Ap.Lh 19

₁Tä Apolos ihi Corinto, Pablo inukwe lhip tä chenhas wet nichäte Éfeso, wet hiw'en Dios leles iyhäj tä ihi. ₂Wet tay'ätshane lhamel wet yok:

–¿Hä lekatayejn'aj Espíritu tä Dios T'amajchet tä lewo achayaja?

Lhamel nichulho wet yok:

–Kha, olhamel ohanhiyejt'a chik iche Espíritu tä Dios T'amajchet.

₃Wet Pablo tay'ätshane tä yok:

–Tä mälhyejtso, ¿atsi bautismo tä lekatayej n'aji?

Lhamel yok:

–Olhamel okatej naji bautismo tä tälhe Juan lechufwenyaj.

₄Wet Pablo ifwenho lhamel wet yok:

–Juan ibautisaynhen p'ante wichi tä iwo lehusey iyhäja, mat ne'tek lhamel ichaye elh tä nekche len'äyij, oyäme häp Jesús.

₅Tä lhamel iläte täjtso, wet lhaibautisaynejen Lhawuk Jesús lhey. ₆Wet tä Pablo itiche'pe takweyey, Espíritu tä Dios T'amajchet nichätpe lhamel, wet iwo lhämtesa tä w'enhache lhamej, wet yen silätyaja m'ak tä Espíritu ifwenho. ₇Wet nilhokej lhamelna iche doce.

₈Pablo ihoyepej häp Judío lhayis kan'ohusew'et yäk tres iwel'as. Tek lenowayhyaj iyeji tä yen lhämeta Dios Niyatyaj, t'uhläk wichi ihanej ihi tä matche t'at m'ak tä lham yäme. ₉Mat iche iyhäj tä hit'unthen lehusey wet ikachuye Pablo lhämtes, wet tä iyej wichi, lhamel yäme tä ni'isa N'äyij tä häpe Jesús. Tä mälhyejtso, Pablo yikch'oye lhamel, wet ichäj lhamche Dios leles wet ihäne hin'o tä lhey Tirano laka escuela. Wet nilhokej ifwalas tä ihipej lham tahuyej wichi, ₁₀pajtha nekchämes täkwfwas. Wet häp tä nilhokej wichi tä ihi Asia, Judío lhayis lhäy'e iyhäj tä kahäpeya, lhamel iläte t'at Lhawuk lhämet.

₁₁Wet Dios ikäpfwaye Pablo yämlek yenlhi m'ak tä äyteschehen. ₁₂Wet lakhajyhayaj tä iyej, tej chik sak'al lhip tä yen chufwchaya, wok häp wesaj tä hip'oyejpe lew'uyis tä tachumlhi, chik õ'häne t'inhayaj länhay, ichesen t'at, wet ahät lhayis tä ihiche inukwephä.

₁₃Wet iche hin'ol tä Judío lhayis tä ilunche wichi lew'etes, hiyawul t'at lhamel, inuhatchephä ahät lhayis tä ihiche wichi. Wet lhamel t'uhläk isej Jesús lhey tä iwoye täja, wet tahuyejpej ahät lhayis wet yok:

–Häp tä isej Jesús lhey, häp hin'o tä Pablo yen lhämeta, oyok, ¡Nukwephä!

₁₄Iche siete hin'ol tä lhalepuhfwas tä iwoye täjtso, lhamel lajcha häpe Judío tä lhey Esceva tä häpe sacerdote tä len'ohyaj ihi. ₁₅Mat iche lewhäy tä ahät nichulho lhamel tä yok:

–Ontäfwelej häp Jesús, wet äp ohanej ihi elh tä häpe Pablo. Mat amel, ¿atsi tä ahäpehen?

₁₆Häpet tä iwoyetso, wet hin'o tä ahät länek tiyäjpe lhamel wet ikalhi wet iwo m'akayej. Wet lhamel inukwe alhoho tä yikch'oye lew'et tä ts'ilakchehen lhäy'e tä lelätshay ihi.

₁₇Tä nilhokej wichi tä ihi Éfeso ihanch'oye täjtso, Judío lhayis lhäy'e iyhäj tä kahäpeya, wuj tä lenowayhyaj nichätpe lhamel. Wet lhäy'e lhip tä õ'wujyen häp Lhawuk Jesús lhey.

₁₈Wet wujpe lhamel tä iwo lechayaja lhaifwelej wet hin'älit nilhokej m'ak tä ni'isa tä pajche iwoye tä tälhe hiyawul. ₁₉Wet iyhäj tä pajche lhayen hiyawula, ihän alhoho laka libros wet iwunhomche tä ihi tä wichi itayche. Wet tä õ'tetshan laha tä nilhokej librostso, w'awulhej cincuenta mil (50.000) chinaj t'äj lhipey, wuj laha. ₂₀Tä mälhyejtso, Lhawuk lhämet lakhajyhayaj ihi pajtha y'ajpe nilhok honhat.

₂₁Tä tajyäme tähestso, Pablo iwo letichunhayaja wet lehusek yok:

–Is chik ohoye Macedonia lhäy'e Acaya, wet on'äyijej yämthilek onchäte Jerusalén. Wet chik otälhe, ohohiyela Roma.

₂₂Tä mälhyejtso, ichene Macedonia häp lech'otfwas Timoteo lhäy'e Erasto. Wet lham imälhehi ayej Asia.

₂₃Häp ifwalastso wichi tä ihi Éfeso wuj tä lhaika'tshaynejwethä häp N'äyij tä häpe Jesús. ₂₄Tsi hin'o tä tamenej lhey Demetrio, lham häpe elh tä yenwethä chinaj tä plata tä itech'aynej häp dios tsinha tä lhey Artemisa lew'et lepeyak. Wet lham lhäy'e lech'otfwas wuj kolhki tä lhamel ikalhihlä lechumetna. ₂₅Tä ifwala elh p'ante lhamel lhaihutwek, lhäy'e iyhäj tä lechumtes häte iwoye, wet Demetrio tahuyej lhamel tä yok:

–Yaiyhäj, amel lehanej tä nilhokej m'ak tä in'amejen tälhe t'at häp lhachumtes tä y'awoye. ₂₆Mat mälhyej tä lew'enay wet lelätaye athana, häp hin'otso Pablo yäme tä dios lhayis tä n'otkwey lhenhay häpkhit'a dios lhayis tä matchehen. Wet itilhkateji wujpe wichi letichunhayaj lhämtestso, wet lhamel imatitche, ts'ilakhit'a iyhäj tä ihi täjna Éfeso, mat häte nilhokej lhipey tä ihi Asia. ₂₇Tä mälhyejtso, lhawit'äy ihihila tsi nemla laha ihi m'ak tä n'amel lhachumet, wet häte nech'e õyenla w'et m'ayeka häp dios tsinha Artemisa lew'et. Wet nemla wichi iwunit n'amel lhaka dios tsinhatso, tä wichi tä ihi Asia lhäy'e iyhäj tä ihiche nilhokej honhates n'okwiyej.

₂₈Tä lhamel iläte täjtso, wuj tä lefwitseyaj ihi wet t'änhen tä yok:

–¡Lewujyaj ihi Artemisa, Efesio lhayis kadios tsinha!

₂₉Wet wichi tä ihi nilhokej hupuytso wuj tä iwo huyaja, wet iyhäj inukwetaj at alhoho tä inuye Pablo t'unfwas tä tälhe Macedonia tä lheyes Gayo lhäy'e Aristarco, wet ihäne lhip tä wichi lhaihuthipejwek. ₃₀Wet Pablo t'uhläk ihoye yämthilek yämhoplhi wichi, mat Dios leles n'äyejo wet yok:

–Yej hoye.

₃₁Wet iche niyatey tä ihi Asia tä häpehen Pablo lakalay'is, wet lhamel häte ichene lhämet tä yok:

–Yej hoye.

₃₂Häp wichi tä lhaihutwek wuj tä iwo huyaja, w'et t'än'atwethä, kalelhäjit'a m'ak tä t'uhläk iwoye, tsi wujpe lhamel tä nhanayej m'ak tä tamenej tä lhaihutwek. ₃₃Wet Judío lhayis tä iyej wichi, t'äne lhamel elh tä lhey Alejandro, ne'tek ifwenho wichi tä y'ajiyet'a Judío lhayis m'ak wit'äyna, lhamenhit'a chik tamenej. Tä mälhyejtso, Alejandro ihoye wet takwey y'aje wichi yämthilek iwo letamseka. ₃₄Mat tä lhamel nitäfwelej tä lham häpe Judío elh, nilhokej lhamel nem koyhyaj tä t'änhen yäk dos horas tä yok:

–¡Lewujyaj ihi Artemisa, Efesio lhayis kadios tsinha!

₃₅Tä paj Secretario tä lhamya ikalhi tä ne'tek wichi iwo letamseka. Wet lham tahuyej lhamel tä yok:

–Yaiyhäj, nilhokej wichi tä i'pe honhat ihanej tä n'amel t'at tä n'aÉfeso lheley wuj tä y'at'amajej häp dios tsinha Artemisa lew'et, lhäy'e tunte tä lham lepeyak p'ante nichätchä tä tälh puleye. ₃₆Wet nehit katsik yok, “Mathichet'a täjtso.” Tä mälhyejtso, wo atamsekisa, yej woye m'ak tä kamaj nikalelhäja. ₃₇Tsi häp hin'ol tä amel lehän kana, niwohit m'ak chik ni'isa chik iwoyeje lhan'okhayajw'et wet tek isitäyen lhaka dios tsinha. ₃₈Wet chik iche m'ak chik Demetrio lhäy'e iyhäj tä lech'otfwas yen tesayej elh chik häpe, lhamel ihanej ihi tä iche lewos lhäy'e ifwalas tä lewhäy tä lhamelna ikalelhät m'ayhay. Is tä ihoye wet ifwenho m'ak tä lewit'äyhyaj, yämthilek elhpej yäme t'at m'ak tä fwetaj is alhoho. ₃₉Wok chik amel lewatlä m'ak elh chik häpe, is chik alehutejwek mälhyej tä ley ne'tek õ'woye, yämthilek letetshanay. ₄₀Tsi m'ak tä amel lewoye ifwalana tamenla n'amejen chik Romano lhayis n'ayen lewuhuya n'olhäkleyhyajna. Tsi chik lhamel tay'ätshanej n'amehen m'ak tä tamenej tä wichi iwo huyaja, wet tä kay'ahanayej ihi m'ak tä häpe, ¿atsihila lhalhämet chik y'achulhejlä?

₄₁Tä ileyej lhämet tä iwoyetso, iwo tsilhekayej wichi wet yik.