Lhawuk itihiyeja letasnhayaj häp wichi tä Israel letayhfwas
1Lhawuk yok, “Chik nichäte ifwalastso,
owohla elha len'äyij Judá lhäy'e Jerusalén.
2Ohutlawek nilhokej wichi,
otälhthiyela laka honhatil
wet ochäjiyela honhat tä w'awulhchä
tä oyen okalelhthayajw'eta.
Chik nichäte, oyenla letesa m'ak tä ni'isa
tä iwoyeje oka wichi Israel.
Tsi ifwtsatkatpehen honhatil häp Israel lhayis,
wet hiw'en lhamhomche oka honhat.
3Wet lhamel ikoyej suerte tä letetnek
tä hiw'en lhamhomche oka wichi,
wet lhamel iwom n'atfwas
tä hin'ol lhäy'e tä atsinhay,
wet iwompe chinaj t'äj hat'es
lhäy'e atsinhay tä kain'oyaj länhay.
4“Amel tä lheyayhi haw'etes Tiro, Sidón lhäy'e Filistea, ¿atsi m'ak tä tamenej tä letatay n'ohlä? ¿Hä amel lewo haya n'ohlä tä ichen'aj m'ak tä owoyej amehen? ¡Olham yohlakwet ow'en amhohen otasnhayaj tä t'uhawetej! 5Tsi amel let'etanehte oka oro lhäy'e oka plata, wet lechäjaye aka n'ohusew'etes häp m'ayhay tä laha ihi tä Olewuk. 6Wet letachuma wichi tä lew'et Judá lhäy'e Jerusalén, wet lehäne honhat tä atofwe tä kalew'eta, wet lhen häpeya Griego lhayis lakwenkay. 7Tä mälhyej'attso, olham otonhiphäla lhamel tä ihi lhiptso täjte lewom lhamel, wet owohla ateläythayaja tet iwoye tä lhamel iteläytej. 8Wet owomla ales tä ow'enho Judío lhayis, häpkhilek lhamel äp iwom wet hiw'enho Sabá lheley, wichi tä atofwe laka honhat. Häp tä owoyetso tä ohäpe Dios tä matche.”
9¡Fwelpe honhatil wet kalelhtho häp n'oka'tshayaj!
¡Is chik lhamel tä takhajayhen
n'omejiche laka'tshayaj tä iwoye!
¡Amel tä ahin'ol tä takhajayhen,
a'ämetaye aka'tshayaj tä lewoye!
10Achumetchal tä lesajeji akäsw'et,
en afwajnhatesa,
wet achumetchal tä lhistejen hup,
en ahunisa.
Elh tä laj lakhajyhayaja
nech'e yohlak, “Otkhajay athana.”
11¡Lhuyay tä letälhehen aka honhatil,
kelay alhoho wet ahuthiwek
honhat tä w'awulhchä tä okalelhthayajw'et!
¡Iwuk Dios, chen alhoho am aka'tshayajwos!
12“Wichi is chik lhaiwaklhathen
wet tiyäjo honhat tä okalelhthayajw'et.
Tsi ottayhihiphäla lhiptso
yämthilek owo okalelhthayajayej
nilhokej wichi tä ihiche honhates
tä iwhäye Israel.
13Tä lhamel matche tä iwo lakeyisa,
tech'aynej yachuyaj tä taj lewhäy tä õ'lanhi,
wet tech'aynej uvas tä õt'äsiche tä õyen hat'esa,
pajla'tha tapokwe lehis.”
14Wujtaj'atpey wichi tä ihi
honhat tä n'okalelhthayajw'ettso,
tsi atott'a alhoho Lhawuk laka ifwala.
15Ifwala lhäy'e iwel'a nem isiche,
wet katetsel tatäy tä isiche.
16Lhawuk iwo lepaka tä tälhe chenaj Sión,
tet iwoye t'owalhaj tä y'ip.
Wet ifwitsenej lepak tä tälhe Jerusalén,
tet iwoye pelhay tä t'ajanlhi,
wet pule lhäy'e honhat lhamel w'ahuyehen.
Mat Lhawuk häpe laka wichi Israel leletnhawet,
wet äp t'uhiyela lhamel.
Lhawuk laka wichi lakäjyaj tä tatay alhoho
17“Amel letäfwenhiyeja tä ohäpe Awuk Dios
tä oyen w'eta Sión, häp chenaj tä ot'amajchet.
Jerusalén häpkhila hupuy tä ot'amajchet,
wet wichi tä w'enha lhamej nemla lhayen lewuhuya.
18Chik nichäte ifwalatso,
amel lew'enla häp äk,
tehlat iwoye pelhay tä wuj tä t'ulhpe chenhas,
wet tewok n'äyhäy tä ihi Judá inät tapohikwela.
Wet ts'ifwik tälhiyela Ow'et
wet nitsäyhla'pe honhat tä Sitim.
19Mat Egipto wasihila wet Edom ts'anisla,
tsi häp tä inuye wichi tä lew'et Judá
wet ilänhen lhamel tä laj letesa.
20-21Olham owohla hayahlä lhamel
wet tek otäyhthiyeja letes.
Mat Judá lhäy'e Jerusalén,
wichi yenlat lew'etesa
yämthilek tiyäj'attsiy,
wet olham tä ohäpe Lewuk Dios
oyenla w'eta chenaj tä Sión tä oiwhäye lhamel.”
