kanhi wet lefwetaj at'uhawethiyejt'a chik lekatej n'ow'atshancheyaj tä t'un, olhamel oyikhila hach'oyehen wet ohoye wichi tä kahäpeya Judío lhayis. ₄₇Tsi mälhyejtso tä Lhawuk ne'tek owoye tä yop'antekwe:

₄₈Tä wichi tä kahäpeya Judío lhayis iläte täjtso, wuj tä akäsejwethä wet yok:

–¡Wuj tä is Lhawuk lhämet!

Wet lhamel tä Dios itshupyeneje n'ow'atshancheyaj tä t'un iwo t'ekhahyaja, ₄₉wet Lhawuk lhämet y'ajpe mälhewek häp honhattso. ₅₀Mat Judío lhayis tahuyej atsinhay tä lewujyaj ihi tä ifwutepej laka n'ohusew'et, lhäy'e häp hin'ol tä len'ohyajay ihi, wet inityenej lhamel chik itiyej laka'tshayaj häp Pablo lhäy'e Bernabé yämlek yokwes wet yikch'oye honhattso. ₅₁Wet Pablo lhäy'e Bernabé isichätchä honhat tä ihiche lepach'ol tä yen tetnekayej tä matche tä letes ihi wichitso. Wet yikhen tä ihoye hupuy elh tä lhey Iconio. ₅₂Mat Dios leles wuj tä lakäjyaj ihi wet Espíritu tä Dios T'amajchet tapoyej lhamel.