Ap.Lh 14

₁Tä Pablo lhäy'e Bernabé ihi Iconio, ihoye Judío lhayis kan'ohusew'et. Hätet iwoye tä lhamel ihi Antioquía, tä wichi iläte lhämtes tä iwoye, wujpe lhamel tä ichaye, häp Judío lhayis lhäy'e wichi iyhäj. ₂Matkat häp Judío lhayis tä nitch'ahuyaye inityenej wichi iyhäj yämthilek isitäyen Pablo lhäy'e Bernabé. ₃Mat häp Dios lakawosna pitaj lewhäy tä ihi hupuytso wet lhaikhajyenhen tä yen silätyaja Lhawuk lep'altsenyaj. Wet Lhawuk yäm kalelhäj m'ak tä lhamel yämena, wet hiw'enho lakhajyhayaj yämthilek yenlhi letetnhay lhäy'e m'ayhay tä wichi t'iseltejen. ₄Mat wichi tä ihi hupuytso, iche iyhäj tä yok:

–Is alhoho m'ak tä Judío lhayis yäme.

Wet iyhäj yok:

–Apóstoles tä is alhoho m'ak tä yäme.

Wet tek w'awulhchä wichi letichunhayajay. ₅Wet elhpej Judío lhayis, lhäy'e iyhäj tä kahäpeya, lhäy'e niyatey, lhamel y'ajwek lehusey yämthilek inuye apóstoles wet ipäjwethä wet ithatejwethä tuntey. ₆Mat tä Pablo lhäy'e Bernabé ihanch'oye, yikhen tä ilethane Listra lhäy'e Derbe, häp hupuy tä ihi honhat tä Licaonia, lhäy'e lhipey tä tott'ahomche, ₇wet yen lhämeta Dios Silätyaj tä Is.

₈Iche p'ante hin'o tä ihi Listra tä tsufwlaj tälhe tä nech'e iche, takäläy tak'efwichehen wet ihanhiyejt'a che yik. Häp hin'otso tatayphä t'at ₉wet tach'ahuye m'ak tä Pablo yäme. Wet tä Pablo iyahin, nitäfwelej tä lechayaj ihi yämthilek iches. ₁₀Tä mälhyejtso, Pablo ifwitsenej lechos tä yok:

–¡Nephä, atshupyenchä tä letakasit!

Wet hin'o tiyäjphä tä nephä wet nech'e w'eleklhi. ₁₁Tä wichi hiw'en m'ak tä Pablo yenlhi, lhamel t'änhen wet iten lhämet tä Licaonia lheley wet yok:

–¡Dios lhayis tä lhaitech'aynej hin'ol tä inuhchä wet iho n'amehen!

₁₂Wet nech'e lhamel yen lheya Zeus häp Bernabé, dios lhayis kaniyatpa, wet yen lheya Hermes häp Pablo, dios lhayis kachenekpa, tsi lham tä n'olhämetwo tä lhamya. ₁₃Wet häp Zeus laka sacerdote, tä laka n'ohusew'et ihi tä hupuy tatache, lham nech'e ichäj alhoho w'asetas tä hiw'uyyeneji hal'ä lhawol tä isilatyenejen, tsi lham lhäy'e wichi t'uhläk ilänhen wet yen n'okhayajayej Bernabé lhäy'e Pablo. ₁₄Mat tä lhamelna ihanej, hich'esajche lhamel lew'uyis tä yen tetnekayej tä matche tä nhumina m'ak tä wichi iwoye. Wet inukwe alhoho tä tiyäjo lhamel lechowej wet t'änhen tä yok:

₁₅–Yaiyhäj, ¿chipte tä lewoyaye täja? Tsi olhamel ohin'ol t'at, mälhyet iwoye amel, wet oho kana tä owo siläta amejen Dios Silätyaj yämthilek leleyej m'ayhay tä mälhyejenna tä niwohit m'ak che aisej, wet lechaye Dios tä iläy, häp lham tä yenlhi pule lhäy'e honhat lhäy'e lewomekitas, lhäy'e nilhokej m'ayhay tä ihiche. ₁₆Häp ifwalas tä pajche Dios tach'anlhaye t'at tä elhpej iwoye m'ak tä ihuminche tä iwoye. ₁₇Mat tej tä mälhyej'attso thayej, Dios ipäynepej wichi tä lham häpe t'at Dios tä matche, häp tä isej m'ak tä is tä iwoyejepej lhamel. Ichenpej amehen pelhay, lhäy'e yachuyaj, lhäy'e äk tä naya yämthilek akäjyaj i'amejen.

₁₈Mat tej tä Pablo ifwenho tähestso wichi, mat tatäy lhimphaj che nikalhahi tä n'äyejo lhamel tä t'uhläk ilänhen w'asetas wet yen n'okhayajayej lhamel.

₁₉Tä paj nämhen Judío lhayis tä tälhe Iconio lhäy'e Antioquía tä ihi Pisidia. Lhamel ikalhi wichi yämthilek iwo elha m'ak tä yen tichunhayaja, wet nech'e wichi ithatejlhi tuntey häp Pablo. Wet tä yenek y'il, iton w'echehi hupuy. ₂₀Mat Dios leles ihoye wet lhaihutej, wet nech'e nephä wet yäpnho hupuy. Wet ifwala elh lham lhäy'e Bernabé yikhen tä ihoye hupuy elh tä lhey Derbe.

₂₁Pablo lhäy'e Bernabé yen lhämeta Dios Silätyaj tä ihi Derbe, wet wujpe wichi tä lhayen häpeya Dios leles. Tä lhamel ileyej, wet yäple Listra, lhäy'e Iconio, lhäy'e Antioquía tä ihi Pisidia, ₂₂wet ikhajyenhen Dios leles tä ihi lew'etestso, wet inityenej lhamel wet yok:

–Tujlhayache tä lechaye Lhawuk. Tsi elh che häpe che t'uhläk nichätho Dios Niyatyaj, iteläythiyeja wujpe m'ayhay tä äyteschehen.

₂₃Wet itshupyeneje iyhäj tä ihi lhipeytso yämthilek t'uye lepuhfwas tä Dios leles, wet iwo t'alhyaja'pe lhamel wet lhaichuyhathen. Tä ileyej, wet ifwenhomche tä yok:

–Is che Lhawuk tä lechayaye t'u amehen wet tach'ot amehen.

₂₄Tä yikhen, inukwe honhat tä Pisidia yäk nichäte Panfilia, ₂₅wet yen lhämetahi hupuy tä Perge häp Lhawuk lhämet. Tä ileyej, ihoye Atalía ₂₆wet yikche barco tä ihoye Antioquía, häp hupuy tä ihi Siria tä lhamel pajche tälho, lhäy'e tä Dios leles tä ihi t'ekhayejehte lham let'uhyaj yämthilek yenlhi lechumet tä nech'e ihämit. ₂₇Tä lhamel nichätho, t'äne Dios leles yämthilek lhaihutwek, wet ifwenho nilhokej m'ayhay tä Dios iwoyeje, lhäy'e tä ifwoyenlä häp wichi tä kahäpeya Judío lhayis yämthilek lhamel häte ichaye.

₂₈Wet Pablo lhäy'e Bernabé pitaj lewhäy tä iyej Dios lelestso.