N'olesaynek tä iyej hup
1Iche ifwala tä rey Belsasar tä ihi Babilonia iwo lakäjyaja wet t'äne mil hin'ol tä len'ohyajay ihi. Wet lhamel wuj tä iyäyej hat'es. 2-3Wet tä rey Belsasar w'oknaj, ne'tek lakawos yike n'olhäthis tä oro lhäy'e tä plata tä lajcha Nabucodonosor isoyej p'ante Dios Lew'et tä ihi Jerusalén. Wet lakawos ihäne rey wet iyähiche, lham lhäy'e atsinhay tä lech'efwas, lhäy'e iyhäj tä yen lemäfwasa, lhäy'e nilhokej hin'ol tä ihi n'okäjyaj. 4Nilhokej iyäyej hat'es wet iwujyenhen laka dios lhayis tä oro, plata, bronce, chinaj, hal'ä, lhäy'e tä tunte.
5Mat iche m'ak tä n'äl, häpe n'otkwey tä ilesayen hup tä ipelaj tä ihi tä n'ochäkwis tatache. Tä rey hiw'en, 6wuj tä inuhat lhamho wet tate'pe w'enha lhamej, y'ilej wet tachettiyejche lenowayhyaj. 7Wet ifwitsenej tä t'änch'oye hin'ol tä han'ältshantses lhäy'e hiyawul tä ahantses tä ihi Babilonia. Wet tä õ'hän alhoho lhamel, wet rey tahuyej tä yok:
–Hin'o chik häpek yahyen n'olesaynek wet ifwel n'oho m'ak tä häpe tä yäme, ow'uyyenhihila lew'uy tä ifwak'an tä isilataj, wet oyenla lhamisa häp n'olhamis tä oro, wet ow'enhihola lhip oniyatyaj.
8Wet nilhokej hin'ol tä ahantses tä niyat lakawos, lhamel tiyäjchufwi lewukwech'o elh tä n'olesaynek ihi. Mat niwohit elh lhamel chik ihanej, wet ihanhiyejt'a m'ak tä yäme yämthilek ifwenho häp rey. 9Wet rey Belsasar wuj tä lenowayhyaj ihi wet lhäy'e lhip tä inuhat lhamho. Wet leniyatfwas ihanhiyejt'a m'ak chik iwoye.
10Wet rey lako yiwalhe lhäs rey tä t'änlhi lhäy'e wichi tä iyej n'okäjyaj tä t'änwethä. Wet tiyäjchufwi hup lech'o tä n'okäjyaj ihi wet yok:
–¡Ika niyat, is chik leläy pajla'tha tiyäj'attsiy! Yej nuhat amho m'ak tä lhen atichunhayaja wet yej noway. 11Tsi iche hin'o tä ihi aniyatyaj tä dios lhayis tä n'ot'amajchetes laka espíritu ihi. Ika niyat, häp ifwalas tä ajcha häpe rey, wet hin'otso n'äl t'at tä lehusek is, wet wuj lehanyaj lhäy'e letäfwnhayaj tä iyej, hätet iwoye dios lhayis. Wet häp tä ajcha Nabucodonosor yen niyatayej nilhokej hiyawul tä ahantses tä ihi aka honhat, lhäy'e han'ältshantses. 12Häp hin'otso Daniel, rey yente lheya Beltsasar. Matche tä lehusek ihi, lhäy'e lehanyaj lhäy'e letäfwnhayaj, wet ihanej m'ak tä n'ofwilhey yäme, lhäy'e n'olhämtes tä athahen, wet äp ikalelhät m'ak at chik häpek atha. Ika niyat, äne Daniel. Lhamlak ifwel amho m'ak tä yäme häp n'olesaynhayni.
Õ'häne Daniel häp rey
13Tä mälhyejtso, õ'häne Daniel häp rey. Wet rey tay'ätshane wet yok:
–¿Hä ahäpe Daniel, ahäpe elh häp Judío lhayis tä n'okwenkay tä ojcha rey Nabucodonosor ihän p'ante kana tä tälhe Judá? 14Õ'fwel n'oho tä dios lhayis tä n'ot'amajchetes laka espíritu i'amhi, wet len'älit m'ak at chik häpe, wet ahanyaj ihi wet lhäy'e lhip atäfwnhayaj. 15Pajchemat õ'hän alhoho häp hin'ol tä ahantses lhäy'e tä han'ältshantses yämthilek yahyen n'olesaynekni wet ifwel n'oho m'ak tä yäme. Mat lhamel ihanhiyejt'a. 16Mat oläte tä am lehanej m'ak at chik häpek wichi nhanayej wet lekalelhät m'ayhay tä athahen. Chik am lehanej chik leyahyen n'olesaynekni wet lefwel n'oho m'ak tä yäme, one'tehlak õyen haw'uya n'ow'uy tä ifwak'an tä isilataj wet õyen amisa n'olhamis tä oro. Wet ow'enla amho lhip oniyatyaj.
17Daniel nichulho rey wet yok:
–Ika niyat, m'ak tä lefwel n'ohotso tek owatlä. Alewuk t'at, wet w'enho elh chik häpe len'ohyajtso yämthilek häpe aniyatfwa. Mat oyahyenla n'olesaynhayni wet ofwenla amho häp m'ak tä yäme.
Daniel ifwenho rey Belsasar m'ak tä häpe lefwilhek
18“Ika niyat, Dios tä N'owujtaj hiw'enhohte leniyatyaj, lewujyaj, lakhajyhayaj, lhäy'e len'ohyaj, häp ajcha Nabucodonosor. 19Wet tä wuj m'ak tä Dios iwoyeje, nilhokej wichi tä ihiche honhates tä lhayhil w'enhahiche, lhamel wuj tä itiyej lenowayhyaj häp Nabucodonosor. Chik lham t'uhläk ilän elh chik häpe, ilän t'at. Wok t'uhläk niläna, wet ilänhit'a. Chik t'uhläk iwujyen elh, wet iwujyen t'at. Wok t'uhläk yen w'et m'ayeka, wet yen at w'et m'ayeka.
20“Matkat tä hiw'en tä wichi tä i'pe honhat itiyej lewujyaj, lhäy'e lhip tä lhaichäjlhi wet lehusek t'un. Wet Dios isoyej leniyatyaj lhäy'e lewujyaj tä häpe rey. 21Dios itiyej kanhi wet nemhit iyej wichi, nech'e hätet iwoye itshäwet. Wet iyej t'at asno lhayis tä tayhlheley wet tuj t'at hup tälhes, tet iwoye w'asetas. Ihi tayhi wet ayas nitsäype, pajtha nichäte ifwala tä lham ihanej tä Dios tä N'owujtaj lakhajyhayaj i'pe nilhokej hin'ol leniyatyajay, wet lham t'at tä yen niyata elh chik häpek lham tatshupiye.
22“Wet athana, ika niyat Belsasar, tä ahäpe lhäs häp hin'o tä oyämetso wet lehanej m'ak tä ajcha lewit'äyhyaj, matkat am häte alechäjlhi. 23Wet leläkwlhi Dios tä pule Lewuk tä lewo akachenekaye n'olhäthis tä tälhehte lham Lew'et, wet am lhäy'e iyhäj tä let'äneje akäjyaj leyähiche t'at tä leyäyej hat'es. Wet lewunitay dios lhayis tä oro, plata, bronce, chinaj, hal'ä, lhäy'e tä tunte, häp dios lhayis tä niw'enache honhat wet nilätache honhat wet niwohit m'ak chik ihanej. Wet lewujyenhit'a Dios tä haw'atshancheyaj ihi lham takwey wet itetshan nilhokej m'ak tä lewoye.
24“Häp tä tamenej tä ichen n'otkwey yämthilek ilesayen tähesni, wet lelesaynek yok, 25MENÉ, MENÉ, TEKEL wet PARSÍN. 26Wet m'ak tä yäme tähesni häp täja: MENÉ häp tä yok, Dios yok, Naya ifwalas tä aniyatyaj, lepes t'at. 27Wet TEKEL yok, Dios aitetshan chik iche m'ak tä is chik lewoye, mat hiw'enhit'a. 28Wet PARSÍN yok, Dios hich'esaj aniyatyaj wet hiw'enho Medo lhayis lhäy'e Persa lhayis. Häp täjtso m'ak tä yäme n'olesaynhay.”
29Wet nech'e rey Belsasar tahuyej lakawos wet yok:
–W'uyyenhi lew'uy tä ifwak'an tä isilataj, wet en lhamisa n'olhamis tä oro.
Wet ifwenho wichi wet yok:
–Tälhe ifwalana ow'enho lhip oniyatyaj Daniel.
30Wet honatsitso õ'län häp rey Belsasar, Babilonio lhayis kaniyat. 31Wet Medo lhayis elh tä lhey Darío häp tä tiyäjo lew'et. Darío hiw'en p'ante sesenta y dos nekchämis.
