Ap.Lh 17

₁Pablo lhäy'e Silas inukwe n'äyij tä tataye hupuy tä Anfípolis lhäy'e Apolonia. Tä paj wet lhamel nichäte hupuy tä wuj tä häpe Tesalónica. Wet iche Judío lhayis laka n'ohusew'et tä ihi, _2-3wet Pablo, mälhyej lakeypej tä nichätho hupuy chik häpe, ihoye n'ohusew'et. Wet tä n'ot'elakw'etpej yäk tres semanas, ifwenho lhamel Lhawuk lhämet tä yok:

–Dios lhämtes tä ihi Lehi yäme tä N'ofwayhthi tä Dios Chenek leteläythayaj ihiyeja wet y'inhila, mat äp inuhiphäla tä tälho n'op'itseyhay. Wet häp Jesús tä oyämetso tä nech'e ofwel amhohen, häpe t'at N'ofwayhthi tä Dios Chenek.

₄Iche iyhäj Judío lhayis tä t'ekhache lhämtesna wet lhaip'ajtej häp Pablo lhäy'e Silas. Häte wujpe wichi iyhäj tä n'okwiyejpej Dios, lhamel t'ekhaye, lhäy'e wujpe atsinhay tä letoyajay ihiche. ₅Mat iyhäj Judío lhayis tä nit'ekhayaye, t'ischenyaj ihi wet t'äne häp hin'ol tä w'et ihi t'at hupuy tä niwohit m'ak tä iwoye, wet ihutwek lhamel yämlek ika'tshayen wichi. Wet äp ne'tek inuye hin'o tä lhey Jasón lew'et, t'uhläk hiw'en Pablo lhäy'e Silas wet ihän alhoye wet yachaje wichi. ₆Mat tä niw'ena, lhamel itsoklhi Jasón lhäy'e iyhäj Dios leles tä iyej, wet itone niyatey tä ihi hupuy wet t'änwethä tä yok:

–¡Häp hin'olna tamenej nilhokej wichi tä i'pe honhat tä nemhit kalelhäj m'ak tä iwoye! ¡Wet athana nämhen kana, ₇wet Jasón iwo lew'eta lhamel wet iti lhamej! ¡Nilhokej lhamel inäk'äs m'ak tä lhaka niyat Romano ne'tek y'awoye, tsi lhamel yäme tä iche niyat elh tä lhey Jesús!

₈Tä niyatey lhäy'e wichi iyhäj iläte, wuj tä inuhat lhamhohen. ₉Wet ne'tek Jasón lhäy'e iyhäj tiskan letapehen yämlek letamsekis ihi wichi. Wet ileyej lhamel.

₁₀Tä honatsi Dios leles ikelittshi tä ichene Pablo lhäy'e Silas häp hupuy tä lhey Berea. Tä lhamel nichäte, tatshupiye t'at tä ihoye Judío lhayis kan'ohusew'et tä ihi. ₁₁Häp Judío lhayisna tek häte iwoye iyhäj tä ihi Tesalónica, tsi lhamel ifwoynejchehen lehusey wet wuj tä ihumin tä iläte Dios lhämtes. Wet fwalapej fwalapej itetshan t'at N'olesaynhay, t'uhläk ihanej chik matche m'ak tä Pablo yäme tä ifwenho lhamel. ₁₂Wet wujpe lhamel tä t'ekhaye, häte wujpe atsinhay tä letoyajay ihiche tä kahäpeya Judío lhayis, lhäy'e hin'ol.

₁₃Matkat Judío lhayis tä ihi Tesalónica ihanch'oye tä Pablo yen silätyaja Dios lhämet tä ihi Berea, wet lhamel yikhen tä ihoye yämlek wuj tä ika'tshayen häp wichi. ₁₄Wet Dios leles ikelittshi tä ichene Pablo häp lewomekitaj lhip, mat Silas lhäy'e Timoteo imälhehi Berea. ₁₅Iche iyhäj tä iwo t'unfwaya Pablo, lhamel yikche t'at pajtha nichäte hupuy tä wuj tä häpe Atenas. Tä paj lhamel yäple häp Berea tä yikchufwi Pablo lhämet tä ichene Silas lhäy'e Timoteo tä yok:

–Is chik lehoyay n'oye'thahya.

₁₆Tä Pablo ihi Atenas tä inihich'oye Silas lhäy'e Timoteo, hiw'en tä wuj n'ocheyälis tä ihi, tapoyejej hupuytso, wet wuj tä yen lhakliya. ₁₇Häp tä tamenej tä ihoyepej Judío lhayis kan'ohusew'et wet yämhoplhi lhamel lhäy'e wichi iyhäj tä n'okwiyejpej Dios. Häte fwalapej ihoye plaza wet yämhoplhi elh chik häpe tä ihi. ₁₈Wet häp iyhäj tä hantses tä lhey Epicúreo lhayis lhäy'e Estoico lhayis, lhamel tajwek tä iyej Pablo. Elhpej yok:

–¿Atsi m'ak tä yäme häp lhämtes länektsi?

Wet iyhäj yok:

–N'älej tä ifwel'atpe wichi dios lhayis tä w'enha lhamejen.

Lhamel iwoynejetso lhämtes, tsi häp tä Pablo yen silätyaja Jesús lhäy'e tä õ'nuhatchephä n'op'itseyhay. ₁₉Wet lhamel ihäne Pablo häp chenaj tä lhey Areópago, wet itihi tä Concilio tatache wet yok:

–Olhamel ot'uhläk ohanej n'ochufwenyaj tä nech'ayekna tä am lechäj n'oyehen. ₂₀Tsi w'enha lhamej, wet is chik ohanej m'ak tä häpe.

₂₁Lhamel iwoynejetso lhämet, häp tä Atenas lheley lhäy'e wichi iyhäj tä iwo lew'etahi ihichet'a m'ak elh chik iwoye, ts'ilak t'at tä wuj tä ihumin chik iche m'ak chik nech'ayek chik iläte wok chik yen lhämeta.

₂₂Tä mälhyejtso, Pablo nephä wet ikasthi lhamel lechowej tä ihi Areópago wet yok:

–Amel tä ahäpehen Atenas lheley, ow'en tä ahäpehen wichi tä wuj tä yen tichunhayaja laka dios chik häpe. ₂₃Tsi tä olunche hupuyna wet oyahin han'okhayajw'etes, ow'en elh altar tä lhenay amajchetayejo häp dios, wet n'olesaynek tä i'pe yok, “Dios tä N'am Täfwelej”. Wet olham ofwel amhohen tä Diosna tä amel len'okwiyayej tä katäfwelach'oye, häp tä owo siläta amejen athana.

₂₄“Häp Dios tä yenlhi honhat lhäy'e nilhokej m'ayhay tä ihi, lham tä pule lhäy'e honhat Lewuk t'at. Tek yen w'eta hup chik häpe tä n'otkwey lhenek, ₂₅wet tek iwatlä n'och'otyaj wok m'ak at chik häpe chik tälhe hin'ol. Tsi lham t'at tä iwo lew'atshancheyaja nilhokej wichi, wet iwo leyalha, lhäy'e tä hiw'enho m'ayhay iyhäj.

₂₆“Häp lham yenlhi p'ante hin'o weihalha, wet nilhokej wichi tä iche yäk nämena tälhe t'at hin'otso yämlek yen lew'eta honhat. Wet Dios ikalelhät lewhäy lhäy'e honhatil tä lhamel ihihila. ₂₇Tsi t'uhläk lhamel t'ukwe häp lham yämlek nilhoke p'iya. Mat tej tä oyäme tä mälhyejtso, mat lham tek atofwehlä elh weihalhapej n'amel, ₂₈tsi lham tä n'aisej tä n'aw'atshanwethä wet y'echehen wet y'aw'elekwethä. Iche t'at n'olesaynekwos tä iyej p'ante achätilis tä yok, N'ahäpehen t'at lham leles tä n'alepes lheley.

₂₉“Tä mälhyejtso tä n'ahäpehen Dios leles tä lepes lheley, isit'ak y'afwetaj lham hätet iwoye dios lhayis tä oro wok plata wok tunte, häp m'ak tä hin'o lhenek tä itech'aynej t'at m'ak tä lham letichunhayaj. ₃₀Häp wichi p'ante nitäfwelayej Dios tä matche lhäy'e lenech'ethayaj, Dios itetshanhiyejt'a täjtso. Mat athana ne'tek nilhokej wichi tä i'pe honhat iwo lehusey iyhäja. ₃₁Tsi lham pajche iwaklhat fwala tä iwohla lakalelhthayajayej lhamel, häp lakalelhthayaj tä is alhoho, häp tä isej hin'o weihalha tä lham pajche tatshupiye. Wet häp hin'otso Dios inuhatphä p'ante tä tälho n'op'itseyhay, yämlek nilhokej wichi ihanej tä mälhhiyejattso, mathichela tähestso.”

₃₂Tä wichi iläte lhämet tä yäme tä hin'o inuphä tä tälho n'op'itseyhay, wet iyhäj itiyej leläkwyhanyaj. Mat iyhäj yok:

–Is t'at, olhamel otch'ahuhiyela chik äp lhäme täjtso chik elh fwala.

₃₃Wet Pablo yikch'oye lhamel, ₃₄mat iche iyhäj tä lhaip'ajtej wet iwo t'ekhahyaja. Elh lhey Dionisio tä häpe elh Concilio tä ihi Areópago, häte iche atsinha tä lhey Dámaris, lhäy'e wichi iyhäj.