1Häp tähesna Amós lhämtes. Amós häpe tson'ataswo tä lew'et hupuy tä lhey Tekoa. Tä kamaj tatäy p'ante nekchämis täkwfwas häp lewhäy tä honhat w'ahu, Dios hin'ältej Amós nilhokej m'ayhayna tä yäme Israel. Häpe t'at ifwalas tä Judá kaniyat häpe rey Uzías wet Israel kaniyat häpe p'ante rey Jeroboam, Joás lhäs.
2Amós yok:
“Lhawuk iwo lepaka tä tälhe chenaj Sión,
hätet iwoye hay'äj tä y'ip.
Wet ifwitsenej lepak tä tälhe Jerusalén,
hätet iwoye pelhay tä t'ajanlhi.
Wet häp tä honhates tä hup w'atshan
tä ihiche tasuchehchä,
wet häp chenaj Carmelo lhip tä tumphä
nem koyhyaj tä tamchäy.”
Lhawuk itiyej letes Aram lheley
3Lhawuk lhämet yok:
“Häp wichi tä ihi Damasco,
häp hupuy tä lhamya tä ihi Aram,
wuj tä ni'isachehen häp m'ak tä iwoye,
wet häp tä owohit'a elha
otichunhayaj tä otasnhila lhamel.
Tsi lhamel ihämtej häp Galaad lheley
tä ilänejen chinhas tä lechumetchal.
4Häp tä tamenej tä owunhihomchela
häp rey Hazael lewukwey tä lhamenya,
wet itäj itäyhthila häp rey Ben-hadad laka hupuy
tä hin'ol tä takhajayhen tä õy'uhyene honhat ihiche.
5Onäksihena Damasco lepechal,
wet otäyhthila häp elh tä lhayen niyatayej N'omukwehyajw'et,
lhäy'e häp niyat tä ihi N'okäjyajw'et,
wet häp Aram lhayis õ'hänhiyela
honhat tä Kir wet õyenla kwenkaya.”
Häp täjtso Lhawuk lhämet.
Lhawuk itiyej letes Filisteo lhayis
6Wet Lhawuk lhämet äp yok:
“Häp wichi tä ihi Gaza,
wuj tä ni'isachehen häp m'ak tä iwoye,
wet häp tä owohit'a elha
otichunhayaj tä otasnhila lhamel.
Tsi häp tä lhamel yäythen imälhewek wichi
wet äp iwom tä ihi Edom tä ithatlä
häp chinaj t'äj wet õyen kwenkaya.
7Häp tä tamenej tä owunhihola
häp Gaza lelafwek tä ilunejlhi lhamel,
wet itäj itäyhthila häp hupuy
tä hin'ol tä takhajayhen tä õy'uhyene honhat ihiche.
8Otäyhthila häp elh tä lhayen niyatayej Asdod,
lhäy'e häp niyat tä ihi Askalón.
Imälhewek okhajyhayaj tä onuhiyejela häp Ekrón,
pajla'tha nofwej Filisteo lhayis.”
Häp täjtso Lhawuk lhämet.
Lhawuk itiyej letes Tiro lheley
9Wet Lhawuk lhämet äp yok:
“Häp wichi tä ihi Tiro
wuj tä ni'isachehen häp m'ak tä iwoye,
wet häp tä owohit'a elha
otichunhayaj tä otasnhila lhamel.
Tsi lhamel inäk'äs lhämet
tä pajche lhayen lhalepuhfwasweka,
wet yachaje Edom lheley häp wichi tä wuj
yämthilek yen kwenkaya.
10Häp tä tamenej tä owunhihola
häp Tiro lelafwek tä ilunejlhi lhamel,
wet itäj itäyhthila häp hupuy
tä hin'ol tä takhajayhen tä õy'uhyene honhat ihiche.”
Lhawuk itiyej letes Edom lheley
11Wet Lhawuk lhämet äp yok:
“Häp wichi tä ihi honhat tä Edom
wuj tä ni'isachehen häp m'ak tä iwoye,
wet häp tä owohit'a elha
otichunhayaj tä otasnhila lhamel.
Tsi lefwajnhat ihi t'at takwey wet iwohit'a lep'altsenyaja,
wet n'äyihomche lepuhfwas Israel lhayis wet ilänhen.
Lhamel ihumin t'at lefwitseyaj
wet äytaji tä n'äyihomche iyhäj.
12Häp tä tamenej tä owunhihola häp Temán,
wet itäj itäyhthila häp hupuy tä ihi Bosra
tä hin'ol tä takhajayhen tä õy'uhyene honhat ihiche.”
Lhawuk itiyej letes Amón lhayis
13Wet Lhawuk lhämet äp yok:
“Häp wichi tä ihi honhat tä Amón
wuj tä ni'isachehen häp m'ak tä iwoye,
wet häp tä owohit'a elha
otichunhayaj tä otasnhila lhamel.
Tsi tä t'uhläk y'ayhattshi laka honhat,
wet häp tä tamenej tä hich'esajchehen
häp atsinhay tä hich'otshanhen tä ihi Galaad.
14Wet häp tä owunhihola häp lelafwek
tä ilunejlhi Hup Lhokwe,
wet itäj itäyhthila häp hupuy
tä hin'ol tä takhajayhen tä õy'uhyene honhat ihiche.
T'änhihena sip'äl tä iwo laka'tshayaja,
lhäy'e häp pelhay lepak tä y'iplhi.
15Wet laka niyat õ'hänhiyela
honhat elh wet õyenla kweneka,
lhäy'e laka hin'ol tä lhamenya.”
Häp täjtso Lhawuk lhämet.
